రాయలసీమ న్యూస్, క్రైమ్ డెస్క్: డాక్టర్‌ బీఆర్‌ అంబేడ్కర్‌ కోనసీమ జిల్లా రామచంద్రపురం మండలంలో జరిగిన విషాద ఘటన స్థానికులను కలచివేసింది. సరదాగా కాలువలోకి దిగిన అక్కాచెల్లెళ్ల పిల్లలు ముగ్గురు మృత్యువాత పడిన ఘటన శుక్రవారం వెలుగుచూసింది.
వెలంపాలేనికి చెందిన పోతుల మధు సాల్మాన్‌రాజుకు నలుగురు కుమార్తెలు ఉన్నారు. వీరందరికీ వివాహాలు జరిగి, తమ కుటుంబాలతో కలిసి హైదరాబాద్‌లో నివసిస్తున్నారు. సాల్మాన్‌రాజు గతేడాది మృతిచెందగా, ఆయన సంవత్సరీకం కావడంతో కుమార్తెలు పిల్లలతో కలిసి తల్లి గారింటికి వచ్చారు.
అక్కాచెల్లెళ్ల పిల్లలు ఎనిమిది మంది కలిసి చంద్రబాబునగర్‌ సమీపంలోని కాలువ వద్దకు వెళ్లారు. అక్కడ సరదాగా స్నానం చేయాలని నిర్ణయించుకున్నారు. ఈ క్రమంలో వేమన హర్షిత పావని (14) ముందుగా కాలువలోకి దిగింది. స్నానం చేస్తూ ఉండగా ఆమె నీళ్లలో మునిగిపోయింది.
హర్షిత పావని మునిగిపోతుండటాన్ని గమనించిన కనికెళ్ల రంజిత్‌ (15) ఆమెను రక్షించేందుకు కాలువలోకి దిగాడు. అయితే బలమైన ప్రవాహానికి అతను కూడా కొట్టుకుపోయాడు. తరువాత బొక్కే వీరేంద్ర (19) వారిని కాపాడేందుకు ప్రయత్నంగా కాలువలోకి దిగి గల్లంతయ్యాడు.
ఈ దృశ్యాలను చూసిన మిగతా పిల్లలు భయంతో ఇంటికి పరుగెత్తి వెళ్లి కుటుంబ సభ్యులకు విషయం తెలియజేశారు. సమాచారం అందుకున్న కుటుంబ సభ్యులు వెంటనే స్థానికులకు, పోలీసులకు సమాచారం అందించారు.
ద్రాక్షారామ పోలీసులు సంఘటనా స్థలానికి చేరుకుని, అగ్నిమాపక సిబ్బంది, గజ ఈతగాళ్ల సహాయంతో గాలింపు చర్యలు ప్రారంభించారు. కొంతసేపటి గాలింపుల అనంతరం హర్షిత పావని, రంజిత్‌, వీరేంద్ర మృతదేహాలు కాలువలో నుంచి బయటకు తీశారు. ఈ ఘటనతో కుటుంబాల్లో విషాదఛాయలు అలుముకున్నాయి.
మృతుల మృతదేహాలను పోస్టుమార్టం నిమిత్తం ప్రభుత్వ ఆసుపత్రికి తరలించారు. కేసు నమోదు చేసిన పోలీసులు దర్యాప్తు కొనసాగిస్తున్నారు. పిల్లల అకాల మరణంతో గ్రామంలో శోకసంద్రం నెలకొంది.
