రాయలసీమ న్యూస్, డిస్ట్రిక్ట్ న్యూస్ డెస్క్: ప్రొద్దటూరు:- ఒక మహిళా సంఘంలో సభ్యులకు సీఎం కార్యక్రమానికి తప్పనిసరిగా హాజరుకావాలని ఒత్తిడి తెస్తున్నారని, సభకు రాని వారిని గుర్తుంచుకుని వారికి అప్పులు మంజూరు చేయబోమని బెదిరిస్తున్నారని ఆరోపణలు వెలువడుతున్నాయి. సంఘ సభ్యులకు పంపిన సందేశంలో బాధ్యతదారులు తమ ఆవేదనను వ్యక్తం చేశారు.
సందేశంలో ముందుగా తమ పరిస్థితిని అర్థం చేసుకోవాలని, ప్రతి సంఘ సభ్యురాలికి సీఎం కార్యక్రమానికి తప్పకుండా రావాలని చెప్పాలని సూచించారు. కార్యక్రమానికి హాజరుకాని వారిపై తర్వాత చర్యలు ఉంటాయని హెచ్చరించినట్లు పేర్కొన్నారు.
ఈరోజు జరిగిన సమావేశానికి హాజరుకాని వారందరినీ గుర్తుంచుకోవాలని, భవిష్యత్తులో ఎటువంటి అప్పులు రాలేదని అడగవద్దని, తాము అప్పులు రాయబోమని స్పష్టంగా తెలియజేశారు. కొంతమంది సభ్యులు తమకు సమాచారం ఇవ్వలేదని, తెలియజేయలేదని చెబుతున్నారని, అలాంటి వారు తమ నాయకులను అడగాలని, తామిని ప్రశ్నిస్తూ ఇబ్బంది పెట్టవద్దని సందేశంలో పేర్కొన్నారు.
మరికొందరు సభ్యులు ఫోన్ కాల్స్‌కూ స్పందించకుండా, దీనిదేంటిలే అనే ధోరణిలో ఉన్నారని కూడా ఆ సందేశంలో ప్రస్తావించారు. ఎవరు ఏమనుకున్నా, సభకు రాని వారికి ఎటువంటి అప్పులు రాయబోమని తాము నిర్ణయించుకున్నట్లు స్పష్టం చేసినట్లు ఆరోపణలు ఉన్నాయి.
సందేశంలో పేర్కొన్న వివరాల ప్రకారం, ఆర్‌పీ అనే బాధ్యతదారులు సీఎం సభకు హాజరు కాని వారిని లక్ష్యంగా చేసుకుని, వారికి అప్పులు మంజూరు చేయమని బెదిరిస్తున్నారని సభ్యులు ఆరోపిస్తున్నారు. సభకు హాజరును అప్పుల మంజూరుతో అనుసంధానం చేయడం పట్ల కొంతమంది సభ్యులు అసంతృప్తి వ్యక్తం చేస్తున్నట్లు తెలుస్తోంది.
సభ్యుల మధ్య ఈ విధమైన హెచ్చరికలు, బెదిరింపులు చర్చనీయాంశంగా మారాయి. సంఘ కార్యకలాపాలు, ప్రభుత్వ కార్యక్రమాల్లో పాల్గొనడం, సభ్యులకు ఇవ్వాల్సిన అప్పుల మంజూరులో పారదర్శకతపై ప్రశ్నలు తలెత్తుతున్నాయి. ఈ ఆరోపణలపై సంబంధిత అధికారులు, నాయకుల స్పందన కోసం సభ్యులు ఎదురుచూస్తున్నారు.
వాయిస్ మెసేజ్ కోసం మా వాట్సాప్ ఛానల్ ని విసిట్ చేసి ఫాలో చేయండి
