రాయలసీమ న్యూస్, ఎంటర్‌టైన్‌మెంట్ డెస్క్: యువ నటుడు ఆనంద్ తన తాజా చిత్రం ‘ఎపిక్’ గురించి మాట్లాడుతూ సినిమా టైటిల్ వెనుక ఉన్న భావాన్ని వివరించారు. ‘ఎపిక్’ అంటే భారీ బడ్జెట్‌ సినిమా, పెద్ద కథ అని మాత్రమే భావించాల్సిన అవసరం లేదని ఆయన స్పష్టం చేశారు. మన అందరి జీవితాల్లో జరిగే చిన్న చిన్న సంఘటనలు, ప్రేమలోని అందమైన క్షణాలే నిజమైన ‘ఎపిక్ మూమెంట్స్’గా నిలుస్తాయని ఆనంద్ అభిప్రాయపడ్డారు.
మనకు ఒత్తిడిగా ఉన్న సమయంలో మన పార్ట్‌నర్ ఒక్కసారిగా చేయి పట్టుకుంటే వచ్చే ధైర్యం, నుదుటిపై పెట్టే చిన్న ముద్దు కలిగించే ఆనందం వంటి క్షణాలే జీవితంలో ఎపిక్ మూమెంట్స్‌గా నిలుస్తాయని ఆయన పేర్కొన్నారు. ఇలాంటి అందమైన క్షణాలు ‘ఎపిక్’ సినిమాలో విస్తారంగా ఉండబోతాయని ఆనంద్ తెలిపారు.
కొత్త కథలు, కొత్త ఆలోచనలు రావాలంటే కొత్త దర్శకులు ఇండస్ట్రీలోకి రావాల్సిన అవసరం ఉందని ఆనంద్ అన్నారు. ‘ఎపిక్’తో దర్శకుడు ఆదిత్య హాసన్ ఓ కొత్త పాయింట్ ఆఫ్ వ్యూను ప్రేక్షకుల ముందుకు తీసుకొస్తున్నారని ఆయన ప్రశంసించారు. ప్రతి మనిషి జీవితాన్ని ఎంతో నిశితంగా గమనించే వ్యక్తి ఆదిత్య హాసన్ అని ఆనంద్ పేర్కొన్నారు.
ఆదిత్య హాసన్‌తో మాట్లాడితే థెరపీ సెషన్‌లా అనిపిస్తుందని, తన ఆలోచనలను కూడా ఆయనతో పంచుకుంటానని ఆనంద్ తెలిపారు. ‘ఎపిక్’ కేవలం కామెడీ లేదా బ్రీజీ లవ్ స్టోరీ మాత్రమే కాదని, ప్రేక్షకులు తమ సంబంధాలు, తల్లిదండ్రులతో తమ అనుబంధం, బాధ్యతల గురించి ఆలోచించేలా చేసే ఎమోషనల్ మూవీ అని ఆయన వివరించారు.
‘ఎపిక్’లో వైష్ణవి చైతన్య తన పాత్రను అద్భుతంగా పోషించిందని ఆనంద్ ప్రశంసించారు. ఈ పాత్ర కోసం ఆమె చూపించిన ట్రాన్స్‌ఫర్మేషన్ తనను, దర్శకుడు ఆదిత్య హాసన్‌ను ఆశ్చర్యపరిచిందని చెప్పారు. కళ్లతోనే ఎంతో భావోద్వేగాన్ని పలికించే అద్భుతమైన నటి వైష్ణవి అని కొనియాడారు.
మంచి కథలను ఎంచుకుంటూ వైష్ణవి భవిష్యత్తులో తెలుగు ఇండస్ట్రీలో 20 ఏళ్ల తర్వాత కూడా గుర్తుండిపోయే నటిగా ఎదగాలని ఆనంద్ ఆకాంక్షించారు. ‘ఎపిక్’ చాలా రోజుల తర్వాత వస్తున్న అందమైన లవ్ స్టోరీ అని ఆయన పేర్కొన్నారు. ఈ సినిమాను ‘ఏ మాయ చేసావే’, ‘ప్రేమలు’ సినిమాల అందమైన ప్రేమ కథల మేళవింపుగా అభివర్ణించారు.
సంగీత దర్శకుడు హేషమ్ అబ్దుల్ వహాబ్‌తో కలిసి పనిచేయడం తనకు చాలా ప్రత్యేకమని ఆనంద్ తెలిపారు. సెప్టెంబర్ 11న ‘ఎపిక్’ థియేటర్లలో విడుదల కానుందని, ఇది బ్రీజీగా సాగుతూనే ప్రేక్షకులను ఎమోషనల్‌గా కదిలించే రొమాంటిక్ కామెడీ అని ఆయన చెప్పారు. ప్రేక్షకులంతా థియేటర్లకు వచ్చి సినిమాను ఆదరించాలని ఆనంద్ కోరారు.
