రాయలసీమ న్యూస్, ఎంటర్‌టైన్‌మెంట్ డెస్క్: హాలీవుడ్ సూపర్ హీరో ఫ్రాంచైజ్ మార్వెల్ కు ప్రపంచవ్యాప్తంగా భారీ స్థాయిలో అభిమానుల మద్దతు ఉంది. మార్వెల్ నుండి సినీ ప్రేమికులు ఎంతో ఆసక్తిగా ఎదురుచూస్తున్న అత్యంత భారీ మల్టీవర్స్ యాక్షన్ ఎంటర్‌టైనర్ ‘అవెంజర్స్: డూమ్స్‌డే’ అఫీషియల్ ట్రైలర్‌ను మేకర్స్ విడుదల చేశారు. మార్వెల్ సినిమాటిక్ యూనివర్స్ కు మళ్లీ ఊపిరి పోసేలా వచ్చిన ఈ ట్రైలర్ ప్రస్తుతం సోషల్ మీడియాలో రికార్డు స్థాయిలో వ్యూస్ సాధిస్తూ విపరీతంగా ట్రెండ్ అవుతోంది.
‘అవెంజర్స్: ఇన్ఫినిటీ వార్’, ‘అవెంజర్స్: ఎండ్‌గేమ్’ వంటి హిస్టారికల్ హిట్స్ అందించిన రూసో బ్రదర్స్ ఈ చిత్రానికి దర్శకత్వం వహిస్తున్నారు. వారి దర్శకత్వంలో వస్తోన్న తాజా అవెంజర్స్ చిత్రం కావడంతో ప్రపంచవ్యాప్తంగా అభిమానుల్లో అంచనాలు ఆకాశాన్ని తాకాయి. ట్రైలర్ ను పరిశీలిస్తే ఈసారి గ్రాఫిక్స్, యాక్షన్ సీక్వెన్సెస్, విజువల్ గ్రాండ్ నెస్ గత సినిమాలను మించేలా ఉన్నట్టు స్పష్టంగా కనిపిస్తోంది.
ఈ సినిమాలో ప్రధాన ఆకర్షణ ఐరన్ మ్యాన్ పాత్రతో ప్రపంచవ్యాప్తంగా గుర్తింపు తెచ్చుకున్న రాబర్ట్ డౌనీ జూనియర్. అయితే ఈసారి ఆయన ఐరన్ మ్యాన్‌గా కాకుండా ‘డాక్టర్ డూమ్’ అనే ఐకానిక్ నెగెటివ్ పాత్రలో ప్రేక్షకులను అలరించబోతున్నారు. మార్వెల్ అభిమానులు ఎంతో ఆసక్తిగా ఎదురుచూస్తున్న ఈ పాత్ర రూపకల్పన, ప్రెజెంటేషన్ పై ఇప్పటికే సోషల్ మీడియాలో చర్చలు జోరుగా సాగుతున్నాయి.
రాబర్ట్ డౌనీ జూనియర్ తో పాటు క్రిస్ హెమ్స్‌వర్త్ (థోర్), వనెస్సా కిర్బీ, ఆంథోనీ మాకీ (కెప్టెన్ అమెరికా), సెబాస్టియన్ స్టాన్, లెటీషియా రైట్ వంటి భారీ స్టార్ కాస్ట్ ఈ సినిమాలో నటిస్తున్నారు. మల్టీవర్స్ కాన్సెప్ట్ నేపథ్యంలో విస్తృతమైన పాత్రల సమాహారంతో, భారీ స్థాయి యాక్షన్ ఎపిసోడ్లతో ఈ చిత్రం రూపొందుతున్నట్టు ట్రైలర్ ద్వారా అర్థమవుతోంది.
ఈ భారీ యాక్షన్ అడ్వెంచర్ చిత్రం 2026 డిసెంబర్ 18న ప్రపంచవ్యాప్తంగా థియేటర్లలో విడుదల కానుంది. ఇండియాలో ఈ సినిమాను ఇంగ్లీష్‌తో పాటు హిందీ, తమిళం మరియు తెలుగు భాషల్లో అత్యంత ప్రతిష్టాత్మకంగా, బిగ్ స్క్రీన్ ఎక్స్‌పీరియన్స్ ఇచ్చే విధంగా రిలీజ్ చేయడానికి డిస్ట్రిబ్యూటర్లు సన్నాహాలు చేస్తున్నారు. మార్వెల్ అభిమానులు, సూపర్ హీరో సినిమాల ప్రేక్షకులు ఈ కొత్త అవెంజర్స్ చాప్టర్ కోసం ఆసక్తిగా ఎదురుచూస్తున్నారు.
