రాయలసీమ న్యూస్, ఎంటర్టైన్మెంట్ డెస్క్: హైదరాబాద్: ‘గజ’ సినిమా టీజర్ లాంచ్ కార్యక్రమంలో హీరో మంచు మనోజ్ పాల్గొని చిత్రబృందాన్ని అభినందించారు. ఈ సందర్భంగా ఆయన సినిమా టీజర్పై ప్రశంసలు కురిపిస్తూ, దర్శకుడు, హీరో, నిర్మాతగా ఒకేసారి బాధ్యతలు చేపట్టిన టీమ్ ధైర్యాన్ని కొనియాడారు.
కొత్త టీమ్తో ఇలాంటి ప్రయోగాత్మక ప్రయత్నం చేయడం అంత సులభం కాదని మనోజ్ అభిప్రాయపడ్డారు. ఈ సినిమా కోసం సతీష్ జై ఒకేసారి దర్శకుడు, హీరో, నిర్మాతగా వ్యవహరించిన తీరు తనను ఆకట్టుకుందని ఆయన పేర్కొన్నారు. ‘గజ’ టీజర్ చాలా బాగా వచ్చిందని, తాను నిజంగా ఇంప్రెస్ అయ్యానని మనోజ్ తెలిపారు.
జీవితంలో ముందుకు వెళ్లాలంటే రిస్క్ తీసుకోవడంతో పాటు దానిపై నమ్మకంతో కష్టపడాలని మనోజ్ సూచించారు. కొత్తగా ముందుకు రావాలనుకునే వారికి ఈ తరహా ప్రయత్నాలు ప్రేరణగా నిలుస్తాయని ఆయన భావించారు.
ఈ సందర్భంగా సంగీత దర్శకుడు మణిశర్మతో తనకున్న అనుబంధాన్ని కూడా మంచు మనోజ్ గుర్తుచేసుకున్నారు. తన తండ్రి మోహన్బాబు నటించిన ‘రాయలసీమ రామన్న చౌదరి’ చిత్రానికి తాను అసిస్టెంట్ డైరెక్టర్గా పనిచేసిన సమయంలో మణిశర్మ సంగీతాన్ని దగ్గరగా గమనించే అవకాశం దక్కిందని చెప్పారు. ఇటీవల మణిశర్మ అందించిన ‘చెన్నై లవ్ స్టోరీ’ కూడా మంచి విజయాన్ని సాధించిందని, ‘గజ’తోనూ ఆ విజయ పరంపర కొనసాగాలని ఆకాంక్షించారు.
సినిమా పరిశ్రమకు కులం, గోత్రం ఉండవని, కళకు ఎలాంటి భేదాలు లేవని మనోజ్ స్పష్టం చేశారు. సినిమా చిన్నదా, పెద్దదా అనే తేడా లేకుండా కంటెంట్ బాగుంటే ప్రేక్షకులు ఎప్పుడూ ఆదరిస్తారని ఆయన అభిప్రాయపడ్డారు. ‘గజ’ టీజర్ చూస్తుంటే సినిమా చాలా ప్రామిసింగ్గా అనిపించిందని, చిత్రబృందం మొత్తం మంచి విజయం సాధించాలని కోరుకుంటున్నానని తెలిపారు.
“కళామతల్లికి కులం లేదు.. మతం లేదు. సినిమా వాళ్లకు, ప్రేక్షకులకు, మీడియాకు మనందరిదీ ఒకటే కులం.. ప్రేమ కులం”
‘గజ’ టీజర్ ద్వారా సినిమా పట్ల మంచి అంచనాలు ఏర్పడ్డాయని, చిత్రబృందం మొత్తానికి ఆల్ ది బెస్ట్ తెలియజేస్తున్నానని మనోజ్ పేర్కొన్నారు. ఈ చిత్రం విజయం సాధించి, ఇందులో భాగమైన ప్రతి ఒక్కరికీ మంచి పేరు, గుర్తింపు తీసుకురావాలని ఆయన ఆకాంక్షించారు.
