రాయలసీమ న్యూస్, ఎంటర్‌టైన్‌మెంట్ డెస్క్: సూపర్‌స్టార్ రజనీకాంత్ అభిమానులు ఎంతో ఆసక్తిగా ఎదురుచూస్తున్న ‘జైలర్ 2’ సీక్వెల్‌ నుంచి ప్రమోషన్‌లు అధికారికంగా ప్రారంభమయ్యాయి. 2023లో విడుదలైన ‘జైలర్’ బాక్సాఫీస్ వద్ద భారీ విజయాన్ని సాధించడంతో, దానికి కొనసాగింపుగా వస్తున్న ‘జైలర్ 2’పై మొదటి నుంచే భారీ అంచనాలు నెలకొన్నాయి. సన్ పిక్చర్స్ నిర్మిస్తున్న ఈ చిత్రానికి నెల్సన్ దిలీప్‌కుమార్ దర్శకత్వం వహిస్తున్నారు. రజనీకాంత్ మరోసారి ముత్తువేల్ పాండియన్ పాత్రలోనే ప్రేక్షకుల ముందుకు రానున్నారు.

ఈ నేపథ్యంలో చిత్ర బృందం ఫస్ట్ క్యారెక్టర్ ప్రోమోను విడుదల చేసింది. ఇందులో మలయాళ నటుడు సూరజ్ వెంజరమూడు పాత్రను దిలీప్‌గా పరిచయం చేశారు. 35 సెకన్ల నిడివి గల ఈ క్యారెక్టర్ ప్రోమోలో ఆయనను స్టైలిష్, ఇంటెన్స్ లుక్‌తో చాలా పవర్‌ఫుల్‌గా చూపించారు. సూరజ్ వెంజరమూడు గెటప్, బాడీ లాంగ్వేజ్‌కు సోషల్ మీడియా వేదికగా ఊహించని స్థాయిలో స్పందన వస్తోంది.

ఈ ప్రోమోకు అనిరుధ్ రవిచందర్ అందించిన బ్యాక్‌గ్రౌండ్ స్కోర్ ప్రత్యేక ఆకర్షణగా నిలిచింది. దిలీప్ పాత్ర ఇంట్రోకు అనిరుధ్ సంగీతం మరింత హైప్ తీసుకొచ్చిందని సినీ వర్గాలు అభిప్రాయపడుతున్నాయి. మొత్తం ప్రోమోను చూసినప్పుడు ఈ పాత్ర కథలో కీలక మలుపుకు కారణమయ్యేలా ఉంటుందన్న భావన అభిమానుల్లో కలుగుతోంది.

‘జైలర్ 2’లో మొదటి భాగంలోని పలువురు నటీనటులు తమ పాత్రలను కొనసాగిస్తున్నారు. రమ్యకృష్ణన్, యోగిబాబు, మీర్నా మరోసారి కీలక పాత్రల్లో కనిపించనున్నారు. అదే సమయంలో ఈసారి తారాగణాన్ని మరింత విస్తరించారు. శివ రాజ్‌కుమార్, మోహన్‌లాల్ ముఖ్య పాత్రల్లో నటించనున్నట్లు సమాచారం. ఇప్పటికే విడుదలైన ‘జైలర్ 2’ గ్లింప్స్‌కి కూడా మంచి రెస్పాన్స్ వచ్చింది.

మొదటి సినిమాలో ముగిసిన కథకు కొనసాగింపుగా ముత్తువేల్ పాండియన్ ఈసారి మరింత పెద్ద సమస్యలో చిక్కుకోబోతున్నాడనే సంకేతాలను ఆ గ్లింప్స్ ఇచ్చాయి. కలానిధి మారన్ భారీ స్థాయిలో నిర్మిస్తున్న ఈ చిత్రానికి అనిరుధ్ రవిచందర్ సంగీతం అందిస్తున్నారు. ‘జైలర్ 2’ను 2026 అక్టోబర్ 15న ప్రపంచవ్యాప్తంగా థియేటర్లలో విడుదల చేయనున్నట్లు మేకర్స్ ఇప్పటికే ప్రకటించారు.

ఇక రజనీకాంత్ తదుపరి ప్రాజెక్టుల విషయానికి వస్తే, అశ్వత్ మారిముత్తు దర్శకత్వంలో ‘ధర్మన్’ అనే యాక్షన్ చిత్రంలో ఆయన నటిస్తున్నారు. ఇందులో రజనీకాంత్ స్టైలిష్ డాక్టర్ పాత్రలో కనిపించనున్నట్లు సమాచారం. సిమ్రాన్, యోగిబాబు, రాశిఖన్నా ఈ సినిమాలో కీలక పాత్రలు పోషిస్తున్నారు. అలాగే కమల్ హాసన్‌తో కలిసి KHxRK అనే టైటిల్‌తో మరో ప్రాజెక్ట్‌లోనూ రజనీకాంత్ నటించబోతున్నారు.