రాయలసీమ న్యూస్, ఎంటర్‌టైన్‌మెంట్ డెస్క్: అఖిల్ అక్కినేని హీరోగా తెరకెక్కిన సంచలన చిత్రం ‘లెనిన్’ టాలీవుడ్‌లో కొత్త రికార్డులు సృష్టిస్తోంది. అక్కినేని నాగార్జున సమర్పణలో మనం ఎంటర్‌ప్రైజెస్ ఎల్ఎల్‌పి, సితార ఎంటర్‌టైన్‌మెంట్స్ బ్యానర్లపై మురళి కిషోర్ అబ్బూరు దర్శకత్వంలో ఈ సినిమాను అత్యంత ప్రతిష్టాత్మకంగా నిర్మించారు. థియేటర్లలో ప్రేక్షకులను విపరీతంగా ఆకట్టుకున్న ఈ చిత్రం తాజాగా వంద కోట్ల వసూళ్ల మైలురాయిని దాటి పరిశ్రమలో చర్చనీయాంశంగా మారింది.
సిల్వర్ స్క్రీన్‌పై ఊచకోత కోసిన ఈ బ్లాక్‌బస్టర్ మూవీ ఇప్పుడు నేరుగా డిజిటల్ ప్లాట్‌ఫామ్ ద్వారా ప్రేక్షకులను అలరించడానికి సిద్ధమైంది. ప్రముఖ ఓటీటీ సంస్థ జీ5లో ఈ సినిమా ఆగస్ట్ 7 నుంచి అధికారికంగా స్ట్రీమింగ్ కానుందని మేకర్స్ ప్రకటించారు. ఈ మేరకు వారు అధికారిక ప్రకటన విడుదల చేస్తూ, థియేటర్లలో చూసిన ప్రేక్షకులతో పాటు, మళ్లీ చూడాలనుకునే సినీ ప్రేమికులకు, మొదటిసారి చూడబోయే వారికి కూడా ఓటీటీ ద్వారా అవకాశం కల్పిస్తున్నట్టు వెల్లడించారు.
‘లెనిన్’ కథ 90ల కాలం నాటి నేపథ్యంలో సాగుతుంది. చిత్తూరు జిల్లాలోని రామచంద్రాపురం గ్రామం చుట్టూ కథ తిరుగుతుంది. ప్రతి ఏటా అక్కడ 18 రోజుల పాటు జరిగే ద్రౌపదమ్మ జాతర సమయంలో ఎలాంటి రక్తపు చుక్క చిందకూడదనే కఠినమైన ఆచారం ఉంటుంది. ఈ ఆచారం చుట్టూ గ్రామ జీవనం, అక్కడి సంస్కృతి, సంప్రదాయాలను దర్శకుడు తెరపై ఆవిష్కరించారు.
సరిగ్గా అదే సమయంలో ఆ గ్రామానికి అనాథ అయిన లెనిన్ (అఖిల్) అడుగుపెడతాడు. ఈశ్వరీరావు, ఆమె తనయుడు ప్రమోద్ పంజు అతన్ని ఆదరిస్తారు. క్రమంగా అఖిల్, ప్రమోద్ మంచి స్నేహితులుగా మారుతారు. ఇదే సమయంలో అఖిల్, భాగ్యశ్రీ బోర్సె మధ్య ప్రేమ చిగురిస్తుంది. ఈ నేపథ్యంపై ఊహించని పరిణామాలు చోటుచేసుకుంటాయి. కథ అనేక సంచలన మలుపులు తిరుగుతుంది.
ఈ క్రమంలో అఖిల్ జైలు పాలు కావాల్సి వస్తుంది. అసలు లెనిన్ ఎందుకు జైలుకు వెళ్లాల్సి వచ్చింది? జైలు నుంచి వచ్చాక అతను ఎవరిపై పగ తీర్చుకోవాలనుకున్నాడు? ఈ ప్రయాణంలో అతనికి ఎదురైన సవాళ్లు ఏంటి? వంటి అనేక ఉత్కంఠభరితమైన విషయాలు ప్రేక్షకులు సినిమా చూసి తెలుసుకోవాల్సిందే.
ఈ సినిమాలో అఖిల్ ఇప్పటివరకు చేయని విధంగా రా అండ్ రస్టిక్ పాత్రలో నటించి అద్భుతమైన ప్రదర్శన కనబరిచారు. ఆయన నటనకు ప్రేక్షకులు విపరీతంగా స్పందించారు. భాగ్యశ్రీ బోర్సె తన గ్లామర్‌తో పాటు చక్కటి అభినయంతో ఆకట్టుకున్నారు. దర్శకుడు మురళి కిషోర్ అబ్బూరు రాసుకున్న కథ, కథనం, టేకింగ్ సినిమాను మరో స్థాయికి తీసుకెళ్లాయి.
తమన్ అందించిన మాస్ మ్యూజిక్, బ్యాక్‌గ్రౌండ్ స్కోర్ సినిమాకు ప్రాణంగా నిలిచాయి. లియోన్ బ్రిట్టో సినిమాటోగ్రఫీ, నవీన్ నూలి ఎడిటింగ్ వర్క్ ఈ విజువల్ వండర్‌ను మరింత పరిపుష్టం చేశాయి. థియేటర్లలో విజయవంతమైన రన్ తర్వాత ఓటీటీలోకి అడుగుపెడుతున్న ‘లెనిన్’ డిజిటల్ వేదికపై కూడా అదే స్థాయి విజయాన్ని సాధిస్తుందేమో చూడాలి.
