రాయలసీమ న్యూస్, ఎంటర్టైన్మెంట్ డెస్క్: ప్రముఖ నటుడు నాగార్జున టాలీవుడ్లో సినిమాల విడుదల తేదీల విషయంలో నెలకొన్న అలవాటుపై ప్రశ్నలు లేవనెత్తారు. తన కుమారుడు అఖిల్ హీరోగా నటించిన ‘లెనిన్’ సినిమా విజయోత్సవ కార్యక్రమంలో పాల్గొన్న ఆయన, విడుదల తేదీలను వరుసగా మార్చడం, ఫైనల్ కాపీ ఆలస్యంగా ఇవ్వడం వంటి అంశాలపై స్పష్టంగా మాట్లాడారు. దీంతో ఆయన వ్యాఖ్యలు పరిశ్రమలో చర్చనీయాంశంగా మారాయి.
‘లెనిన్’ విజయోత్సవంలో నాగార్జున ముందుగా సినిమా గురించి, అఖిల్ చేసిన కృషి గురించి, చిత్రం సాధించిన విజయంపై మాట్లాడారు. అనంతరం విషయాన్ని విడుదల తేదీల వైపు మళ్లించారు. క్రిస్టోఫర్ నోలన్ తాజా బ్లాక్ బస్టర్ ‘The Odyssey’ ఉదాహరణగా తీసుకుంటూ, అలాంటి భారీ చిత్రం ఒక సంవత్సరం ముందుగానే రిలీజ్ డేట్ ప్రకటించి, ఆ తేదీకి కట్టుబడి విడుదల చేసిన విషయాన్ని ప్రస్తావించారు.
నాగార్జున అభిప్రాయంలో, టాలీవుడ్లో మాత్రం పరిస్థితి భిన్నంగా ఉందని, తనతో సహా చాలా నిర్మాణ సంస్థలు ప్రకటించిన విడుదల తేదీలకు నిలబడలేకపోతున్నాయని ఆయన పేర్కొన్నారు. సినిమాల విడుదలను వరుస వాయిదాలు వేస్తున్నారని, కనీసం రెండు వారాల ముందే ఫైనల్ కాపీ అందించేలా వ్యవస్థ ఉండాలని ఆయన అభిప్రాయపడ్డారు.
పాన్ ఇండియా సినిమాల మోజు పెరిగిన తర్వాత నిర్మాణ ప్రక్రియలో పట్టు సడలిందనే అభిప్రాయం పరిశ్రమలో వినిపిస్తోంది. పెద్ద సినిమాలైతే నాలుగైదు రిలీజ్ డేట్లు మారకుండా బయటకు రావడం అరుదుగా మారింది. చిన్న సినిమాల పరిస్థితి కూడా దాదాపు ఇదే తరహాలో ఉందని సినీ వర్గాలు చెబుతున్నాయి. కొద్దిమంది దర్శక–నిర్మాతలు మాత్రమే ప్రకటించిన తేదీలకు సినిమాలను విడుదల చేయగలుగుతున్నారు.
ఈ నేపథ్యంతో నాగార్జున లేవనెత్తిన ప్రశ్నను టాలీవుడ్ మొత్తం సీరియస్గా తీసుకోవాల్సిన అవసరం ఉందని సినీ విశ్లేషకులు భావిస్తున్నారు. విడుదల ఆలస్యానికి ఒక విభాగాన్ని మాత్రమే కారణంగా చూపకుండా, అన్ని విభాగాలు తమ పనితీరును సమీక్షించుకోవాలని సూచిస్తున్నారు. అవసరమైతే రిలీజ్ డేట్ను కొంచెం ఆలస్యంగా ప్రకటించినా, ఒకసారి చెప్పిన తేదీకి సినిమా థియేటర్లకు రావాలనే బాధ్యతను పరిశ్రమ మొత్తం తీసుకోవాలని అభిప్రాయాలు వ్యక్తమవుతున్నాయి.
‘లెనిన్’ సినిమా మాత్రం విడుదలైన తర్వాత వసూళ్ల పరంగా మంచి స్థిరత్వాన్ని కనబరుస్తోంది. పదో రోజు కూడా ఈ చిత్రం బాక్సాఫీస్ వద్ద బలంగా నిలబడినట్లు ట్రేడ్ వర్గాలు చెబుతున్నాయి. ఈ విజయోత్సవ వేదికపైనే నాగార్జున టాలీవుడ్ విడుదల సంస్కృతిపై ప్రశ్నలు లేవనెత్తడం, పరిశ్రమలో మార్పు అవసరంపై మరోసారి చర్చను తెరపైకి తీసుకొచ్చింది.
