రాయలసీమ న్యూస్, ఎంటర్టైన్మెంట్ డెస్క్: విక్టరీ వెంకటేష్ హీరోగా, మాటల మాంత్రికుడు త్రివిక్రమ్ శ్రీనివాస్ దర్శకత్వంలో రూపొందుతున్న తాజా చిత్రం ‘ఆదర్శ కుటుంబం’ నుంచి తొలి పాట విడుదలైంది. ‘హౌస్ నెంబర్ 47’ ట్యాగ్లైన్తో వస్తున్న ఈ కుటుంబ కథా చిత్రాన్ని హారిక అండ్ హాసిని క్రియేషన్స్ పతాకంపై సూర్యదేవర రాధాకృష్ణ (చిన్నబాబు) నిర్మిస్తున్నారు.
వెంకటేష్–త్రివిక్రమ్ కలయికలో వస్తున్న సినిమా కావడంతో ప్రారంభం నుంచే ఈ ప్రాజెక్ట్పై ప్రేక్షకుల్లో, అభిమానుల్లో భారీ అంచనాలు నెలకొన్నాయి. అక్టోబర్ 9న ప్రపంచవ్యాప్తంగా ఈ సినిమాను విడుదల చేయడానికి చిత్రబృందం సిద్ధమవుతోంది. విడుదల తేదీ దగ్గరపడుతుండటంతో ప్రమోషన్ల వేగాన్ని పెంచింది. ఆ క్రమంలోనే మొదటి సింగిల్గా ‘నారాయణమ్మ’ పాటను తాజాగా ప్రేక్షకుల ముందుకు తీసుకొచ్చారు.
సంగీత ప్రియులను ఈ పాట బాగా ఆకట్టుకుంటోంది. రామజోగయ్య శాస్త్రి రాసిన అర్థవంతమైన సాహిత్యం, ప్రభ, రామ్ గాత్రం, థమన్ అందించిన బాణీలు కలిసి ‘నారాయణమ్మ’ను పర్ఫెక్ట్ ఫ్యామిలీ మెలోడీగా నిలబెట్టాయని సినీ వర్గాలు అభిప్రాయపడుతున్నాయి. కుటుంబ నేపథ్యంలో సాగే ఈ చిత్రానికి తగినట్లుగానే ఈ పాటను రూపుదిద్దినట్లు అభిమానులు సోషల్ మీడియాలో కామెంట్లు చేస్తున్నారు.
ఈ సినిమాలో వెంకటేష్ సరసన కథానాయికగా శ్రీనిధి శెట్టి నటిస్తోంది. నారా రోహిత్, నివేదా పేతురాజ్, పూజిత పొన్నాడ, రావు రమేష్ తదితరులు కీలక పాత్రల్లో కనిపించనున్నారు. త్రివిక్రమ్ శైలిలోని కుటుంబ విలువలు, భావోద్వేగాలకు ఈ తారాగణం తోడు కావడంతో సినిమాపై ఆసక్తి మరింత పెరిగింది.
చిత్రబృందం సమాచారం ప్రకారం, షూటింగ్కు సంబంధించిన అన్ని కార్యక్రమాలను పూర్తి చేసి, ప్రస్తుతం పోస్ట్ ప్రొడక్షన్ పనులను వేగంగా ముగిస్తున్నట్లు తెలుస్తోంది. ప్రమోషన్ల భాగంగా విడుదల చేసిన ఈ తొలి పాట సినిమాపై ఉన్న అంచనాలను ఇంకాస్త పెంచింది. త్వరలోనే మరో సింగిల్, టీజర్ను కూడా విడుదల చేయాలని యూనిట్ భావిస్తోంది.
ఇప్పటికే సోషల్ మీడియాలో ‘నారాయణమ్మ’ పాటకు మంచి వ్యూస్, షేర్లు వస్తున్నాయి. కుటుంబంతో కలిసి వినడానికి, చూడడానికి అనువైన పాటగా ప్రేక్షకులు ఈ సింగిల్ను అభివర్ణిస్తున్నారు. అక్టోబర్ 9న థియేటర్లలోకి రానున్న ‘ఆదర్శ కుటుంబం’ బరిలోకి దిగేలోపే, ఈ పాట సినిమాకు మంచి బజ్ను తీసుకొచ్చిందని ట్రేడ్ వర్గాలు చెబుతున్నాయి.
