రాయలసీమ న్యూస్, ఎంటర్టైన్మెంట్ డెస్క్: ‘హనుమాన్’ సినిమాతో దేశవ్యాప్తంగా సంచలనం సృష్టించిన దర్శకుడు ప్రశాంత్ వర్మ.. తన ‘ప్రశాంత్ వర్మ సినిమాటిక్ యూనివర్స్’ (PVCU)ను మరింత విస్తరించే పనిలో ఉన్నారు. విభిన్నమైన కథలు, భారతీయ పురాణాలు, సూపర్ హీరో కాన్సెప్ట్స్ను కలిపి సరికొత్త సినిమాటిక్ ప్రపంచాన్ని నిర్మిస్తున్న ఆయన.. ‘జై హనుమాన్’తో పాటు ‘మహాకాళి’ ప్రాజెక్ట్ను కూడా ముందుకు తీసుకెళ్తున్నారు.
ప్రశాంత్ వర్మ సినిమాటిక్ యూనివర్స్లో ‘మహాకాళి’ ప్రాజెక్ట్కు ప్రత్యేక స్థానం ఉండబోతోందని చిత్ర బృందం సూచిస్తోంది. భారతీయ సినిమా చరిత్రలోనే తొలి ఫీమేల్ సూపర్ హీరో చిత్రంగా ‘మహాకాళి’ సినిమాను రూపొందిస్తున్నట్లు ఇప్పటికే మేకర్స్ ప్రకటించారు. ఇప్పటివరకు సూపర్ హీరో కథల్లో పురుష పాత్రల ఆధిపత్యం ఎక్కువగా కనిపించగా.. ‘మహాకాళి’లో కాళీదేవి స్ఫూర్తితో స్త్రీ శక్తిని అత్యంత శక్తివంతంగా ఆవిష్కరించనున్నట్లు సమాచారం.
ఇప్పటికే విడుదలైన పోస్టర్లు సినిమాపై భారీ అంచనాలను పెంచాయి. తాజగా దర్శకుడు ప్రశాంత్ వర్మ ఈ సినిమాకు సంబంధించి వరుస అప్డేట్స్ ఇస్తూ అభిమానుల్లో ఆసక్తిని మరింత పెంచుతున్నారు. ఆగస్టు 24న ‘మహాకాళి’ మాస్ గ్లింప్స్ను విడుదల చేయనున్నట్లు ఆయన ముందుగా ప్రకటించారు. ఈ గ్లింప్స్లో సినిమాకు సంబంధించిన విజువల్స్, కథా ప్రపంచం, పాత్రలపై మరింత క్లారిటీ వచ్చే అవకాశం ఉందని చిత్ర వర్గాలు చెబుతున్నాయి.
ఇదిలా ఉండగా, దర్శకుడు ప్రశాంత్ వర్మ ఈరోజు ‘మహాకాళి’ రిలీజ్ డేట్ను కూడా ప్రకటించారు. వచ్చే ఏడాది సంక్రాంతి రేసులో ఈ సినిమా బరిలోకి దిగనుంది. 2027 జనవరి 8న ‘మహాకాళి’ చిత్రాన్ని ప్రేక్షకుల ముందుకు తీసుకురానున్నట్లు వెల్లడించారు. రవితేజ నటించిన ‘ఇరుముడి’ మార్నింగ్ షో అనంతరం మీడియాకు ‘మహాకాళి’కి సంబంధించిన ప్రత్యేక టీజర్ను ప్రదర్శించారు.
గూస్బంప్స్ తెప్పించేలా ఈ టీజర్ను కట్ చేసినట్లు చిత్ర బృందం పేర్కొంటోంది. టీజర్లోని విజువల్స్, కాన్సెప్ట్ సినిమాపై మరింత ఆసక్తిని రేకెత్తించేలా ఉన్నాయని సినీ వర్గాలు విశ్లేషిస్తున్నాయి. ‘హనుమాన్’తో సూపర్ హీరో జానర్లో తనదైన ముద్ర వేసిన ప్రశాంత్ వర్మ.. ఇప్పుడు ‘మహాకాళి’తో స్త్రీ శక్తిని సూపర్ హీరో ప్రపంచంలో ఎలా చూపించబోతున్నారన్నది ప్రేక్షకుల్లో, అభిమానుల్లో ఆసక్తికర చర్చగా మారింది.
