రాయలసీమ న్యూస్, ఎంటర్‌టైన్‌మెంట్ డెస్క్:
సంక్రాంతి 2027 బాక్సాఫీస్ పోరు:
చిరంజీవి – వెంకటేష్ సినిమాల మధ్య హై వోల్టేజ్ వార్
వచ్చే సంక్రాంతి టాలీవుడ్ బాక్సాఫీస్‌కి రసవత్తరంగా మారనుంది. ఈసారి పొంగల్‌కి టాలీవుడ్ నుంచి ఇద్దరు సీనియర్ హీరోలు బరిలోకి దిగేందుకు సన్నాహాలు జరుగుతున్నాయి. సంక్రాంతి సీజన్‌లో వరుస విజయాలు సాధించిన మెగాస్టార్ చిరంజీవి, విక్టరీ వెంకటేష్ మరోసారి పండుగ బరిలో ఎదురెదురుగా నిలిచే అవకాశాలు కనిపిస్తున్నాయి.
సంక్రాంతి సక్సెస్ హీరోలుగా పేరొందిన చిరంజీవి, వెంకటేష్ ఇద్దరూ గతంలో ఈ సీజన్‌లో అనేక బ్లాక్‌బస్టర్ చిత్రాలు అందించారు. ఇటీవల జరిగిన సంక్రాంతి 2026కి చిరంజీవి నటించిన “మన శంకర వరప్రసాద్ గారు” చిత్రం హిట్ సాధించగా, అంతకుముందు రెండు సంక్రాంతులకు వెంకటేష్ “సంక్రాంతికి వస్తున్నాం”, “F2”, “F3” వంటి విజయవంతమైన సినిమాలతో ప్రేక్షకులను అలరించారు. ఈ నేపథ్యంతో 2027 సంక్రాంతి పోరు మరింత ఆసక్తికరంగా మారింది.
మెగాస్టార్ చిరంజీవి హీరోగా, దర్శకుడు బాబీ దర్శకత్వంలో రూపొందుతున్న “మెగా 158” చిత్రం ప్రస్తుతం వేగంగా షూటింగ్ జరుపుకుంటోంది. ఈ సినిమా రెండో షెడ్యూల్‌కు సంబంధించిన పనులు పూర్తయినట్టు సమాచారం. అభిమానుల్లో ఇప్పటికే ఈ చిత్రంపై భారీ అంచనాలు నెలకొన్నాయి. అందుకు తగ్గట్టుగానే బాబీ షూటింగ్‌ను వేగంగా పూర్తి చేస్తున్నారని సినీ వర్గాల్లో చర్చ నడుస్తోంది.
“మెగా 158”లో చిరంజీవి సరసన నటించే హీరోయిన్ పేరును ఇంకా అధికారికంగా ప్రకటించలేదు. దీంతో అభిమానుల్లో ఆసక్తి మరింత పెరిగింది. రెండో షెడ్యూల్ పూర్తయ్యేలోపు హీరోయిన్‌ను ప్రకటించేందుకు నిర్మాణ సంస్థ KVN Productions ప్రణాళికలు సిద్ధం చేస్తోందని వార్తలు వినిపిస్తున్నాయి. అలాగే ఆగస్ట్ 22న చిరంజీవి జన్మదినాన్ని పురస్కరించుకుని ఈ సినిమాకు సంబంధించిన పెద్ద అప్‌డేట్ ఇవ్వాలని టీమ్ భావిస్తున్నట్టు టాక్ ఉంది. ఈ చిత్రం సంక్రాంతి 2027 కానుకగా ప్రపంచవ్యాప్తంగా గ్రాండ్‌గా విడుదల చేయాలని లక్ష్యంగా పెట్టుకున్నారని సమాచారం.
ఇక మరోవైపు దర్శకుడు అనిల్ రావిపూడి, హీరోలు వెంకటేష్, కళ్యాణ్ రామ్ కాంబినేషన్‌లో రూపొందుతున్న కొత్త సినిమా కూడా సంక్రాంతి 2027కి విడుదల కానుందనే వార్తలు వినిపిస్తున్నాయి. ఈ ప్రాజెక్ట్‌పై కూడా భారీ అంచనాలు ఉన్నాయి. అనిల్ రావిపూడి పేరు వినగానే సంక్రాంతి హిట్‌లు గుర్తుకు రావడం సహజం. వెంకటేష్‌తో “F2”, “F3”, మహేష్ బాబుతో “సరిలేరు నీకెవ్వరు”, “సంక్రాంతికి వస్తున్నాం”, చిరంజీవితో “మన శంకర వరప్రసాద్ గారు” వంటి సంక్రాంతి బ్లాక్‌బస్టర్ చిత్రాలకు ఆయనే దర్శకుడు కావడం విశేషం.
ఈ రెండు చిత్రాల విడుదల తేదీలు అధికారికంగా ఖరారై ప్రకటిస్తే, సంక్రాంతి 2027 బాక్సాఫీస్ పోరు మరింత హై వోల్టేజ్‌గా మారడం ఖాయం అని సినీ వర్గాలు భావిస్తున్నాయి. రెండు సినిమాలపై భారీ అంచనాలు ఉండటంతో పాటు, ఇద్దరూ సంక్రాంతి సీజన్‌కు సెంటిమెంట్ కలిగిన హీరోలే కావడంతో, అభిమానులతో పాటు ఇండస్ట్రీ కూడా ఈ పొంగల్ వార్‌ను ఆసక్తిగా ఎదురుచూస్తోంది.
ఇప్పటికే “మన శంకర వరప్రసాద్ గారు” సినిమాలో చిరంజీవి, వెంకటేష్ కలిసి సందడి చేసిన సంగతి తెలిసిందే. అయితే వచ్చే సంక్రాంతికి మాత్రం ఇద్దరూ వేర్వేరు సినిమాలతో బాక్సాఫీస్ వద్ద తలపడే పరిస్థితి కనిపిస్తోంది. చివరికి ఈ సంక్రాంతి విజేతగా ఎవరు నిలుస్తారన్నది టాలీవుడ్‌లో హాట్ టాపిక్‌గా మారింది.
