రాయలసీమ న్యూస్, ఎంటర్టైన్మెంట్ డెస్క్: విక్టరీ వెంకటేష్, మాటల మాంత్రికుడు త్రివిక్రమ్ శ్రీనివాస్ కాంబినేషన్లో వస్తున్న ‘ఆదర్శ కుటుంబం – AK47’ సినిమా టీజర్ నెట్టింట భారీ హంగామా సృష్టిస్తోంది. స్వచ్ఛమైన కుటుంబ కథా చిత్రానికి ‘AK47’ అనే తుపాకీ పేరును టైటిల్గా జోడించడం ద్వారా ఈ చిత్రంలో త్రివిక్రమ్ శైలి మ్యాజిక్ ఎలా ఉండబోతోందో టీజర్ స్పష్టంగా చూపించింది.
మధ్యతరగతి కుటుంబంలో జరిగే సరదా సంఘటనలతో మొదలైన ఈ గ్లింప్స్, వెంకటేష్ వింటేజ్ కామెడీ టైమింగ్తో ప్రేక్షకులను అలరించింది. త్రివిక్రమ్ పదునైన పంచ్ డైలాగ్స్, ఊహించని ఎనర్జిటిక్ యాక్షన్ సీక్వెన్స్లతో టీజర్ ఆద్యంతం ఉత్కంఠగా సాగింది. వెంకటేష్ తనదైన శైలిలో నవ్విస్తూనే యాక్షన్ ఎలిమెంట్స్తో థ్రిల్ కలిగించారు.
పైకి ఆదర్శ కుటుంబంగా కనిపించే ఈ ఫ్యామిలీ దాచిన అసలు కథ ఏమిటన్న ఆసక్తిని టీజర్ చక్కగా రేకెత్తించింది. వెంకటేష్ సరసన KGF బ్యూటీ శ్రీనిధి శెట్టి కథానాయికగా నటిస్తోంది. నారా రోహిత్, నివేదా పేతురాజ్, సత్య, రావు రమేష్, బ్రహ్మాజీ, వెన్నెల కిషోర్, రఘుబాబు వంటి భారీ తారాగణం ఈ సినిమాకు మరింత బలం చేకూర్చింది.
థమన్ ఎస్ అందించిన బ్యాక్గ్రౌండ్ స్కోర్ టీజర్ ఎలివేషన్స్ను మరో స్థాయికి తీసుకెళ్లింది. రవి కె. చంద్రన్ విజువల్స్, నవీన్ నూలి ఎడిటింగ్, ఏ.ఎస్. ప్రకాష్ ప్రొడక్షన్ డిజైన్ ఈ చిత్ర నిర్మాణ విలువలను స్పష్టంగా తెలియజేస్తున్నాయి.
త్రివిక్రమ్ శ్రీనివాస్తో ఇప్పటికే అనేక బ్లాక్బస్టర్ చిత్రాలు తెరకెక్కించిన Haarika and Hassine Creations బ్యానర్పై ఎస్. రాధాకృష్ణ (చినబాబు) ఈ కంప్లీట్ కమర్షియల్ ఎంటర్టైనర్ను అత్యంత భారీ బడ్జెట్తో నిర్మిస్తున్నారు. కథ, స్క్రీన్ప్లే, మాటలు, దర్శకత్వం బాధ్యతలను త్రివిక్రమ్ శ్రీనివాస్ స్వయంగా చేపట్టారు.
అచ్చమైన తెలుగు సినిమా హంగులతో రూపొందుతున్న ‘ఆదర్శ కుటుంబం – AK47’ అక్టోబర్ 2, 2026న ప్రపంచవ్యాప్తంగా థియేటర్లలో విడుదల కానుంది. వినోదానికి యాక్షన్ను జోడించి బాక్సాఫీస్ వద్ద దద్దరిల్లే రేంజ్ హిట్ సాధించేందుకు వెంకీ–త్రివిక్రమ్ జోడీ సిద్ధమవుతోంది. టీజర్కు వస్తున్న స్పందన చూస్తుంటే ఈ కాంబినేషన్పై ఉన్న అంచనాలు మరింత పెరిగాయి.
