రాయలసీమ న్యూస్, ఎంటర్టైన్మెంట్ డెస్క్: భద్రకాళి పిక్చర్స్ బ్యానర్పై, సందీప్ రెడ్డి వంగా సమర్పణలో, ప్రణయ్ రెడ్డి వంగా నిర్మాణంలో, వేణుగోపాల్ రెడ్డి దర్శకత్వంలో రూపొందిన యూత్ఫుల్ ఎంటర్టైనర్ ‘రోమాంచకం’ ప్రీ రిలీజ్ ఈవెంట్ హైదరాబాదులో జరిగింది. ఈ కార్యక్రమానికి స్టార్ హీరో విజయ్ దేవరకొండ ముఖ్య అతిథిగా హాజరయ్యారు. ఆయన చేసిన ప్రసంగం సోషల్ మీడియాలో విస్తృతంగా ప్రచారం పొందుతోంది.
దర్శకుడు సందీప్ రెడ్డి వంగాతో తనకున్న అనుబంధం గురించి విజయ్ దేవరకొండ ప్రత్యేకంగా ప్రస్తావించారు. సందీప్తో తన బంధం సాధారణ దర్శకుడు–హీరో, స్నేహితులు లేదా అన్నదమ్ముల సంబంధం కాదని, దానికంటే ఎక్కువగా ఉందని ఆయన పేర్కొన్నారు. ‘అర్జున్ రెడ్డి’ చిత్ర కాలం, ఆ రోజుల్లో ఎదుర్కొన్న పరిస్థితులను గుర్తుచేసుకున్నారు.
“ఇది కేవలం దర్శకుడు-హీరో, స్నేహితులు లేదా సోదరుల బంధం కాదు. అంతకుమించింది”
‘అర్జున్ రెడ్డి’ సమయంలో తమ వద్ద డబ్బు లేదని, ఎలాంటి పరిచయాలు, ఆధారాలు లేవని, అప్పటికి ‘పెళ్లిచూపులు’ కూడా విడుదల కాలేదని విజయ్ వివరించారు. అలాంటి సమయంలో సందీప్, ప్రణయ్ అన్న, వారి తండ్రి ప్రభాకర్ తమ పొలం అమ్మి సినిమా తీశారని ఆయన గుర్తుచేశారు. అంతటి ప్రమాదం తీసుకున్న సందీప్ కోసం తాను ఎక్కడికైనా వెళ్లేందుకు సిద్ధంగా ఉంటానని, సందీప్ కూడా తన కోసం ఎక్కడికైనా వస్తాడని విజయ్ అన్నారు.
“సందీప్ పిలిచాక ఈ ఈవెంట్కు రాకపోతే నేను బతికి వేస్ట్”
Rowdy Wear ఆఫీస్ దగ్గర సుమంత్ ప్రభాస్ను తరచూ చూసేవాడినని విజయ్ చెప్పారు. అతని కళ్లలో సినిమా పట్ల ఉన్న తపన, కల అప్పుడే కనిపించిందని, ఒక రోజు నటుడో, దర్శకుడో అవుతాడని అప్పుడే అనుకున్నానని తెలిపారు. భద్రకాళి పిక్చర్స్ లోగో కనిపిస్తే ఇప్పటికీ ‘అర్జున్ రెడ్డి’ బ్యాక్గ్రౌండ్ మ్యూజిక్ గుర్తుకు వస్తుందని, ఆ బ్యానర్ తన సొంత బ్యానర్లా అనిపిస్తుందని చెప్పారు.
సందీప్, ప్రణయ్ కలిసి సినిమా తీస్తున్నారంటే అది తప్పకుండా విజయవంతం కావాలని, దర్శకుడు వేణుగోపాల్ రెడ్డి, సంగీత దర్శకుడు వాసుకి వైభవ్, హీరో సుమంత్ ప్రభాస్, హీరోయిన్ అనంతిక సనీల్కుమార్ సహా మొత్తం బృందానికి పెద్ద విజయాలు రావాలని విజయ్ ఆశాభావం వ్యక్తం చేశారు.
“మన హార్ట్లో ఫైర్ ఉండి, యాంబిషన్ ఉండి, నీపై నీకు నమ్మకం ఉంటే ఎప్పుడైనా సక్సెస్ కొట్టొచ్చు. బాయ్స్.. మీ అందరికీ చెబుతున్నాను. వర్క్ని ఎంజాయ్ చేస్తూ, మనలోని ఫైర్ను కొనసాగించగలిగితే ప్రపంచంలో ఏదీ మనల్ని ఆపలేదు”
‘రోమాంచకం’ అనే టైటిల్ గురించి మాట్లాడుతూ, 1989లో తాను పుట్టినప్పటి నుంచి తన జీవితమే ఒక రోమాంచకమని విజయ్ చెప్పారు. చేతిలో డబ్బు ఉన్నా లేకపోయినా, ప్రేమలో పడినా, హార్ట్ బ్రేక్ అయినా ప్రతి క్షణం తనకు రోమాంచకంగానే అనిపించిందని ఆయన పేర్కొన్నారు.
‘రోమాంచకం’ చిత్రం సెప్టెంబర్ 3న ప్రేక్షకుల ముందుకు రానుంది. సుమంత్ ప్రభాస్, అనంతిక సనీల్కుమార్ జంటగా నటించిన ఈ సినిమాను లవ్, కామెడీ, థ్రిల్స్ మేళవించిన యూత్ ఎంటర్టైనర్గా చిత్ర బృందం ప్రేక్షకుల ముందుకు తీసుకురానుంది.
