రాయలసీమ న్యూస్, హెల్త్ డెస్క్: చిన్న పిల్లలకు వ్యాక్సిన్లు, ఇంజెక్షన్లు వేయించే విషయంలో తల్లిదండ్రులు జాగ్రత్తగా ఉండాలని ప్రముఖ వైద్యురాలు శివరంజని సూచించారు. ముఖ్యంగా శరీరంలోని వెనుక భాగంలో ఇంజెక్షన్లు వేయించకూడదని ఆమె స్పష్టం చేశారు.
శివరంజని వివరాల ప్రకారం, వెనుక భాగంలో పెద్ద సయాటిక్ నెర్వ్ ఉండటం వల్ల అక్కడ ఇంజెక్షన్ ఇవ్వడం ప్రమాదకరమని వైద్యులు చెబుతున్నారు. పొరపాటున ఆ నాడిని సూది తాకితే పక్షవాతం వచ్చే అవకాశం ఉండటంతో ఆ ప్రాంతాన్ని పూర్తిగా తప్పించుకోవాలని ఆమె సూచించారు.
అదే విధంగా వెనుక భాగంలో కొవ్వు ఎక్కువగా ఉండటం కూడా మరో సమస్యగా వైద్య నిపుణులు చెబుతున్నారు. ఆ ప్రాంతంలో మందు సరిగా శోషించుకోకపోవడం వల్ల దాని ప్రభావం తగ్గిపోతుందని, వ్యాక్సిన్ పనిచేయకపోయే ప్రమాదం ఉంటుందని శివరంజని పేర్కొన్నారు.
ఈ నేపథ్యంలో చిన్నారులకు ఇంజెక్షన్లు వేయించే సమయంలో తొడ, భుజం భాగాలను ప్రాధాన్యంగా ఎంచుకోవాలని ఆమె తల్లిదండ్రులకు సూచించారు. పిల్లలను ఆసుపత్రికి తీసుకెళ్లినప్పుడు వైద్య సిబ్బందిని ఈ విషయంపై అప్రమత్తం చేయాలని, శరీర వెనుక భాగంలో ఇంజెక్షన్ ఇవ్వకుండా చూడాలని తల్లిదండ్రులు చొరవ తీసుకోవాల్సిన అవసరం ఉందని ఆమె అభిప్రాయపడ్డారు.
శివరంజని ప్రకారం, ముఖ్యంగా 2 ఏళ్లలోపు పిల్లలకు ఇచ్చే మజిల్స్ వ్యాక్సిన్ విషయంలో ప్రత్యేక జాగ్రత్త అవసరం. ఈ వయస్సు గల చిన్నారులకు మజిల్స్ ఇంజెక్షన్లు తొడలో మాత్రమే వేయాలని వైద్య మార్గదర్శకాలు స్పష్టంగా సూచిస్తున్నాయని ఆమె తెలిపారు.
పిల్లల ఆరోగ్య భద్రత దృష్ట్యా తల్లిదండ్రులు, ఆరోగ్య సిబ్బంది ఈ సూచనలను ఖచ్చితంగా పాటించాలని వైద్య నిపుణులు సూచిస్తున్నారు. చిన్న నిర్లక్ష్యమే పెద్ద సమస్యలకు దారితీసే అవకాశం ఉండటంతో ఇంజెక్షన్ ఇచ్చే భాగం ఎంపికలో జాగ్రత్త తప్పనిసరి అవుతోంది.
