రాయలసీమ న్యూస్, హెల్త్ డెస్క్:
ఏఎండీకి ముందే అడ్డుకట్టకు నూతన చికిత్సా విధానం
అరవై ఏళ్లు దాటిన తర్వాత కొందరిలో కంటిచూపు క్రమంగా మందగించి, చివరికి పూర్తిగా పోయే స్థితి వస్తుంది. దీనికి ప్రధాన కారణంగా భావిస్తున్న సమస్య ఏజ్ రిలేటెడ్ మాక్యులర్ డీజనరేషన్, సంక్షిప్తంగా ఏఎండీ. మన దేశంలో 60 ఏళ్లు దాటిన వారిలో సుమారు పదిశాతం మందికి ఈ వ్యాధి ఉన్నట్లు వైద్య పరిశోధనలు సూచిస్తున్నాయి.
కనుగుడ్డు వెనక భాగంలో ఉన్న రెటీనా మధ్య ప్రాంతాన్ని మాక్యులా అంటారు. ఈ ప్రాంతంలో వృథా కణాలు పేరుకుపోయి అక్కడి కణజాలాన్ని దెబ్బతీయడం వల్లే ఏఎండీ ఉత్పన్నమవుతుంది. శరీరంలోని మిగతా భాగాల మాదిరిగానే కంట్లో కూడా రోజూ మృతకణాలు ఏర్పడుతుంటాయి. సాధారణంగా కన్ను వాటిని స్వయంగా శుభ్రం చేసుకుంటూ ఉంటుంది. అయితే వయస్సు పెరిగేకొద్దీ మాక్యులాలోని కణాల చురుకుదనం తగ్గిపోవడంతో ఆ శుభ్రపరిచే ప్రక్రియ సరిగా సాగదు.
దీంతో మృతకణాలు క్రమంగా పేరుకుపోతూ మాక్యులాను దెబ్బతీస్తాయి. ఫలితంగా మధ్య భాగంలో చూపు తగ్గిపోవడం, చివరికి పూర్తిగా కోల్పోవడం జరుగుతుంది. ఇదే ఏఎండీగా వైద్యులు పేర్కొంటున్నారు. ఇప్పటివరకు ఈ వ్యాధికి పూర్తిస్థాయి, నిర్ధిష్టమైన చికిత్స అందుబాటులో లేకపోవడం వల్ల వృద్ధాప్యంలో చూపు కోల్పోయే ప్రమాదం గణనీయంగానే ఉంది.
ఈ నేపథ్యంలో ఏఎండీ సమస్య మొదలయ్యే ముందే దాన్ని అడ్డుకునే దిశగా ఫిన్‌ల్యాండ్‌లోని ఆల్టో యూనివర్సిటీ శాస్త్రవేత్తలు కొత్త చికిత్సా విధానాన్ని అభివృద్ధి చేశారు. ఈ విధానంలో ఇన్‌ఫ్రారెడ్ కిరణాలను ఉపయోగించి కంటి వెనక భాగంలో స్తబ్దంగా మారుతున్న కణాలకు స్వల్ప ఒత్తిడిని కలిగిస్తారు. ఆ ఒత్తిడితో ఆ కణాలు మళ్లీ చురుకుదనం సంతరించుకుని, సాధారణ స్థితిలో ఉన్నప్పటిలాగే అనవసరమైన మృతకణాలను తొలగించే ప్రక్రియను పునరుద్ధరించుకుంటాయని పరిశోధకులు వెల్లడిస్తున్నారు.
శాస్త్రవేత్తల వివరాల ప్రకారం, ఈ చికిత్సను 50 ఏళ్ల వయస్సు దాటిన దశలోనే ప్రారంభిస్తే, తరువాతి కాలంలో ఏఎండీ వచ్చే అవకాశాలను గణనీయంగా తగ్గించవచ్చని భావిస్తున్నారు. వృద్ధాప్యంలో చూపు కోల్పోయే ప్రమాదాన్ని ముందుగానే గుర్తించి నివారించేందుకు ఈ విధానం ఉపయోగపడే అవకాశాలు ఉన్నాయని పరిశోధక వర్గాలు ఆశాభావం వ్యక్తం చేస్తున్నాయి.
ఏఎండీకి ఇప్పటివరకు సమర్థవంతమైన చికిత్స లేకపోవడంతో, ఈ కొత్త విధానం భవిష్యత్తులో వైద్య రంగంలో ఎంతవరకు ప్రయోజనం చేకూరుస్తుందో తెలుసుకోవడానికి మరిన్ని క్లినికల్ పరీక్షలు, దీర్ఘకాలిక పరిశీలనలు అవసరమని నిపుణులు సూచిస్తున్నారు. కంటి ఆరోగ్యంపై వయస్సు పెరిగే కొద్దీ మరింత జాగ్రత్తలు తీసుకోవాల్సిన అవసరాన్ని వైద్యులు మరోసారి గుర్తుచేస్తున్నారు.
