రాయలసీమ న్యూస్, ఇంటర్నేషనల్ డెస్క్: అమెరికా అధ్యక్షుడు డోనాల్డ్ ట్రంప్ విధించిన టారిఫ్‌లకు కెనడా బలమైన ప్రతిస్పందన ఇచ్చింది. అమెరికా నుంచి దిగుమతి అయ్యే 600కి పైగా వస్తువులపై అధిక సుంకాలు విధిస్తున్నట్లు కెనడా ప్రభుత్వం ప్రకటించింది. దీంతో ఇరు దేశాల మధ్య వాణిజ్య ఉద్రిక్తతలు మరింత పెరిగే అవకాశం కనిపిస్తోంది.
కెనడా ప్రకటించిన తాజా నిర్ణయం ప్రకారం, ఏటా సుమారు 20 బిలియన్ డాలర్ల విలువైన అమెరికా దిగుమతులపై కొత్త టారిఫ్‌లు అమల్లోకి రానున్నాయి. మొత్తం 629 టారిఫ్ కేటగిరీలను గుర్తించి, వాటిపై 15 నుంచి 50 శాతం వరకు సుంకాలు విధించేందుకు కెనడా సిద్ధమైంది. వస్తువుల స్వభావం, వినియోగం, దిగుమతి పరిమాణం వంటి అంశాలను బట్టి టారిఫ్ శాతం మారనుంది.
అమెరికా నుంచి వచ్చే ఉక్కు, అల్యూమినియం, వినియోగ వస్తువులు, కొన్ని పరిశ్రమలలో ఉపయోగించే ముడి పదార్థాలు, తయారీ ఉత్పత్తులు వంటి విభాగాలు ఈ కొత్త టారిఫ్‌ల పరిధిలోకి వచ్చే అవకాశం ఉందని కెనడా వాణిజ్య వర్గాలు అంచనా వేస్తున్నాయి. అయితే పూర్తి జాబితాను కెనడా ప్రభుత్వం విడిగా ప్రకటించనుంది.
USపై అధికంగా ఆధారపడకుండా ఉండాలని కెనడా కంపెనీలు, వినియోగదారులకు కెనడా ప్రధాని Mark Carney సూచించారు. అమెరికా మార్కెట్‌పై ఆధారాన్ని తగ్గించి, ప్రత్యామ్నాయ మార్కెట్లను, సరఫరా మార్గాలను అన్వేషించాలని ఆయన పరోక్షంగా సూచించినట్లు వాణిజ్య విశ్లేషకులు భావిస్తున్నారు.
గత నెలలో డోనాల్డ్ ట్రంప్ ప్రభుత్వం కెనడా నుంచి వచ్చే కొన్ని వస్తువులపై టారిఫ్‌లు విధించిన విషయం తెలిసిందే. ఆ నిర్ణయంతో ఇరు దేశాల మధ్య వాణిజ్య సంబంధాలు దెబ్బతిన్నాయి. అదే నేపథ్యంలో కెనడా ఈసారి ప్రతిస్పందనగా అమెరికా వస్తువులపై భారీ సుంకాలు విధించడాన్ని విశ్లేషకులు ‘ట్రేడ్ వార్’లో మరో దశగా చూస్తున్నారు.
ఇప్పటికే ప్రపంచ వాణిజ్య వ్యవస్థలో అమెరికా, చైనా మధ్య కొనసాగుతున్న టారిఫ్ వివాదాలు మార్కెట్లను ప్రభావితం చేస్తున్నాయి. ఇప్పుడు అమెరికా–కెనడా మధ్య కూడా టారిఫ్‌లు పెరగడంతో ఉత్తర అమెరికా ప్రాంతంలో వాణిజ్య అనిశ్చితి మరింత పెరిగే అవకాశం ఉందని ఆర్థిక నిపుణులు సూచిస్తున్నారు. ఇరు దేశాలు చర్చల ద్వారా సమస్యను పరిష్కరించుకుంటాయా, లేక టారిఫ్‌ల పోటీ మరింత తీవ్రం అవుతుందా అన్నది చూడాల్సి ఉంది.
