రాయలసీమ న్యూస్, జాబ్స్ డెస్క్: భారతీయ వాయుసేనలో ఎయిర్‌మెన్‌ గ్రూప్‌-వై నాన్‌ టెక్నికల్‌ మెడికల్‌ అసిస్టెంట్‌ ట్రేడ్‌ పోస్టుల భర్తీకి దరఖాస్తులు ఆహ్వానిస్తున్నాయి. ఇంటర్మీడియట్‌, బీఫార్మసీ, డిప్లొమా వంటి విద్యార్హతలతో ఉన్న అభ్యర్థులు ఈ నియామకాలకు దరఖాస్తు చేసుకోవచ్చు. రాత పరీక్ష, ఫిజికల్‌ ఫిట్‌నెస్‌ టెస్టు, మెడికల్‌ టెస్టుల ద్వారా ఎంపిక ప్రక్రియ కొనసాగుతుంది. ఎంపికైనవారు శిక్షణ పూర్తిచేసిన తర్వాత ఎయిర్‌మెన్‌గా శాశ్వత ప్రాతిపదికన సేవలు అందించనున్నారు. ఈ పోస్టులకు పురుషులే అర్హులు.
గ్రూప్‌-వై నాన్‌ టెక్నికల్‌ మెడికల్‌ అసిస్టెంట్‌ ట్రేడ్‌ పోస్టుల కోసం దాదాపు ప్రతి ఏడాది రెండు సార్లు ప్రకటన వెలువడుతోంది. ఇతర ట్రేడ్‌లతో పోలిస్తే ఈ పోస్టులకు పోటీ కొంత తక్కువగా ఉండటంతో ఇంటర్మీడియట్‌ బైపీసీ, బీఫార్మసీ, డీఫార్మసీ కోర్సులు పూర్తి చేసిన అభ్యర్థులు ఈ అవకాశాన్ని వినియోగించుకోవచ్చని సూచిస్తున్నారు.
రాత పరీక్ష ఆన్‌లైన్‌ విధానంలో ఆబ్జెక్టివ్‌ మాదిరిగా నిర్వహిస్తారు. ఇంగ్లిష్‌ విభాగం తప్ప మిగతా ప్రశ్నాపత్రం ఇంగ్లిష్‌, హిందీ మాధ్యమాల్లో ఉంటుంది. సమాధానాలను ఓఎంఆర్‌ పత్రంపై గుర్తించాలి. పరీక్ష వ్యవధి 45 నిమిషాలు. ఇంగ్లిష్‌, రీజనింగ్‌ అండ్‌ జనరల్‌ అవేర్‌నెస్‌ అంశాలపై ప్రశ్నలు ఉంటాయి. ప్రతి ప్రశ్నకు ఒక మార్కు, తప్పు సమాధానానికి పావు మార్కు చొప్పున నెగటివ్‌ మార్కింగ్‌ ఉంటుంది.
ఇంగ్లిష్‌ ప్రశ్నలు CBSE 10+2 సిలబస్‌ ఆధారంగా ఉంటాయి. ఇంగ్లిష్‌ విభాగంలో 20, రీజనింగ్‌ అండ్‌ జనరల్‌ అవేర్‌నెస్‌లో 30 ప్రశ్నలు ఉంటాయి. ఈ రెండు విభాగాల్లోనూ కనీస అర్హత మార్కులు సాధించడం తప్పనిసరి. సిలబస్‌, మాదిరి ప్రశ్నాపత్రాలు, ఇతర వివరాలను https://airmenselection.cdac.in వెబ్‌సైట్‌లో చూడవచ్చు. అగ్నివీర్‌ వాయు పాత ప్రశ్నాపత్రాలు కూడా ఈ పరీక్ష సన్నద్ధతకు ఉపయోగపడతాయి.
ఇంగ్లిష్‌ వ్యాకరణం ఇంటర్మీడియట్‌ స్థాయిలోనే ఉండగా, రీజనింగ్‌ ప్రశ్నలకు హైస్కూల్‌ మాథ్స్‌ పుస్తకాలలోని సాధారణ అంశాలు చదవడం సరిపోతుందని నిపుణులు సూచిస్తున్నారు. జనరల్‌ అవేర్‌నెస్‌ కోసం హైస్కూల్‌ సైన్స్‌, సోషల్‌ పాఠ్యాంశాలతో పాటు ఇటీవల జరిగిన ముఖ్య సంఘటనలను అధ్యయనం చేయాలి. మాదిరి ప్రశ్నలు సాధన చేస్తే పరీక్షలో మంచి ఫలితాలు సాధించవచ్చని అభిప్రాయపడుతున్నారు.
వాయుసేన ప్రాథమిక శిక్షణ కేంద్రంలో అభ్యర్థులకు ప్రాథమిక తర్ఫీదు అందిస్తారు. అనంతరం సంబంధిత ట్రేడ్‌ శిక్షణ కేంద్రాలకు పంపిస్తారు. శిక్షణ సమయంలో రూ.14,600 స్టైపెండ్‌ చెల్లిస్తారు. ఫస్ట్‌ ఎయిడ్‌ చేయగలిగేలా ప్రత్యేక శిక్షణ ఇస్తారు. వాయుసేనలోని మెడికల్‌ స్టోర్లు, డిస్పెన్సరీలు, వార్డుల పర్యవేక్షణ వీరి ప్రధాన విధులు. శిక్షణ విజయవంతంగా పూర్తిచేసినవారిని విధుల్లోకి తీసుకుంటారు.
ఈ ఉద్యోగంలో 20 ఏళ్లపాటు సేవలు కొనసాగించవచ్చు. అవసరాన్ని బట్టి సేవా కాలాన్ని వయసు 57 ఏళ్లు నిండే వరకు పొడిగించే అవకాశం ఉంటుంది. మొదటి నెల నుంచే మిలటరీ సర్వీస్‌ పేతో కలిపి రూ.26,900 మూల వేతనం లభిస్తుంది. వివిధ అలవెన్సులతో కలిపి నెలకు రూ.55,000 కంటే ఎక్కువ వేతనం పొందవచ్చు. పదోన్నతుల ద్వారా ఉన్నత స్థాయికి ఎదగవచ్చు. సేవలో కొనసాగుతూ నిర్ణీత పరీక్షల్లో అర్హత సాధించినవారు కమిషన్డ్‌ ఆఫీసర్లుగా కూడా మారే అవకాశం ఉంది. ఉద్యోగం చేస్తూనే నిర్ణీత వ్యవధిలో ఉన్నత విద్యను కొనసాగించేందుకు కూడా అనుమతి ఉంటుంది. పదవీవిరమణ తర్వాత పింఛన్‌, ఇతర సదుపాయాలు లభిస్తాయి.
ఫిజికల్‌ ఫిట్‌నెస్‌ టెస్టులో భాగంగా 1.6 కి.మీ. దూరాన్ని 7 నిమిషాల్లో పూర్తి చేయాలి. 21 ఏళ్లకు పైబడినవారు 7 నిమిషాలు 30 సెకన్లలో పూర్తి చేయాలి. అదనంగా 10 పుష్‌ప్స్‌, 10 సిట్‌ప్స్‌, 20 స్క్వాట్స్‌ చేయగలగాలి. ఒక్కో వ్యాయామానికి ఒక నిమిషం సమయం ఉంటుంది.
ఫిజికల్‌ ఫిట్‌నెస్‌ టెస్టులో అర్హత సాధించినవారికి అడాప్టబిలిటీ టెస్టు-1, టెస్టు-2 నిర్వహిస్తారు. మొదటి పరీక్షలో అర్హత సాధించినవారికే రెండో పరీక్షకు అవకాశం ఉంటుంది. ఈ ఆబ్జెక్టివ్‌ పరీక్షల ద్వారా అభ్యర్థి ఎయిర్‌ ఫోర్స్‌ ఉద్యోగానికి, భిన్న వాతావరణ పరిస్థితులు, ప్రాంతాల్లో పనిచేయడానికి అనుకూలుడో కాదో అంచనా వేస్తారు. రెండో పరీక్షలోనూ ఉత్తీర్ణత సాధించినవారికి వైద్య పరీక్షలు నిర్వహించి శిక్షణ కోసం ఎంపిక చేస్తారు.
విద్యార్హతల విషయానికి వస్తే ఫిజిక్స్‌, కెమిస్ట్రీ, బయాలజీ, ఇంగ్లిష్‌ సబ్జెక్టులతో ఇంటర్మీడియట్‌లో కనీసం 50 శాతం మార్కులు, విడిగా ఇంగ్లిష్‌లో 50 శాతం మార్కులు ఉండాలి. లేదా ఇదే సబ్జెక్టులతో 50 శాతం మార్కులతో vocational కోర్సులు పూర్తి చేసినవారు కూడా అర్హులు. లేదా డీఫార్మసీ/ బీఫార్మసీ/ బీఎస్సీ (ఫార్మసీ)లో 50 శాతం మార్కులు సాధించి ఉండాలి.
ఇంటర్మీడియట్‌ విద్యార్హతతో దరఖాస్తు చేసే అభ్యర్థులు జులై 1, 2006 నుంచి జులై 1, 2010 మధ్య జన్మించి ఉండాలి. ఫార్మసీ విద్యార్హతతో దరఖాస్తు చేస్తే జులై 1, 2003 నుంచి జులై 1, 2008 మధ్య జన్మించి ఉండాలి. ఫార్మసీ చదివిన వివాహితులు జులై 1, 2003 నుంచి జులై 1, 2006 మధ్య జన్మించినవారై ఉండాలి.
ఎత్తు కనీసం 152 సెం.మీ. ఉండాలి. ఛాతీ విస్తీర్ణం 77 సెం.మీ. ఉండి, ఊపిరి పీల్చక ముందు, పీల్చిన తర్వాత ఛాతీ వ్యత్యాసం కనీసం 5 సెం.మీ. ఉండాలి. దృష్టిలో లోపం ఉండకూడదు. వినికిడి సామర్థ్యం స్పష్టంగా ఉండాలి.
పరీక్షలను సెప్టెంబరు 22, 23 తేదీల్లో నిర్వహిస్తారు. ఆన్‌లైన్‌ దరఖాస్తుల సమర్పణకు చివరి తేదీ జులై 26. పరీక్ష ఫీజు రూ.550, జీఎస్‌టీ అదనంగా చెల్లించాలి. దరఖాస్తు, ఇతర వివరాల కోసం https://iafrecruitment.edcil.co.in/airmen/ వెబ్‌సైట్‌ను సందర్శించాలి.
