రాయలసీమ న్యూస్, కర్నూలు: కర్నూలు జిల్లాలోని ఆదోని ఆర్టీసీ బస్టాండ్లో శానిటేషన్ మహిళా కార్మికిపై పెట్రోల్ పోసి నిప్పంటించిన ఘటన స్థానికంగా తీవ్ర కలకలం రేపింది. విధుల్లో ఉన్న సమయంలోనే ఈ దాడి జరగడం ఆ ప్రాంతంలో ఆందోళనకు దారితీసింది.
పోలీసులు, స్థానికుల వివరాల ప్రకారం.. ఆదోని పట్టణానికి చెందిన నర్సమ్మ అనే మహిళ మున్సిపల్ శానిటేషన్ కాంట్రాక్ట్ ఉద్యోగిగా పనిచేస్తోంది. రెండేళ్ల క్రితం భర్త మృతి చెందడంతో ఇద్దరు పిల్లలతో కలిసి కుటుంబాన్ని నడుపుకుంటూ వస్తోంది. ఆదోని ఆర్టీసీ బస్టాండ్లో శానిటేషన్ విధులు నిర్వహించడం ఆమెకు కేటాయించబడింది.
ఈ క్రమంలో, బుధవారం ఉదయం సమయంలో నర్సమ్మ బస్టాండ్లో తన పనులు చేసుకుంటూ ఉండగా సడెన్గా అక్కడికి వచ్చిన ఇద్దరు మహిళలు ఆమెపై దాడికి దిగినట్లు సమాచారం. మొదట నర్సమ్మ కళ్లలో కారం కొట్టి, ఆమెను అసహాయ స్థితిలోకి నెట్టిన దుండగులు అనంతరం ఆమెపై పెట్రోల్ పోసి నిప్పంటించినట్లు తెలుస్తోంది.
ఘటనను గమనించిన బస్టాండ్లోని ఇతర శానిటేషన్ సిబ్బంది, స్థానికులు వెంటనే అక్కడికి చేరుకుని మంటలను ఆర్పేందుకు ప్రయత్నించారు. వారి ప్రయత్నాలతో మంటలు అదుపులోకి వచ్చాయి. తీవ్రంగా గాయపడిన నర్సమ్మను వెంటనే స్థానిక ప్రభుత్వాస్పత్రికి తరలించారు.
అక్కడ వైద్యులు ఆమెకు చికిత్స అందిస్తున్నారు. ప్రాథమిక సమాచారం ప్రకారం నర్సమ్మ పరిస్థితి ప్రస్తుతం నిలకడగా ఉన్నట్లు వైద్య వర్గాలు తెలియజేసినట్టు పోలీసులు పేర్కొన్నారు.
స్థానికుల సమాచారంతో ఘటన స్థలానికి చేరుకున్న పోలీసులు కేసు నమోదు చేసి దర్యాప్తు ప్రారంభించారు. బస్టాండ్లో ఏర్పాటు చేసిన సీసీ కెమెరాల్లో రికార్డైన దృశ్యాలను సేకరించి, నిందితుల గుర్తింపుపై దృష్టి సారించారు. దాడికి పాల్పడిన ఇద్దరు మహిళల వివరాలు, వారి సంచారం, ఘటనకు ముందు–తరువాత జరిగిన పరిణామాలపై పోలీసులు ఆరా తీస్తున్నారు.
ఈ దాడికి గల కారణాలు ఏమిటి, నర్సమ్మతో నిందితులకు పాత విభేదాలు ఉన్నాయా, వ్యక్తిగత వైరం నేపథ్యంలోనే ఈ ఘటన జరిగిందా అనే కోణాల్లో విచారణ కొనసాగుతోంది. అన్ని కోణాల్లో దర్యాప్తు చేసి నిందితులను త్వరలోనే అదుపులోకి తీసుకొస్తామని పోలీసులు తెలిపినట్టు సమాచారం.
పగలుపూట, ప్రజలు రాకపోకలు సాగుతున్న బస్టాండ్లో ఇలాంటి దాడి జరగడం స్థానికులను దిగ్భ్రాంతికి గురిచేసింది. శానిటేషన్ సిబ్బంది భద్రతపై కూడా ప్రశ్నలు తలెత్తుతున్నాయి. ఈ ఘటనతో ఆదోని పట్టణంలో ఆందోళన వాతావరణం నెలకొంది.
