రాయలసీమ న్యూస్, కర్నూలు: కర్నూలు: నగరంలో పారిశుద్ధ్య పనులను మరింత క్రమబద్ధంగా, పకడ్బందీగా నిర్వహించాలని నగరపాలక సంస్థ కమిషనర్ చల్లా ఓబులేసు సంబంధిత అధికారులకు ఆదేశాలు జారీ చేశారు. గురువారం ఆయన ఏ.క్యాంపు, జొహరపురం ప్రాంతాల్లో విస్తృతంగా పర్యటించి అక్కడి పారిశుద్ధ్య పరిస్థితులను ప్రత్యక్షంగా పరిశీలించారు.
పర్యటనలో భాగంగా కమిషనర్ చల్లా ఓబులేసు మొదట ఏ.క్యాంపు పరిధిలోని వీధులు, కాలనీల్లో చెత్త సేకరణ, గార్బేజ్ పాయింట్ల నిర్వహణ, డ్రైనేజీ శుభ్రత తదితర అంశాలను పరిశీలించారు. అనంతరం జొహరపురం ప్రాంతంలో కూడా పారిశుద్ధ్య పనుల అమలు పరిస్థితులను తెలుసుకున్నారు. సిబ్బంది పనితీరు, చెత్త సేకరణ సమయాలు, తరలింపు విధానంపై వివరాలు అడిగి తెలుసుకున్నారు.
తరువాత సెట్కూరు కార్యాలయం వద్ద ఉన్న అన్న క్యాంటీన్‌ను సందర్శించిన కమిషనర్, అక్కడి నిర్వహణ, పరిశుభ్రత, ఆహార తయారీ ప్రాంతం శుభ్రత, భోజనశాల పరిశుభ్రతను సమీక్షించారు. క్యాంటీన్‌లో పనిచేస్తున్న సిబ్బంది విధుల నిర్వహణ, పరిశుభ్రత ప్రమాణాలపై అధికారులు ఇచ్చిన వివరాలను పరిశీలించారు.
ఈ సందర్భంగా కమిషనర్ చల్లా ఓబులేసు నగరంలోని గార్బేజ్ పాయింట్లపై ప్రత్యేక దృష్టి సారించాలని అధికారులకు సూచించారు. ఎక్కడా చెత్త పేరుకుపోకుండా సకాలంలో చెత్త సేకరణ, తరలింపు చర్యలను కట్టుదిట్టంగా అమలు చేయాలని ఆదేశించారు. ప్రధాన రహదారులు, అంతర్గత వీధులు, కాలనీల్లో పారిశుద్ధ్య నిర్వహణను మరింత సమర్థవంతంగా చేపట్టేలా చర్యలు తీసుకోవాలని సూచించారు.
సిబ్బంది సమన్వయంతో పనిచేస్తూ ప్రతి రోజూ నిర్దేశిత పనులను పూర్తిచేయాలని కమిషనర్ పేర్కొన్నారు. ప్రతి ఒక్కరూ ఉత్తమ పనితీరును కనబరుస్తూ నగర పరిశుభ్రతకు కృషి చేయాలని ఆయన సూచించారు. ప్రజలకు ఎలాంటి అసౌకర్యం కలగకుండా పారిశుద్ధ్య సేవలను నిరంతరం అందించేలా ప్రణాళికాబద్ధంగా పనిచేయాలని అధికారులను ఆదేశించారు.
కార్యక్రమంలో సానిటరీ ఇన్‌స్పెక్టర్ శివశంకర్, సంబంధిత అధికారులు, సిబ్బంది తదితరులు పాల్గొన్నారు. కమిషనర్ పర్యటన సందర్భంగా అధికారులు, సిబ్బంది తమ పరిధిలో చేపడుతున్న పారిశుద్ధ్య కార్యక్రమాల వివరాలను ఆయనకు తెలియజేశారు.
