రాయలసీమ న్యూస్, కర్నూలు: కర్నూలు : నగరాన్ని స్వచ్ఛతలో అగ్రస్థానంలో నిలబెట్టేందుకు మున్సిపల్ యంత్రాంగం సమిష్టిగా కృషి చేయాలని రాష్ట్ర స్వచ్ఛాంధ్ర కార్పొరేషన్ చైర్మన్ కొమ్మారెడ్డి పట్టాభిరామ్ సూచించారు. స్థానిక ఎస్‌బీఐ ఎంప్లాయిస్ కాలనీలోని నగరపాలక సంస్థ సమావేశ భవనంలో ఆయన కమిషనర్ చల్లా ఓబులేసుతో కలిసి జిల్లాలోని మున్సిపల్, పబ్లిక్ హెల్త్, గ్రామీణ పారిశుద్ధ్య శాఖల అధికారులతో సమీక్ష నిర్వహించారు.
ఈ సందర్భంగా నగరంలో అమలవుతున్న పారిశుద్ధ్య కార్యక్రమాలు, చెత్త నిర్వహణ విధానాలు, మురుగు నీటి శుద్ధి, కాలుష్య నియంత్రణ చర్యలపై అధికారుల నుంచి వివరాలు సేకరించారు. పట్టణ ప్రాంతాల్లో స్వచ్ఛత ప్రమాణాలను మరింత మెరుగుపరచడం, ప్రజల భాగస్వామ్యాన్ని పెంచడం, చెత్త వర్గీకరణను కట్టుదిట్టంగా అమలు చేయడం వంటి అంశాలపై సమీక్షలో చర్చ జరిగినట్లు సమాచారం.
అనంతరం కొమ్మారెడ్డి పట్టాభిరామ్, కమిషనర్ చల్లా ఓబులేసుతో కలిసి జొహరాపురం డంప్‌యార్డును సందర్శించారు. అక్కడ జరుగుతున్న బయో మైనింగ్ ప్రక్రియను ప్రత్యక్షంగా పరిశీలించారు. పాత చెత్త గుట్టలను శాస్త్రీయ పద్ధతుల్లో శుద్ధి చేసి, భూమిని తిరిగి వినియోగంలోకి తీసుకురావడం లక్ష్యంగా బయో మైనింగ్ పనులు కొనసాగుతున్నాయి.
తరువాత గార్గేయపురం డంప్‌యార్డులో జరుగుతున్న బయో మైనింగ్ పనులను కూడా పరిశీలించారు. అక్కడి పరిస్థితులు, పనుల పురోగతి, ఉపయోగిస్తున్న సాంకేతిక పద్ధతులపై అధికారులు వివరణ ఇచ్చారు. చెత్తను తగ్గించే దిశగా, పర్యావరణానికి హానికరం కాకుండా శాశ్వత పరిష్కారం కోసం చేపడుతున్న చర్యలను చైర్మన్ సమీక్షించినట్లు మున్సిపల్ వర్గాలు తెలిపాయి.
ఈ సందర్శనలో భాగంగా గార్గేయపురం పరిసర ప్రాంతాల్లో ప్రతిపాదిత వేస్ట్ టు ఎనర్జీ ప్లాంట్ స్థలాన్ని పరిశీలించారు. చెత్తను ఇంధనంగా మారుస్తూ విద్యుత్ ఉత్పత్తి చేయాలనే లక్ష్యంతో ఈ ప్లాంట్ ఏర్పాటు చేయాలని ప్రభుత్వం యోచిస్తోంది. అలాగే ఇంటిగ్రేటెడ్ సాలిడ్ వేస్ట్ మేనేజ్మెంట్ ప్లాంట్ ప్రతిపాదిత స్థలాన్ని కూడా చైర్మన్, కమిషనర్ పరిశీలించారు.
కర్నూలు నగరంలో చెత్త నిర్వహణ, పారిశుద్ధ్య చర్యలను సమగ్రంగా అమలు చేస్తేనే స్వచ్ఛతలో అగ్రస్థానంలో నిలబడగలమని అధికారుల మధ్య చర్చ జరిగినట్లు తెలిసింది. ఈ కార్యక్రమంలో సంబంధిత శాఖల ఉన్నతాధికారులు, మున్సిపల్ ఇంజనీర్లు, పారిశుద్ధ్య విభాగ సిబ్బంది పాల్గొన్నారు.
