రాయలసీమ న్యూస్, కర్నూలు: కర్నూలు జిల్లా బంగారుపేట ప్రాంతంలో ఆదివారం పోలీసులు విస్తృత కార్డెన్ సెర్చ్ ఆపరేషన్ నిర్వహించారు. కర్నూలు ఎస్పీ శ్రీ విక్రాంత్ పాటిల్ ఐపీఎస్ ఆదేశాల మేరకు, కర్నూలు డీఎస్పీ శ్రీ కె.వి. రాఘవేంద్ర పర్యవేక్షణలో ఈ ఆపరేషన్ చేపట్టినట్లు జిల్లా పోలీసు కార్యాలయం పత్రికా ప్రకటనలో తెలిపింది.
కర్నూలు రెండవ పట్టణ పోలీస్ స్టేషన్ పరిధిలో నిర్వహించిన ఈ కార్డెన్ సెర్చ్లో కర్నూలు నగర సీఐలు, పోలీసు సిబ్బందితో పాటు ఎక్సైజ్ శాఖ AESలు, సీఐలు, సిబ్బంది మరియు ఈగల్ టీమ్ సంయుక్తంగా పాల్గొన్నారు. బంగారుపేటలో అనుమానాస్పద ప్రాంతాలను చుట్టుముట్టి తనిఖీలు జరిపినట్లు పోలీసులు పేర్కొన్నారు.
ఆపరేషన్ సందర్భంగా 15 లీటర్ల నాటు సారా స్వాధీనం చేసుకున్నట్లు, అదనంగా 60 లీటర్ల నాటు సారా ఊట బెల్లం గుర్తించి ధ్వంసం చేసినట్లు పత్రికా ప్రకటనలో వెల్లడించారు. నాటు సారా తయారీ, నిల్వ, రవాణా, విక్రయాలపై కర్నూలు పోలీసు శాఖ ప్రత్యేక దృష్టి సారించినట్లు అధికారులు తెలిపారు.
ఈ సందర్భంగా కర్నూలు డీఎస్పీ శ్రీ కె.వి. రాఘవేంద్ర మాట్లాడుతూ, నాటు సారా తయారీ, విక్రయాలకు దూరంగా ఉండాలని ప్రజలకు హెచ్చరికలు జారీ చేశారు. చట్టవ్యతిరేక కార్యకలాపాలకు పాల్పడితే సంబంధిత వ్యక్తులపై కేసులు నమోదు చేసి, చట్టప్రకారం కఠిన చర్యలు తీసుకుంటామని ఆయన స్పష్టం చేశారు.
అనుమానాస్పద కార్యకలాపాలు గమనించిన వెంటనే ప్రజలు డయల్ 112, డయల్ 100 లేదా ఈగల్ టోల్ ఫ్రీ 1972కు సమాచారం ఇవ్వాలని డీఎస్పీ కోరారు. ప్రజల సహకారంతోనే నాటు సారా వంటి చట్టవ్యతిరేక కార్యకలాపాలను సమర్థవంతంగా అరికట్టగలమని ఆయన అభిప్రాయపడ్డారు.
ఈ కార్డెన్ సెర్చ్ ఆపరేషన్లో కర్నూలు డీఎస్పీతో పాటు కర్నూలు నగర సీఐలు శ్రీధర్, శేషయ్య, మారుతి శంకర్, ఎక్సైజ్ శాఖ AESలు రాజశేఖర్ గౌడ్, రామకృష్ణారెడ్డి, ఎక్సైజ్ సీఐలు చంద్రహాస్, జయరామ్ నాయుడు, రాజేంద్ర ప్రసాద్ కిషోర్, ఈగల్ టీమ్ ఎస్సై రమేశ్ నాయక్, ఈగల్ టీమ్ సిబ్బంది, సంబంధిత పోలీసు అధికారులు మరియు సిబ్బంది పాల్గొన్నారు.
కర్నూలు జిల్లా పోలీసు కార్యాలయం ఈ ఆపరేషన్ వివరాలను విడుదల చేస్తూ, భవిష్యత్తులో కూడా ఇలాంటి ప్రత్యేక తనిఖీలు కొనసాగుతాయని, చట్టవ్యతిరేక కార్యకలాపాలపై కఠిన చర్యలు తప్పవని స్పష్టం చేసింది.
