రాయలసీమ న్యూస్, కర్నూలు: కర్నూలు జిల్లాలో గురువారం రాత్రి స్వల్ప భూ ప్రకంపనలు నమోదయ్యాయి. ఆదోని డివిజన్కు చెందిన పలు మండలాల్లో ఈ ప్రకంపనలు స్పష్టంగా అనుభవించినట్లు స్థానికులు తెలిపారు. సుమారు రెండు సెకన్ల పాటు భూమి కంపించడంతో ప్రజలు ఒక్కసారిగా భయాందోళనకు గురయ్యారు.
ఆదోని మండలంలోని ఢణాపురం, నారాయణపురం, సాదారపురం గ్రామాల్లో రాత్రి 8 గంటల సమయంలో భూమి కంపించినట్లు అధికారులకు సమాచారం అందింది. ఈ ప్రాంతాల్లో భూమి కంపించిన తీవ్రత రిక్టర్ స్కేలు పై 3.6గా నమోదైనట్లు ఆదోని మండల రెవెన్యూ అధికారి MRO వేణుగోపాలరావు తెలిపారు. స్వల్ప తీవ్రతతోనే ప్రకంపనలు నమోదైనప్పటికీ, ప్రజలు ఇళ్ల బయటకు పరుగులు పెట్టినట్లు స్థానికులు చెబుతున్నారు.
ఆలూరు, పత్తికొండ, మంత్రాలయం పరిధిలో కూడా భూమి వైబ్రేట్ అయినట్లు అక్కడి ప్రజలు పేర్కొన్నారు. ఇళ్లలో ఉన్న వస్తువులు స్వల్పంగా కదిలినట్లు, నేల కంపించినట్లు అనుభవించినట్టు వారు తెలిపారు. అయితే ఇప్పటి వరకు ఎలాంటి ప్రాణ, ఆస్తి నష్టం జరిగినట్లు సమాచారం లేదు.
భూ ప్రకంపనలు నమోదైన ప్రాంతాల్లో రెవెన్యూ సిబ్బంది, స్థానిక అధికారులు పరిస్థితిని పరిశీలిస్తున్నారు. ప్రజలు ఆందోళన చెందాల్సిన అవసరం లేదని, పరిస్థితిని దగ్గర నుంచి గమనిస్తున్నామని అధికారులు పేర్కొంటున్నారు. అవసరమైతే సంబంధిత సాంకేతిక శాఖల సహాయంతో మరిన్ని వివరాలు సేకరించనున్నట్లు తెలిపారు.
కర్నూలు జిల్లాలో గత కొంతకాలంగా అప్పుడప్పుడూ స్వల్ప భూ ప్రకంపనలు నమోదవుతున్నాయి. తాజా ఘటనతో ప్రజల్లో మరోసారి భయాందోళన నెలకొన్నప్పటికీ, నిపుణులు స్వల్ప తీవ్రత గల ప్రకంపనలు సాధారణమేనని, అప్రమత్తంగా ఉండడం మంచిదని సూచిస్తున్నారు.
