రాయలసీమ న్యూస్, కర్నూలు: కర్నూలు పట్టణంలో పోలీస్ ఉద్యోగాల భర్తీకి సంబంధించి నిరుద్యోగులు శాంతియుతంగా నిరసన తెలిపారు. 11,639 పోలీస్ పోస్టులకు వెంటనే నోటిఫికేషన్ విడుదల చేయాలని డిమాండ్ చేస్తూ, ఏపీ పోలీస్ అభ్యర్థులు బిర్లా కాంపౌండ్ వద్ద గురువారం ఉదయం నుంచి ఆందోళన కొనసాగించారు.
పోలీస్ నియామక ప్రక్రియను వేగవంతం చేయాలని, ఖాళీగా ఉన్న పోస్టులను భర్తీ చేసి నిరుద్యోగ యువతకు ఉపాధి కల్పించాలని అభ్యర్థులు కోరుతున్నారు. రాష్ట్రంలో భద్రతా వ్యవస్థ బలోపేతానికి కూడా ఈ నియామకాలు అవసరమని వారు అభిప్రాయపడుతున్నారు.
కాకినాడలో పోలీస్ ఉద్యోగాల కోసం పోరాడిన అభ్యర్థులపై నమోదైన కేసులను వెంటనే ఉపసంహరించుకోవాలని నిరసనకారులు ప్రభుత్వాన్ని కోరారు. ఉద్యోగాల కోసం పోరాడే యువతపై ఇకపై కేసులు నమోదు చేయకూడదని వారు డిమాండ్ చేశారు.
“కాకినాడలో అభ్యర్థులపై అక్రమంగా పెట్టిన కేసులను వెంటనే ఎత్తివేయాలి.. ఇకపై ఉద్యోగాల కోసం పోరాడే యువతపై కేసులు పెట్టకూడదు” అని డిమాండ్..
తమ పోరాటాన్ని దెబ్బతీయడానికి, ఎవరో ప్రలోభపెడుతున్నారని ప్రచారం చేయడం సరైంది కాదని నిరసనకారులు పేర్కొన్నారు. తమ భవిష్యత్తు కోసం తామే స్వయంగా పోరాడుతున్నామని, ఇది ఏ వ్యక్తి లేదా సంస్థ ప్రేరేపణ కాదని వారు స్పష్టం చేశారు.
“మమ్మల్ని ఎవరో ప్రలోభపెడుతున్నారని చెప్పడం మా పోరాటాన్ని అవమానించడమే.. మా భవిష్యత్తు కోసం మేమే పోరాడుతున్నాం. మా సమస్యలను ప్రభుత్వం దృష్టికి తీసుకెళ్లడం మా ప్రజాస్వామ్య హక్కు..”
బిర్లా కాంపౌండ్ వద్ద జరిగిన ఈ నిరసన కార్యక్రమం మొత్తం శాంతియుతంగా సాగింది. నినాదాలు చేస్తూ, ప్లకార్డులు ప్రదర్శిస్తూ తమ డిమాండ్లను తెలియజేశారు. పోలీస్ ఉద్యోగాల నోటిఫికేషన్ విడుదలపై ప్రభుత్వం స్పష్టమైన ప్రకటన చేయాలని, నిరుద్యోగ యువత ఆతృతగా ఎదురు చూస్తున్నారని వారు తెలిపారు.
నిరసన స్థలంలో పోలీసులు బందోబస్తు ఏర్పాటు చేసినప్పటికీ, అభ్యర్థులు ప్రశాంతంగా తమ ఆందోళన కొనసాగించారు. తమ న్యాయమైన డిమాండ్లను ప్రభుత్వం సానుకూలంగా పరిశీలించి, త్వరితగతిన నిర్ణయం తీసుకోవాలని నిరసనకారులు ఆశాభావం వ్యక్తం చేశారు.
