రాయలసీమ న్యూస్, కర్నూలు: వైద్య, ఆరోగ్య శాఖ మంత్రి శ్రీ సత్యకుమార్ ఇటీవల ఆస్పిరి పీహెచ్సీ లో నిర్వహించిన సంజీవని ప్రారంభ కార్యక్రమంలో తన ప్రత్యేక వ్యవహారశైలితో అధికారులను, సిబ్బందిని ఆకట్టుకున్నారు. సాధారణంగా మంత్రులు హాజరయ్యే కార్యక్రమాల్లో కనిపించే ప్రొటోకాల్, హడావుడి, దూరంగా నిలబడే అధికారులు, సిబ్బంది వంటి దృశ్యాలకు భిన్నంగా ఈ కార్యక్రమం సాగింది.
సంజీవని ప్రారంభోత్సవం ముగిసిన అనంతరం అక్కడ ఉన్న అధికారులు, ఉద్యోగులు ఫొటో కోసం ముందుకు వచ్చారు. ఈ సందర్భంగా మంత్రి సత్యకుమార్ ప్రత్యేక ఏర్పాట్లు చేయించకుండా, ఎలాంటి హడావుడి లేకుండా, వారిలో ఒకరిగా నిలబడి అందరితో కలిసి ఫొటో దిగారు. పదవికి తగిన ఆర్భాటం, భేషజాలు ఏమాత్రం ప్రదర్శించకుండా సహజంగా వ్యవహరించిన ఆయన తీరు అక్కడున్నవారిని ఆశ్చర్యానికి గురి చేసింది.
మంత్రి హోదాలో ఉన్నప్పటికీ సత్యకుమార్ అందరినీ ఆప్యాయంగా పలకరించడం, ఎలాంటి సంకోచం లేకుండా కలిసిమెలిసి ఉండడం ఉద్యోగులను ఆకట్టుకున్న అంశంగా అక్కడ చర్చనీయాంశమైంది. సాధారణంగా ఉన్నత హోదాలో ఉన్నవారితో మాట్లాడేటప్పుడు ఉద్యోగులు, సిబ్బంది కొంత సంకోచం, దూరం పాటించడం సహజం. అయితే ఈ కార్యక్రమంలో మంత్రి ప్రవర్తన ఆ దూరాన్ని తగ్గించినట్లు అక్కడి వాతావరణం సూచించింది.
నిరాడంబరత, అందుబాటులో ఉండే స్వభావమే సత్యకుమార్ ప్రత్యేకతగా నిలుస్తోందని అక్కడి అధికారులు, సిబ్బంది మధ్య అభిప్రాయం వ్యక్తమైంది. పదవి, ప్రోటోకాల్‌లను పక్కన పెట్టి, సాధారణ ఉద్యోగి, అధికారి లా అందరితో కలిసిపోవడం ద్వారా ఆయన వారికి మరింత చేరువయ్యారని భావిస్తున్నారు.
సంజీవని ప్రారంభ కార్యక్రమం సందర్భంగా మంత్రి ప్రవర్తనలో కనిపించిన ఈ సరళత, ఆత్మీయత ఆయనకు అధికారులతో, సిబ్బందితో సాన్నిహిత్యాన్ని పెంచుతోందన్న అభిప్రాయం అక్కడ వినిపించింది. ప్రజాప్రతినిధులు, ముఖ్యంగా మంత్రులు ప్రజలతో, ఉద్యోగులతో ఎలా మమేకం కావాలన్న దానికి సత్యకుమార్ ప్రవర్తన ఒక ఉదాహరణగా నిలుస్తోందని అక్కడి వర్గాలు వ్యాఖ్యానిస్తున్నాయి.
