రాయలసీమ న్యూస్, కర్నూలు: కర్నూలు జిల్లా ఎమ్మిగనూరు మండలం బనవాసి ఫారంలో సుమారు 3,500 ఎకరాల ప్రభుత్వ భూమి ఉంది. ఈ విస్తారమైన భూసంపదను ఉపయోగించి ప్రభుత్వం అనేక కార్యాలయాలు, పరిశ్రమలు ఏర్పాటు చేయాలని యోచిస్తోంది. అయితే అదే ప్రాంతం చుట్టుపక్కల ఉన్న గ్రామాల విద్యార్థుల విద్యాసౌకర్యాల సమస్య ఇప్పటికీ పరిష్కారం కాని దశలోనే ఉంది.
బనవాసి ఫారం పరిసరాల్లో దాదాపు 15 గ్రామాలు ఉన్నాయి. ఈ గ్రామాల్లో హై స్కూల్‌లు లేకపోవడంతో వేలాది మంది విద్యార్థులు చదువుకోడానికి ఎమ్మిగనూరు పట్టణానికి వెళ్లాల్సిన పరిస్థితి నెలకొంది. ఉదయం, సాయంత్రం సమయానికి బస్సులు అందుబాటులో లేకపోవడం వల్ల అనేక మంది విద్యార్థులు మధ్యలోనే చదువు మానేయాల్సి వస్తోందని స్థానికులు ఆవేదన వ్యక్తం చేస్తున్నారు.
బనవాసి, ఫారం, పరమాన్ దొడ్డి, నక్కలమిట్ట, బోడబండ, చెన్నాపురం, దేవిబెట్ట, కోటేకల్, మల్కపురం, బసాపురం గ్రామాల విద్యార్థులు రోజూ ఎమ్మిగనూరుకు వెళ్లి చదువుతున్నారు. అలాగే పెద్దకడుబూరు మండలంలోని రాగిమాన్ దొడ్డి, గంగులపాడు గ్రామాల విద్యార్థులు కూడా ఎమ్మిగనూరులోని విద్యాసంస్థలపై ఆధారపడుతున్నారు.
దూర ప్రయాణం, రవాణా అసౌకర్యం, కుటుంబ ఆర్థిక పరిస్థితులు వంటి కారణాల వల్ల గ్రామాల నుంచి ఎమ్మిగనూరుకు తరచూ వెళ్లడం అనేక కుటుంబాలకు భారంగా మారింది. ముఖ్యంగా బాలికల విద్యపై దీని ప్రభావం ఎక్కువగా పడుతోందని గ్రామస్థులు చెబుతున్నారు. సమీపంలోనే హై స్కూల్, కాలేజీ, హాస్టల్ వంటి సౌకర్యాలు ఉంటే చదువు కొనసాగించడం సులభమవుతుందని వారి అభిప్రాయం.
బనవాసి ఫారంలో ప్రభుత్వ భూమి విస్తారంగా ఉన్న నేపథ్యంలో, అదే ప్రాంతంలో విద్యాసంస్థలు ఏర్పాటు చేయడం సాధ్యమని స్థానికులు భావిస్తున్నారు. ఇప్పటికే కార్యాలయాలు, పరిశ్రమలు ఏర్పాటు చేయాలని ప్రభుత్వం ప్రణాళికలు సిద్ధం చేస్తుండగా, విద్యాసౌకర్యాల ఏర్పాటు కూడా ఆ ప్రణాళికల్లో భాగం కావాలని వారు కోరుతున్నారు.
ఈ నేపథ్యంలో బనవాసి ఫారం పరిసర గ్రామాల ప్రజలు జిల్లా కలెక్టర్, డిఈఓ ప్రత్యేక చొరవ తీసుకోవాలని విజ్ఞప్తి చేస్తున్నారు. బనవాసి ఫారంలోనే హై స్కూల్, కాలేజీ, హాస్టల్ ఏర్పాటు చేస్తే చుట్టుపక్కల గ్రామాల విద్యార్థుల కష్టాలు గణనీయంగా తగ్గుతాయని, చదువు మధ్యలోనే మానేయాల్సిన పరిస్థితులు తగ్గిపోతాయని వారు ఆశాభావం వ్యక్తం చేస్తున్నారు.
