రాయలసీమ న్యూస్, మూవీ రివ్యూస్ డెస్క్:
రివ్యూ‘ఎపిక్: ఫస్ట్ సెమిస్టర్’ – న్యూ ఏజ్ లవ్ డ్రామా ప్రయాణం ఎలా ఉంది?
‘బేబీ’తో హిట్ జోడీగా గుర్తింపు పొందిన ఆనంద్ దేవరకొండ, వైష్ణవి చైతన్య మరోసారి జంటగా నటించిన చిత్రం ‘ఎపిక్: ఫస్ట్ సెమిస్టర్’. ‘#90s’ వెబ్ సిరీస్తో ప్రత్యేక గుర్తింపు తెచ్చుకున్న దర్శకుడు ఆదిత్య హాసన్ ఈ చిత్రానికి రచన, దర్శకత్వం వహించారు. సూర్యదేవర నాగవంశీ, సాయి సౌజన్య సంయుక్తంగా నిర్మించిన ఈ న్యూ ఏజ్ లవ్ డ్రామా సెప్టెంబర్ 11న ప్రేక్షకుల ముందుకు వచ్చింది.
‘#90s - ఎ మిడిల్ క్లాస్ బయోపిక్’ ప్రపంచం నుంచే ఈ చిత్ర కథ ప్రారంభమవుతుంది. ఆ కుటుంబంలో చిన్నవాడైన ఆదిత్య (ఆనంద్ దేవరకొండ) సినిమా దర్శకుడు కావాలనే కలతో జీవించే యువకుడు. మధ్యతరగతి కుటుంబాల ‘ప్లాన్-బి’ ఆలోచనలలో భాగంగా పై చదువుల కోసం లండన్ వెళ్లాల్సి వస్తుంది. అక్కడ కూడా అతని మనసు మొత్తం సినిమా ఆలోచనలతోనే నిండి ఉంటుంది.
ఆదిత్య చేరిన విశ్వవిద్యాలయంలో తెలుగమ్మాయి కడలి (వైష్ణవి చైతన్య) పరిచయం అవుతుంది. తొలి రోజే ఇద్దరూ దగ్గరవుతారు. ఆ తర్వాత సహజీవనం మొదలవుతుంది. వేర్వేరు నేపథ్యాల నుంచి వచ్చిన ఈ ఇద్దరి మధ్య బంధం ఎక్కడివరకు వెళ్లింది? ఇంకా జీవితంలో స్థిరపడని ఆదిత్య ప్రేమ, పెళ్లి విషయంలో ఎలాంటి నిర్ణయాలు తీసుకున్నాడు? తల్లిదండ్రుల ఒత్తిడికి కడలి తలొంచిందా? ఇవన్నీ తెరపై చూసి తెలుసుకోవాల్సిన అంశాలుగా చిత్ర బృందం మలిచింది.
నవతరం ఆధునిక జీవనశైలి, యువత మధ్య బంధాలు, గందరగోళాలు, కుటుంబం–సమాజం నుంచి వచ్చే ఒత్తిళ్లను ఈ చిత్రం ఆవిష్కరిస్తుంది. దీన్ని సాంప్రదాయ ప్రేమకథగా, లేదా సహజీవనంపై మాత్రమే నిలిచే కథగా కాకుండా, ఒక జంటకు ఎదురైన వాస్తవ పరిస్థితుల ప్రయాణంగా దర్శకుడు చూపించారు. ఈ కారణంగా సగటు సినిమాల్లో కనిపించే భిన్న పార్శ్వాలు, ఆసక్తిని రేకెత్తించే విరామాలు, సుఖాంతమైన ముగింపు వంటి అంశాలు ఇక్కడ పెద్దగా కనిపించవు.
సమాజంలోని కులాల పట్టింపులు, అమ్మాయిలు శారీరకంగా–సామాజికంగా ఎదుర్కొనే సమస్యలు, అబ్బాయిలు భరించే ఒత్తిళ్లు వంటి విషయాలను దర్శకుడు పైపైనే స్పృశిస్తూ ఆలోచింపజేసే ప్రయత్నం చేశారు. ‘#90s’ ప్రపంచం నుంచి ఆదిత్య కుటుంబాన్ని, లెక్కల మాస్టర్ చంద్రశేఖర్ ఇంటి మధ్యతరగతి కష్టాలను పరిచయం చేస్తూ కథ ముందుకు సాగుతుంది. తండ్రి చీవాట్లు, స్నేహితుల ప్రోత్సాహం మధ్య ఆదిత్య ప్రయాణం సరదాగా నడుస్తుంది.
లండన్ చేరిన తర్వాత నాయక–నాయికల పరిచయం, తొలి రోజే ఒకే గదిని పంచుకోవడం, ఆ గదిని ఇచ్చిన స్నేహితుడు ఆశ్చర్యపడే సన్నివేశాలు, సంభాషణలు మంచి హాస్యాన్ని పంచుతాయి. ఊర్లో ఉన్న స్నేహితుడితో ఆదిత్య ప్రతి సారి మాట్లాడే సన్నివేశాలు కూడా నవ్వులు పండిస్తాయి. ప్రథమార్ధంలో అమ్మాయిలకు సొంత ఇంటి నుంచే వచ్చే ఒత్తిళ్లను, ద్వితీయార్ధంలో “అబ్బాయిల 24 ఏళ్లు, అమ్మాయిల 24 ఏళ్లు ఒకటి కావు” అన్న భావనతో కుర్రాళ్ల సంఘర్షణను చూపించిన తీరు చిత్రానికి బలం కలిగించే అంశంగా నిలిచింది.
అయితే నాయక–నాయికల ప్రేమ ప్రయాణం, ఆదిత్య తన తల్లిదండ్రులు, స్నేహితుడితో చేసే సంభాషణలే ప్రధానంగా ఉండటంతో కథ కొంత పళచగా, అక్కడక్కడే తిరుగుతున్నట్టుగా అనిపించే సందర్భాలు ఉన్నాయి. ‘#90s’ సిరీస్ ఇంటిల్లిపాదీ కలిసి చూసేలా ఉండగా, ఈ చిత్రం మాత్రం పెద్దలకే అనువైన అంశాలతో సాగుతుంది. పతాక సన్నివేశాలు కూడా కథను అసంపూర్ణంగా చెప్పిన భావనను కలిగిస్తాయి. కొన్ని సన్నివేశాలు ‘సఖి’, ‘ఓకే బంగారం’ వంటి చిత్రాలను గుర్తు చేస్తాయి.
ఆదిత్య, కడలి పాత్రల్లో ఆనంద్ దేవరకొండ, వైష్ణవి చైతన్య నటనలో పరిణతి కనిపిస్తుంది. అమాయకత్వం నిండిన పాత్రల్లో సహజంగా కనిపించే ఆనంద్ ఈసారి కూడా అదే మోతాదును మరింతగా చూపించాడు. ‘బేబీ’ తర్వాత మరింత గాఢత ఉన్న పాత్రలో వైష్ణవి ఒదిగిపోయిన తీరు ఆకట్టుకుంటుంది. శివాజీ, వాసుకి పోషించిన తల్లిదండ్రుల పాత్రలు పరిమిత సన్నివేశాలున్నా సినిమాపై బలమైన ప్రభావం చూపాయి. కల్యాణ్ శంకర్ స్నేహితుడు సింజిత్గా, శ్రీనివాస్ గవిరెడ్డి మనోజ్గా కనిపించిన ప్రతిసారీ హాస్యాన్ని పంచారు.
సాంకేతికంగా హేషమ్ అబ్దుల్ వాహబ్ సంగీతం, నేపథ్య సంగీతం, అజీమ్ మహ్మద్ విజువల్స్ చిత్రానికి ప్రధాన ఆకర్షణగా నిలిచాయి. నవీన్ నూలి ఎడిటింగ్, నిర్మాణ విలువలు కూడా ఉన్నతంగా కనిపించాయి. ఆదిత్య హాసన్ రాసిన సంభాషణలు బలంగా ఉన్నప్పటికీ, రెండు సెమిస్టర్లుగా కథను చెప్పాలనే ప్రయత్నంలో దాన్ని పూర్తిగా మలచలేకపోయిన భావన కలుగుతుంది.
మొత్తానికి, ‘ఎపిక్: ఫస్ట్ సెమిస్టర్’లో ప్రథమార్ధం, హాస్యం, నటీనటుల నటన బలాలుగా నిలిస్తే, సాగదీతగా అనిపించే సన్నివేశాలు, అసంపూర్ణంగా కనిపించే కథ బలహీనతలుగా మారాయి. సబ్జెక్ట్ ఎంపిక, చెప్పిన తీరు వల్ల ఈ చిత్రం అందరికీ కాకుండా, పాత్రల ప్రయాణంతో మమేకమై చూడగల ప్రేక్షకులకు మాత్రమే ఎక్కువగా నచ్చేలా ఉంది.
గమనిక: ఈ సమీక్ష సమీక్షకుడి వ్యక్తిగత అభిప్రాయం మాత్రమే.
రేటింగ్:- 2/5
