రాయలసీమ న్యూస్, మూవీ రివ్యూస్ డెస్క్:
రివ్యూ:- ‘మహేంద్రగిరి వారాహి’.. భక్తి మిస్టరీకి థ్రిల్
‘అనగనగా’, ‘న్యూటన్స్ థర్డ్లా’ విజయాల తర్వాత కథానాయకుడు సుమంత్ నటించిన తాజా చిత్రం ‘మహేంద్రగిరి వారాహి’ ప్రేక్షకుల ముందుకు వచ్చింది. గతంలో సుమంత్తో ‘సుబ్రహ్మణ్యపురం’ వంటి భక్తి థ్రిల్లర్ తెరకెక్కించిన దర్శకుడు సంతోష్ జాగర్లపూడి ఈ చిత్రాన్ని రూపొందించారు. ప్రచార చిత్రాలు ఆసక్తికరంగా ఉండటంతో సినిమాపై మంచి అంచనాలు ఏర్పడ్డాయి. ఆ అంచనాలను సినిమా ఎంతవరకు నెరవేర్చిందన్నది ఇప్పుడు పరిశీలించాల్సిన అంశం.
కథ పరంగా చూస్తే.. సిద్ధార్థ్ (సుమంత్) ఓ యూట్యూబర్. దేవుడు, దెయ్యాలు, మూఢనమ్మకాలపై నమ్మకం లేని అతడు, ప్రజలను మోసం చేసే బాబాల బండారాలను తన యూట్యూబ్ ఛానల్ ద్వారా బహిర్గతం చేస్తూ చైతన్యం కలిగించే ప్రయత్నం చేస్తుంటాడు. ఈ క్రమంలో అతని సోదరుడు రాజీవ్ (కమల్ కామరాజు) పెళ్లి నిశ్చయమవుతుంది. జాతకంలో అపమృత్యు దోషం ఉన్నట్లు తెలిసి, వారాహి అమ్మవారికి ప్రత్యేక పూజలు చేయాలని పూజారి సూచించడంతో, కుటుంబం విజయనగరం సమీపంలోని మహేంద్రగిరి ఆలయానికి చేరుతుంది.
పూజలు పూర్తయ్యాక రాజీవ్తో పాటు మహేంద్రగిరి రాజవంశీకుడు నాగేంద్రవర్మ (వంశీ చాగంటి) అకస్మాత్తుగా మరణిస్తారు. ఇదే సమయంలో మహేంద్రగిరి రాజవంశానికి సంబంధించిన ఓ ఆసక్తికరమైన విషయం సిద్ధార్థ్కి తెలుస్తుంది. గత 150 ఏళ్లుగా ఆ కుటుంబంలో పుట్టిన ప్రతి మగబిడ్డ తన 33వ పుట్టినరోజు నాడు ప్రమాదవశాత్తూ చనిపోతున్నాడని, అది వారాహి అమ్మవారి శాపమని ఊరి ప్రజలు నమ్ముతుంటారు. ఈ వరుస మరణాల వెనకున్న రహస్యాన్ని ఛేదించేందుకు సిద్ధార్థ్ రంగంలోకి దిగడం, ఆ తర్వాత జరిగే పరిణామాలే మిగతా కథ.
ఓ ఊరు, ఓ రాజవంశం, ఆ కుటుంబం చేసిన పొరపాటు, దాని ఫలితంగా దైవాగ్రహానికి గురై వంశంలోని మగవాళ్లు వరుసగా చనిపోవడం వంటి కథా నిర్మాణం వినగానే మహేశ్బాబు నటించిన ‘మురారి’ సినిమా గుర్తుకు రావడం సహజం. దర్శకుడు సంతోష్ ఈ చిత్రాన్ని ప్రారంభించిన తీరు, కథను ముందుకు నడిపిన విధానం కూడా ఆ ఛాయల్ని గుర్తు చేస్తుంది. అయితే 33వ జన్మతిథి నాడు జరిగే మరణాలకు ఆయన అల్లిన ప్రతీకార నేపథ్యం ఈ సినిమాకి కొంత కొత్తదనాన్ని తీసుకొచ్చింది.
వారాహి అమ్మవారి నేపథ్యం, మహేంద్రగిరి సంస్థాన చరిత్ర, ఆ కుటుంబంలో జరిగే వరుస చావులను పరిచయం చేస్తూ దర్శకుడు సినిమాను గ్రిప్పింగ్గా మొదలుపెట్టారు. రాజేంద్రవర్మగా సిద్ధు జొన్నలగడ్డను పరిచయం చేసిన తీరు, ఆ పాత్ర చుట్టూ నడిచే డ్రామా కథలో సంఘర్షణను పెంచుతుంది. హీరో కుటుంబం మహేంద్రగిరిలోకి అడుగుపెట్టిన దగ్గర నుంచి కథ వేగం పుంజుకుంటుంది. హీరో సోదరుడి మరణం, విరామ ఘట్టాలు ద్వితీయార్ధంపై అంచనాలను పెంచుతాయి.
సెకండాఫ్లో హీరో చేసే అన్వేషణ ఆసక్తికరంగానే మొదలవుతుంది. కానీ కథ ముందుకు సాగే కొద్దీ థ్రిల్ కొంత తగ్గిన భావన కలుగుతుంది. హీరో పెద్దగా కష్టపడకుండానే ప్రశ్నలకు సమాధానాలు తేలికగా దొరకడం, హీరో అన్నకు మహేంద్రగిరి వంశంతో ఉన్న లింక్ ఊహించదగ్గదిగా ఉండడం వల్ల ఆశ్చర్యం తగ్గుతుంది. అయితే శాపం వెనకున్న అసలు నిజాలు బయటపడే సన్నివేశాలు భావోద్వేగభరితంగా ఉంటాయి. వారాహి అమ్మవారు తన పేరుతో, తన కళ్ల ముందే హత్యలు జరుగుతున్నా హీరో వచ్చే వరకు మౌనంగా ఎందుకు ఉండిపోయిందన్న ప్రశ్న మాత్రం ప్రేక్షకుల మనసులో మిగిలిపోతుంది.
ప్రీక్లైమాక్స్లోని ట్విస్ట్లు, బ్రహ్మానందం, వెన్నెల కిశోర్, రాజీవ్ కనకాల పాత్రలకు ఇచ్చిన మలుపులు థ్రిల్ కలిగిస్తాయి. సినిమాను ముగించిన తీరు ఫర్వాలేదనిపిస్తుంది.
నటీనటుల విషయానికి వస్తే.. సిద్ధార్థ్ పాత్రలో సుమంత్కి నటుడిగా పెద్ద సవాళ్లు లేకపోయినా, తనకు అలవాటైన శైలిలో ఆకట్టుకున్నారు. సిద్ధు జొన్నలగడ్డ, ఐశ్వర్య రాజేశ్, మాళవిక నాయర్ పోషించిన పాత్రలు కథపై బలమైన ప్రభావం చూపాయి. వారాహి గుడి పూజారిగా బ్రహ్మానందం నటనలో కొత్త కోణం కనిపించింది. క్లైమాక్స్లో ఆయనతో పాటు రాజీవ్ కనకాల, వెన్నెల కిశోర్ పాత్రలకు ఇచ్చిన ట్విస్ట్ బాగుంది. మంజు భార్గవి, మీనాక్షి గోస్వామి, వంశీ చాగంటి, శ్రీనివాస్ వడ్లమాని, నిత్యాశెట్టి తదితరుల పాత్రలు సరాసరి స్థాయిలో ఉన్నాయి.
సాంకేతికంగా అనూప్ రూబెన్స్ సంగీతం చిత్రానికి ప్రధాన ఆకర్షణ. టైటిల్ గీతాన్ని బ్యాక్గ్రౌండ్ మ్యూజిక్గా వినియోగించిన తీరు బాగుంది. విజువల్స్, ఆర్ట్ వర్క్ కూడా కథకు తగ్గట్టుగా ఉన్నాయి. దర్శకుడు సంతోష్ రాసుకున్న కథ, కథనాల్లో పెద్ద కొత్తదనం లేకపోయినా, ప్రీక్లైమాక్స్, క్లైమాక్స్ భాగాలు థ్రిల్ పంచుతాయి.
మొత్తానికి ‘మహేంద్రగిరి వారాహి’ డివోషనల్ మిస్టరీ జానర్లో ఫర్వాలేని థ్రిల్ పంచే సినిమా అని చెప్పొచ్చు.
గమనిక: ఈ సమీక్ష సమీక్షకుడి వ్యక్తిగత అభిప్రాయం మాత్రమే.
రేటింగ్:-2.75/5
