రాయలసీమ న్యూస్, ఎంటర్టైన్మెంట్ డెస్క్: సూర్య హీరోగా, టాలీవుడ్ టాలెంటెడ్ దర్శకుడు వెంకీ అట్లూరి దర్శకత్వంలో రూపొందిన తాజా చిత్రం ‘విశ్వనాథ్ అండ్ సన్స్’ ప్రేక్షకుల ముందుకు వచ్చింది. మమితా బైజు హీరోయిన్గా నటించిన ఈ సినిమాను సితార నాగవంశీ అత్యంత ప్రతిష్ఠాత్మకంగా నిర్మించారు. ఈ సినిమా నుంచి విడుదలైన టీజర్లు, ట్రైలర్, పాటలు వంటి ప్రమోషనల్ కంటెంట్ అన్నీ మంచి స్పందన తెచ్చుకోవడంతో, చిత్రంపై అంచనాలు పెరిగాయి.
గతంలో తెలుగు సినిమాలు తీసి తమిళంలో డబ్ చేయగా, అక్కడ పెద్దగా స్పందన రాకపోవడంతో ఈసారి నిర్మాత సితార నాగవంశీ, దర్శకుడు వెంకీ అట్లూరి వ్యూహం మార్చారు. ముందుగా తమిళంలో చిత్రాన్ని రూపొందించి, తరువాత తెలుగులో డబ్ చేశారు. ఈ ప్రయోగం ఎలా పనిచేసిందన్న ఆసక్తి మధ్యే చిత్రం విడుదలైంది.
కథ సంగతులు
సంజయ్ విశ్వనాథ్ (సూర్య) ఒక బిజీ బిజినెస్మ్యాన్. ఒలింపిక్స్లో మెడల్ సాధించి తన తల్లి (రాధికా శరత్కుమార్) కోరికను నెరవేర్చిన అతను, ఆమె మరో కోరిక అయిన తన పెళ్లిని మాత్రం నెరవేర్చలేకపోతూ ఉంటాడు. చిన్నప్పటి సంఘటనల కారణంగా పెళ్లే చేయకూడదని నిర్ణయించుకున్న సంజయ్, తల్లి ఎంతగా కోరినా ఆ విషయానికి దగ్గరపడడు. తమ వంశం ఇక్కడితో ఆగిపోతుందేమోనని తల్లి కలిగే బాధను గమనించిన సంజయ్, సరోగసి ద్వారా బిడ్డను కనాలని నిర్ణయించుకుంటాడు.
అయితే ఆ బిడ్డకు అరుదైన బోన్ మ్యారో వ్యాధి ఉన్నట్టు తెలిసి, బోన్ మ్యారో డోనర్గా తప్పనిసరిగా తల్లి కావాల్సిందేనని వైద్యులు చెబుతారు. దీంతో సంజయ్ ఆ సరోగేట్ తల్లిని వెతుక్కుంటూ బయలుదేరుతాడు. ఈ ప్రయాణంలోనే అతనికి మ్యాడీ (మమితా బైజు) పరిచయమవుతుంది. ఆమెను ఇండియాకు తీసుకువచ్చిన తరువాత సంజయ్ జీవితంలో చోటుచేసుకున్న మార్పులు ఏమిటి, ‘విశ్వనాథ్ అండ్ సన్స్’ కథ ఎటువైపు దారితీసింది అనేది పెద్ద తెరపై తెలుసుకోవాల్సిందే.
విశ్లేషణ
సూర్య కెరీర్లో మైలురాయిగా నిలిచిన ‘గజిని’లోని సంజయ్ రామస్వామి, ‘సూర్య సన్నాఫ్ కృష్ణన్’లోని పాత్రలు ఇప్పటికీ అభిమానులకు ప్రత్యేకంగా గుర్తుండే పాత్రలు. ఈ రెండు క్యారెక్టర్ల మేళవింపుతో కథ ఎలా ఉంటుందనే ఆలోచనతోనే ‘విశ్వనాథ్ అండ్ సన్స్’ కథను రాసుకున్నట్టు దర్శకుడు ఒక ఇంటర్వ్యూలో వెల్లడించారు. తెరపై కూడా ఆ ఫీలింగ్ కొంతవరకు కనిపిస్తుంది. తల్లి కోసం ఏదైనా చేయడానికి సిద్ధమయ్యే సూపర్ రిచ్ బిజినెస్మ్యాన్, కానీ పెళ్లి విషయంలో మాత్రం పూర్తిగా వెనుకంజ వేస్తూ ఉండే వ్యక్తిత్వాన్ని దర్శకుడు నెమ్మదిగా విప్పిచూపించారు.
అలాంటి వ్యక్తి జీవితంలో ఎలాంటి బాదరబందీలు లేని ఓ అమ్మాయి ప్రవేశించి, అతని మీద ఆసక్తి చూపించి, పెళ్లికి సిద్ధమైతే ఏమవుతుందనే లైన్పై కథ నడుస్తుంది. హీరో–హీరోయిన్ల మధ్య దాదాపు 20 ఏళ్ల వయసు తేడా ఉన్న ప్రేమను ప్రేక్షకులకు నమ్మదగ్గలా చూపించడంలో దర్శకుడు సఫలీకృతుడయ్యారు. ఎక్కడా తార్కికత దెబ్బతినకుండా, స్మూత్గా కథను ముందుకు తీసుకెళ్లే ప్రయత్నం స్పష్టంగా కనిపిస్తుంది.
ఫస్ట్ హాఫ్ మొత్తం సాఫీగా, తేలికపాటి హాస్యంతో, మధ్య మధ్యలో భావోద్వేగాలతో సాగుతుంది. కొన్ని సన్నివేశాలు కళ్లను తడిపేలా ఉంటాయి. ఇంటర్వెల్ తరువాత కథలో అకస్మాత్తుగా మలుపు తిరిగినా, అప్పటివరకు సైలెంట్గా కనిపించిన హీరోతో ఊహించని పనులు చేయించినా, అవి కూడా కథలోనే పుట్టినట్లుగా, తార్కికంగా ఉండటం గమనార్హం. సెకండ్ హాఫ్లో కొద్దిగా లాగ్ ఫీలింగ్ ఉన్నా, క్లైమాక్స్ను హ్యాపీ, ముందే ఊహించగలిగే విధంగానే ముగించినా, మొత్తం మీద సంతృప్తిని ఇస్తుంది.
కథ కొత్తదేమీ కాకపోయినా, ట్రీట్మెంట్లో కొంత తాజాదనం ఉంది. ఇలాంటి లైన్తో వచ్చిన సినిమాలు ముందే ఉన్నా, వాటి ముద్ర పడకుండా, తనదైన శైలిలో వెంకీ అట్లూరి రాసుకున్న సన్నివేశాలు ఆకట్టుకుంటాయి. ఫస్ట్ హాఫ్ స్వీట్, సింపుల్గా ఉంటే, సెకండ్ హాఫ్ కొంచెం నెమ్మదిగా అనిపించినా, చివరికి క్లైమాక్స్ ఆ లోపాన్ని మర్చిపోయేలా చేస్తుంది.
ఈ మధ్యకాలంలో ఫోన్కి దూరంగా కూర్చొని పూర్తిగా చూసేయగలిగే సినిమాల్లో ‘విశ్వనాథ్ అండ్ సన్స్’ ఒకటిగా నిలుస్తుంది. ఒక మంచి మూమెంట్, ఒక అందమైన షాట్, లేదా ఏదో ఒక నటుడి హావభావం మిస్ కాకూడదనిపించేలా సన్నివేశాలు నడుస్తాయి.
నటన, సాంకేతిక నిపుణులు
సంజయ్ పాత్రలో సూర్య పరకాయ ప్రవేశం చేశాడు. తన వయసుకు తగ్గ పాత్రలో ఒదిగిపోయి, భావోద్వేగ సన్నివేశాల్లోనూ, తేలికపాటి హాస్య సన్నివేశాల్లోనూ సమానంగా మెప్పించాడు. మమితా బైజు తనకు సుపరిచితమైన తరహా పాత్రలోనే కనిపించినా, ఈసారి నవ్వించడమే కాకుండా భావోద్వేగాన్ని కూడా అందించేలా నటించింది. రాధికా శరత్కుమార్, రవీనా టాండన్ సహా మిగతా నటీనటులందరూ తమ పాత్రల పరిధిలో చక్కగా నటించారు. హాస్యంతో పాటు భావోద్వేగాన్ని కలిపిన సన్నివేశాల్లో అందరూ తమ వంతు న్యాయం చేశారు.
టెక్నికల్గా చూస్తే, ఈ సినిమాకి దర్శకుడు వెంకీ అట్లూరి మరో హీరోలా నిలిచాడు. తన సింపుల్, హార్ట్ టచింగ్ రైటింగ్తో ప్రేక్షకులను బోర్ అనిపించకుండా, నవ్విస్తూ, కన్నీళ్లు తెప్పించే సన్నివేశాలతో తన మార్క్ను మరోసారి చూపించాడు. నేపథ్య సంగీతం సన్నివేశాలకు తగ్గట్టుగా పనిచేసింది. పాటలు తెరపై బాగున్నాయి. సినిమాటోగ్రఫీ ఆకట్టుకునేలా ఉంది. నిర్మాణ విలువలు అత్యున్నతంగా కనిపిస్తున్నాయి; ప్రతి షాట్లోనూ ఖర్చు స్పష్టంగా కనిపిస్తుంది. నిడివి విషయంలో కొంచెం జాగ్రత్త తీసుంటే ఇంకా బాగుండేదనే భావన కలుగుతుంది.
ముగింపుగా
‘విశ్వనాథ్ అండ్ సన్స్’ క్లీన్ ఫ్యామిలీ ఎమోషనల్ ఎంటర్టైనర్. సున్నితమైన భావోద్వేగాలు, తేలికపాటి హాస్యం, మంచి నటనలతో కూడిన ఈ చిత్రం కుటుంబంతో కలిసి చూడదగిన సినిమాగా నిలుస్తుంది.
రేటింగ్ 3/5
గమనిక: ఈ సమీక్ష సమీక్షకుడి దృష్టికోణానికి సంబంధించినది. ఇది సమీక్షకుడి వ్యక్తిగత అభిప్రాయం మాత్రమే
