రాయలసీమ న్యూస్, మూవీ రివ్యూస్ డెస్క్: హిందీ చిత్రం ‘ది వన్: ఫోర్స్ ఆఫ్ ది ఫారెస్ట్’ శుక్రవారం ప్రేక్షకుల ముందుకు వచ్చింది. సిద్ధార్థ్ మల్హోత్రా, తమన్నా జంటగా నటించిన ఈ ఫాంటసీ థ్రిల్లర్పై విడుదలకు ముందు నుంచే ఆసక్తి నెలకొంది. అయితే థియేటర్లోకి వెళ్లిన తర్వాత ఆ ఆసక్తి ఎంతవరకు నిలబడిందన్నది ఇప్పుడు చర్చనీయాంశంగా మారింది.
దేవాంచల్కు చెందిన రిషి (సిద్ధార్థ్ మల్హోత్రా), అతని భార్య మమత (తమన్నా) ముంబయిలో నివసిస్తుంటారు. పెళ్లయి ఆరేళ్లు గడిచినా సంతానం కలగకపోవడంతో ఇద్దరూ తీవ్ర మనోవేదనలో ఉంటారు. ఎన్నో ప్రయత్నాలు విఫలమైన తర్వాత చివరికి ఐవీఎఫ్ విధానాన్ని ఆశ్రయించాలని నిర్ణయించుకుంటారు. అయితే అది భారీ ఖర్చుతో కూడుకున్నందున డబ్బు కోసం తంటాలు పడుతుంటారు.
ఈ సమయంలో దేవాంచల్లోని అటవీ ప్రాంతంలో రిషికి ఉన్న భూమిని రోడ్డు అభివృద్ధి కోసం ఇవ్వాలని ప్రభుత్వం ప్రతిపాదిస్తుంది. భూమి విలువకు ఐదు రెట్లు ఇస్తామని చెప్పడంతో ఆ డబ్బుతో ఐవీఎఫ్ చేయించుకోవచ్చని భావించి రిషి, మమత స్వగ్రామానికి బయలుదేరుతారు. ఆ ఊరిలో అడవి మధ్యలో ఉన్న అమ్మవారి గుడిని ‘వనదేవత’గా కొలుస్తారు. సూర్యాస్తమయం తర్వాత ఆ అడవిలోకి ఎవరూ వెళ్లకూడదనే కట్టుబాటు ఉంది. వెళ్తే తిరిగి రారని గ్రామస్తుల నమ్మకం.
సొంతూరు చేరిన రిషి తన భూమిని ఇచ్చేశాడా? అనుకోని పరిస్థితుల్లో అడవిలోకి అడుగుపెట్టిన అతనికి ఎలాంటి సంఘటనలు ఎదురయ్యాయి? ఆ అడవి వెనుక దాగి ఉన్న మర్మం ఏమిటి? దాన్ని రిషి ఎలా ఛేదించాడు? అన్నదే కథా సరళి.
అడవిలో దాగి ఉన్న రహస్యాన్ని కథానాయకుడు ఎలా ఛేదించాడన్న పాయింట్ చుట్టూ ఇప్పటికే అనేక సినిమాలు వచ్చాయి. ‘ది వన్’ కూడా అదే బాటలో నడుస్తుంది. కథలో కొత్తదనం లేకపోవడం, మలుపులు ముందే అంచనా వేసేలా ఉండటం ప్రధాన లోపాలు. ప్రచార చిత్రాలను ఆసక్తికరంగా కట్ చేసినంత శ్రద్ధను అసలు సినిమాకి పెట్టి ఉంటే థ్రిల్ మరింతగా పండేదనే భావన కలుగుతుంది.
ఆరంభంలో వనదేవత పురాణాన్ని రాజు కథ రూపంలో చూపించిన విధానం ఆసక్తికరంగా ఉంటుంది. కానీ అక్కడి నుంచి వర్తమానానికి వచ్చిన తర్వాత కథనం నెమ్మదిగా సాగుతుంది. రిషి–మమతల వ్యక్తిగత జీవితం, వారి బాధను చూపిస్తూ దర్శకుడు దీపక్ కుమార్ మిశ్రా చాలా సమయం తీసుకోవడంతో అసలు పాయింట్ దగ్గరకు వచ్చేసరికి ఇంటర్వెల్ కార్డు పడుతుంది. స్వగ్రామానికి వచ్చిన తర్వాత కథ మొత్తం అడవి చుట్టూ తిరుగుతూనే ఉంటుంది.
రిషి స్నేహితుడు వేద్ ప్రకాశ్ చేసే కామెడీ కొన్ని చోట్ల నవ్వులు పంచినా, మరికొన్ని సన్నివేశాల్లో బలవంతంగా ఇరికించినట్టుగా అనిపిస్తుంది. ద్వితీయార్థంలో అడవిలో మిస్టరీ పెరుగుతుందనుకుంటే, అమృతఫలాలు, వాటిని దక్కించుకునే భూతాలు, భూమి–మనుషులపై వాటి ఆధిపత్యం, వనదేవత విధించే కట్టుబాట్లు ఇలా చందమామ కథలా సాగుతుంది. మధ్యలో నాలుగు పాటలు (ఒక ఐటమ్ సాంగ్ సహా) రావడంతో వేగం మరింత తగ్గుతుంది.
క్లైమాక్స్లో హీరోకు దేవత శక్తులు ఆపాదించి దుష్టశక్తిని అంతం చేయడం వంటి భాగాలు ఇప్పటికే ఎన్నో చిత్రాల్లో చూసినట్టే ఉంటాయి. కొన్ని సన్నివేశాలు చూస్తున్నప్పుడు ప్రేక్షకులకు ‘కాంతార’ గుర్తుకు రావడం సహజం. రిషిగా సిద్ధార్థ్ మల్హోత్రా, మమతగా తమన్నా తమ పాత్రలకు న్యాయం చేశారు. ప్రతినాయకుడిగా సునీల్ గ్రోవర్ భయపెట్టేందుకు ప్రయత్నించినా, బలమైన కథా వస్తువు లేకపోవడంతో అతని పాత్ర ప్రభావం తగ్గిపోయింది. ఇతర నటులు తమ పరిధిలో నటించారు.
సాంకేతికంగా సినిమా సాధారణ స్థాయిలోనే ఉంది. అడవి వాతావరణాన్ని కెమెరా బాగానే అందుకున్నా, నేపథ్య సంగీతం అవసరమైనంత ఉత్కంఠను రేకెత్తించలేకపోయింది. దర్శకుడు దీపక్ కుమార్ మిశ్రా కొత్త కథ చెబుతున్నాననుకుని, తెలిసిన కథనే కొత్త నటీనటులతో మళ్లీ చెప్పినట్టుగా అనిపిస్తుంది.
ఈ చిత్రానికి బలాలుగా నటీనటుల నటన, ఆరంభ సన్నివేశాలు నిలుస్తే, రొటీన్ కథ, ముందుకు సాగని కథనం, బలహీన దర్శకత్వం ప్రధాన లోపాలుగా కనిపిస్తాయి. మొత్తానికి, సూర్యాస్తమయం తర్వాత అడవిలోకి వెళ్లకూడదనే కట్టుబాటు సినిమాలో ఉంటే, థియేటర్కి వెళ్లాలా వద్దా అన్నది ప్రేక్షకుల నిర్ణయం.
గమనిక: ఈ సమీక్ష సమీక్షకుడి దృష్టికోణానికి మాత్రమే సంబంధించినది. ఇది ఆయా సమీక్షకుడి వ్యక్తిగత అభిప్రాయం.
రేటింగ్ : 2/5
