రాయలసీమ న్యూస్, నంద్యాల: నంద్యాల జిల్లా ఆళ్లగడ్డ నియోజకవర్గంలోని పవిత్ర పుణ్యక్షేత్రం అహోబిలంలో ‘అహోబిలం ఇంటిగ్రేటెడ్ ట్రైబల్ డెవలప్మెంట్ ప్రాజెక్ట్’ (AITDP) కార్యక్రమాన్ని ప్రారంభించినట్లు మాజీ మంత్రి భూమా అఖిల ప్రియ రెడ్డి తెలిపారు. రాష్ట్రంలోనే మొట్టమొదటిసారిగా ఈ ప్రాజెక్ట్ను అహోబిలంలో ప్రారంభించడం ఆనందంగా ఉందని ఆమె పేర్కొన్నారు.
చెంచు లక్ష్మీ దేవిని శ్రీ లక్ష్మీ నరసింహ స్వామి వారు వివాహమాడిన పవిత్రమైన ఆధ్యాత్మిక క్షేత్రంగా అహోబిలం ప్రసిద్ధి చెందింది. ఇలాంటి పవిత్ర స్థలంలో చెంచు గిరిజన సోదరుల సంక్షేమ కార్యక్రమాన్ని ప్రారంభించడం విశిష్టమని భూమా అఖిల ప్రియ అభిప్రాయపడ్డారు. చెంచు గిరిజనుల ఆర్థిక, సామాజిక అభ్యున్నతిని లక్ష్యంగా పెట్టుకుని ఈ ప్రాజెక్ట్ రూపుదిద్దుకున్నట్లు ఆమె వివరించారు.
కార్యక్రమం సందర్భంగా చెంచు కుటుంబాలకు 80 శాతం సబ్సిడీతో పలు ఉపాధి పరికరాలను పంపిణీ చేశారు. ఇందులో గొర్రెలు, పాడి గేదెలు, కూరగాయల విత్తనాలు, కుట్టు మిషన్లు వంటి ఉపాధి సాధనాలు ఉన్నాయి. ఈ పరికరాల పంపిణీని భూమా అఖిల ప్రియ స్వయంగా నిర్వహించారు. గిరిజన కుటుంబాలు స్థిరమైన ఆదాయ వనరులు పొందేందుకు, స్వయం సమృద్ధి సాధించేందుకు ఈ పథకాలు ఉపయోగపడతాయని ఆమె ఆశాభావం వ్యక్తం చేశారు.
అడవిని, పర్యావరణాన్ని నమ్ముకుని జీవిస్తున్న గిరిజనుల అభ్యున్నతికి కూటమి ప్రభుత్వం కట్టుబడి ఉందని భూమా అఖిల ప్రియ స్పష్టం చేశారు. గిరిజనుల సామాజిక-ఆర్థిక వికాసం కోసం మరిన్ని సంక్షేమ కార్యక్రమాలను ముందుకు తీసుకెళ్లే దిశగా ప్రభుత్వం పనిచేస్తుందని ఆమె పునరుద్ఘాటించారు.
ఇదే సందర్భంగా భూమా అఖిల ప్రియ రెడ్డి, మంత్రివర్యులు నారా లోకేష్ను మర్యాదపూర్వకంగా కలిసి అహోబిలం బ్రహ్మోత్సవాల ఆహ్వాన పత్రికను అందజేశారు. బ్రహ్మోత్సవాలకు తప్పకుండా హాజరు కావాలని కోరినట్లు ఆమె తన సామాజిక మాధ్యమ ఖాతా ద్వారా వెల్లడించారు.
