రాయలసీమ న్యూస్, ఆళ్లగడ్డ:
డిఎస్సి నియామకాలపై ఆరోపణలు నిరాధారం: మా నియోజకవర్గ యువతపై నీచ రాజకీయాలు మానుకోవాలి
ఆళ్లగడ్డ : డిఎస్సి నియామకాలపై కొందరు చేస్తున్న ఆరోపణలను ఖండిస్తూ, తమ నియోజకవర్గంలో ఎంపికైన అభ్యర్థుల కృషిని అవమానించే ప్రయత్నాలు జరుగుతున్నాయని స్థానిక ప్రజాప్రతినిధి విమర్శించారు. ఐదేళ్లపాటు అధికారంలో ఉన్నప్పటికీ ఒక్క ఉద్యోగం కూడా ఇవ్వలేకపోయిన వారు, ఇప్పుడు డిఎస్సి ద్వారా ఉద్యోగాలు సాధించిన అభ్యర్థులపై అసత్య ప్రచారం చేస్తున్నారని ఆరోపించారు.
డిఎస్సి పరీక్షల్లో విజయాలు సాధించిన అభ్యర్థులు తమ కష్టానికి, ప్రతిభకు ఫలితంగా ఉద్యోగాలు పొందారని, వారి సాధనను 'ఫేక్', 'పేపర్ లీక్' అంటూ అపవాదు మోపడం రాజకీయ దురుద్దేశ్యంతో చేస్తున్న చర్యగా పేర్కొన్నారు. తమ కూటమి ప్రభుత్వం వచ్చిన తర్వాతే నియోజకవర్గంలో ఇలాంటి అవకాశాలు కల్పించబడుతున్నాయని, దీనిని జీర్ణించుకోలేక కొందరు నిరాధార ఆరోపణలకు తెగబడుతున్నారని వ్యాఖ్యానించారు.
పగలు రాత్రి తేడా లేకుండా కష్టపడి, ట్యూషన్లు చెప్పుకుంటూ, ఎన్నో ఇబ్బందులను ఎదుర్కొని స్వశక్తితో ఉద్యోగాలు సాధించిన యువత, ముఖ్యంగా ఆడపిల్లల కృషిని ప్రశ్నించే నైతిక హక్కు ఎవరికీ లేదని స్పష్టం చేశారు. డిఎస్సి అంటే ఏమిటో సరిగా తెలియని వారు కూడా ఇళ్లల్లో కూర్చొని ఆరోపణలు చేయడం సిగ్గుచేటు విషయమని విమర్శించారు.
తాము చేసిన పనిని ప్రజలు గమనిస్తున్నారని, తమ ప్రభుత్వ హయాంలో డిఎస్సి నియామకాల ద్వారా యువతకు అవకాశాలు కల్పించగలిగినందుకు ప్రజలు సాక్షిగా ఉన్నారని తెలిపారు. తమ విజయాలను చూసి కొందరికి కలుగుతున్న అసూయను ప్రజలు కూడా గమనిస్తున్నారని పేర్కొన్నారు.
మా బిడ్డల ఆత్మస్థైర్యాన్ని దెబ్బతీయాలని చేసే ప్రయత్నాలను ఆళ్లగడ్డ ప్రజలు, యువత ఎట్టి పరిస్థితుల్లోనూ సహించరని హెచ్చరించారు. ఇలాంటి కుట్రలను ప్రజలే తిప్పికొట్టి తగిన బుద్ధి చెబుతారని నమ్మకం వ్యక్తం చేశారు.
ఇప్పటికైనా ఇలాంటి మకిలి రాజకీయాలు మానుకోవాలని, లేనిపక్షంలో ప్రజలు ఇప్పటికీ మిగిలి ఉన్న కొద్దిపాటి స్థానాలను కూడా గాలికి వదిలేయడం ఖాయమని హెచ్చరించారు. ప్రజల తీర్పు ముందు అసత్య ఆరోపణలు, తప్పుడు ప్రచారాలు నిలవవని, యువత కృషిని అపహాస్యం చేసే ప్రయత్నాలు చివరికి విఫలమవుతాయని స్పష్టం చేశారు.
