రాయలసీమ న్యూస్, నేషనల్ డెస్క్: ఆధార్ వినియోగదారుల కోసం కేంద్ర ప్రభుత్వం కొత్త సౌకర్యాన్ని అందుబాటులోకి తీసుకొచ్చింది. ఆధార్ కేవైసీ ప్రక్రియను మరింత సులభతరం చేయడంతో పాటు వేగవంతం చేయడానికి యూనిక్యూ ఐడెంటిఫికేషన్ అథారిటీ అఫ్ ఇండియా (UIDAI) కొత్త ఫేస్ అథెంటికేషన్ సిస్టమ్ను ప్రవేశపెట్టింది. ఈ సిస్టమ్ ద్వారా ఆధార్ ఆధారిత సేవలను ఒకే యాప్లో పూర్తి చేసుకునే అవకాశం కలుగనుంది.
ఇప్పటి వరకు ఆధార్ ఫేస్ అథెంటికేషన్ కోసం Aadhaar Face RD వంటి ప్రత్యేక యాప్లను ఉపయోగించాల్సి వచ్చేది. ఇకపై ఆ అవసరం లేకుండా బ్యాంకింగ్, ఇన్సూరెన్స్ వంటి సేవల కోసం వినియోగించే యాప్లలోనే ఆధార్ ఫేస్ అథెంటికేషన్ ఫీచర్ను UIDAI అందుబాటులోకి తీసుకొస్తోంది. దీంతో వినియోగదారులు వేర్వేరు యాప్ల మధ్య మారాల్సిన ఇబ్బంది తప్పనుంది.
ఈ కొత్త ఫీచర్ ద్వారా ఆధార్ ఆధారిత కేవైసీ ప్రక్రియను ఒకే యాప్లో పూర్తి చేయగలిగే విధంగా UIDAI వ్యవస్థను రూపొందించింది. బ్యాంక్ ఖాతా ప్రారంభం, ఇన్సూరెన్స్ పాలసీ కొనుగోలు, ఇతర ఆర్థిక లావాదేవీలకు అవసరమైన డిజిటల్ కేవైసీ ప్రక్రియ ఈ ఫేస్ అథెంటికేషన్ సిస్టమ్తో మరింత వేగంగా పూర్తయ్యే అవకాశం ఉంది.
అలాగే ప్రభుత్వ సంక్షేమ పథకాల కోసం అవసరమైన రిజిస్ట్రేషన్, ధృవీకరణ ప్రక్రియలలో కూడా ఈ ఫీచర్ ఉపయోగపడనుంది. ఆధార్ ఆధారిత గుర్తింపు ధృవీకరణను త్వరితగతిన, భద్రంగా పూర్తి చేయడం ద్వారా లబ్ధిదారులు పథకాల ప్రయోజనాలను సులభంగా పొందగలరని అధికార వర్గాలు సూచిస్తున్నాయి.
ఈ ఫేస్ అథెంటికేషన్ సిస్టమ్లో ఆర్టిఫిషల్ ఇంటలిజెన్స్ , మెషిన్ లెర్నింగ్ ఆధారిత లైవ్నెస్ డిటెక్షన్ ఫీచర్లను UIDAI అమలు చేసింది. ఈ లైవ్నెస్ ఫీచర్లు వినియోగదారుడు నిజంగా కెమెరా ముందు ఉన్నాడో లేదో గుర్తించగలవు. దీంతో నకిలీ ఫోటోలు, ముందుగా రికార్డు చేసిన వీడియోల ద్వారా చేసే మోసాలను అరికట్టే అవకాశం పెరుగుతుంది.
ఆధార్ ఆధారిత సేవల్లో భద్రతా ప్రమాణాలను పెంచడంతో పాటు వినియోగదారుల అనుభవాన్ని మెరుగుపరచడం లక్ష్యంగా UIDAI ఈ కొత్త ఫేస్ అథెంటికేషన్ సిస్టమ్ను రూపొందించినట్లు అధికారిక సమాచారం సూచిస్తోంది. దేశవ్యాప్తంగా బ్యాంకింగ్, ఇన్సూరెన్స్, ఇతర ఆర్థిక సేవల యాప్లు ఈ ఫీచర్ను దశలవారీగా అమలు చేసే అవకాశం ఉంది.
