రాయలసీమ న్యూస్, నేషనల్ డెస్క్: ఒడిశాలోని ఒక చిన్న గ్రామం నుంచి వచ్చిన ఐశ్వర్య రుతుపర్ణ ప్రధాన్, దేశంలోనే తొలి ట్రాన్స్ జెండర్ IAS అధికారిగా గుర్తింపు పొందారు. చిన్న వయసులోనే లింగ గుర్తింపు కారణంగా అనేక సామాజిక సమస్యలు, అవమానాలు ఎదుర్కొన్న ఆమె, వాటిని తట్టుకుని ముందుకు సాగిన కథ నేటి యువతకు ఆదర్శంగా నిలుస్తోంది.
ఐశ్వర్య రుతుపర్ణ ప్రధాన్ చిన్నప్పటి నుంచే స్కూల్లో తోటి విద్యార్థుల విమర్శలు, వేధింపులు ఎదుర్కొన్నప్పటికీ చదువును మాత్రం ఎప్పుడూ వదిలిపెట్టలేదు. కుటుంబ పరిస్థితులు, సామాజిక ఒత్తిళ్ల మధ్య కూడా విద్యనే ఆయుధంగా ఎంచుకుని తన ప్రయాణాన్ని కొనసాగించారు.
ఉన్నత విద్యలో భాగంగా ఆమె పబ్లిక్ అడ్మినిస్ట్రేషన్‌లో పీజీ పూర్తి చేశారు. అనంతరం న్యూఢిల్లీ లోని ఇండియన్ ఇన్స్టిట్యూట్ అఫ్ మాస్ కమ్యూనికేషన్ లో ఇంగ్లిష్ జర్నలిజం కోర్సు చేశారు. పరిపాలన, మీడియా రంగాల్లో ఇరువైపులా అవగాహన పెంపొందించుకోవడం ఆమె లక్ష్యంగా పెట్టుకున్నారు.
2010లో ఐశ్వర్య రుతుపర్ణ ప్రధాన్, ఒడిశా ఫైనాన్సియల్ సర్వీస్ పరీక్షను విజయవంతంగా పూర్తి చేశారు. ఆ తర్వాత కమర్షియల్ ట్యాక్స్ ఆఫీసర్‌గా సేవలు అందించారు. ప్రభుత్వ వ్యవస్థలో కీలక బాధ్యతలు చేపట్టి, తన పనితీరుతో సహచరుల ప్రశంసలు అందుకున్నారు.
సాంప్రదాయంగా పురుషులు, మహిళలకే పరిమితమై ఉన్న ప్రభుత్వ ఉన్నత సేవల్లో ట్రాన్స్ జెండర్ వ్యక్తిగా ఐశ్వర్య ప్రవేశం, దేశవ్యాప్తంగా చర్చనీయాంశమైంది. ఆమె సాధించిన ఈ విజయంతో ట్రాన్స్ జెండర్ సమాజానికి కొత్త దారులు తెరుచుకున్నాయని సామాజిక వర్గాలు భావిస్తున్నాయి.
ఐశ్వర్య రుతుపర్ణ ప్రధాన్ ప్రయాణం నేటి యువతకు, ముఖ్యంగా ట్రాన్స్ జెండర్ వ్యక్తులకు పెద్ద ప్రేరణగా నిలుస్తోంది. లింగ గుర్తింపు కారణంగా ఎదురయ్యే అడ్డంకులను అధిగమించి, కృషి, పట్టుదలతో లక్ష్యాలను చేరుకోవచ్చని ఆమె జీవితం చూపిస్తోంది. సమాజంలో సమాన హక్కులు, అవకాశాల కోసం పోరాడుతున్న ట్రాన్స్ జెండర్ సముదాయానికి ఆమె విజయం ఒక మైలురాయిగా నిలిచింది.
