రాయలసీమ న్యూస్, నేషనల్ డెస్క్: దేశవ్యాప్తంగా పెండింగ్లో ఉన్న ట్రాఫిక్ చలాన్ల వసూళ్లపై సుప్రీంకోర్టు కీలక సూచనలు చేసింది. కేవలం ఈ-చలాన్లు జారీ చేయడం సరిపోదని, బకాయిల వసూళ్ల కోసం కఠిన చర్యలు తీసుకునే దిశగా ప్రభుత్వాలు, సంబంధిత శాఖలు ముందడుగు వేయాలని సూచించింది.
ట్రాఫిక్ ఉల్లంఘనలపై దేశంలో భారీగా చలాన్లు విధించినప్పటికీ, వాటి వసూళ్లలో తీవ్ర లోటు ఉన్నదని కోర్టు దృష్టికి తీసుకువచ్చారు. ప్రస్తుతం దేశవ్యాప్తంగా సుమారు రూ.45 వేల కోట్ల విలువైన చలాన్లు పెండింగ్లో ఉన్నాయని, అందులో కేవలం రూ.25 వేల కోట్లు మాత్రమే ఇప్పటివరకు రికవరీ అయినట్లు సుప్రీంకోర్టుకు తెలియజేశారు.
ఈ నేపథ్యంలో పెండింగ్ చలాన్ల వసూళ్లను మెరుగుపరచేందుకు ప్రత్యామ్నాయ మార్గాలను పరిశీలించాలని కోర్టు సూచించింది. ముఖ్యంగా, పెండింగ్లో ఉన్న ట్రాఫిక్ చలాన్లను కరెంట్ బిల్లులతో అనుసంధానించే అవకాశాన్ని కూడా పరిశీలించాలనే అభిప్రాయాన్ని వ్యక్తం చేసింది. ఈ విధంగా అనుసంధానం చేస్తే బకాయిల వసూళ్లు సులభతరం కావచ్చని కోర్టు అభిప్రాయపడింది.
అలాగే, వాహన రిజిస్ట్రేషన్, లైసెన్స్, PUC (పాల్యూషన్ అండర్ కంట్రోల్), ఫిట్నెస్ సర్టిఫికెట్లపై ఆంక్షలు విధించడం ద్వారా కూడా చలాన్ల వసూళ్లను పెంచే అవకాశాలపై చర్చ జరిగింది. పెండింగ్ చలాన్లు చెల్లించని వాహన యజమానులపై వాహనాల జప్తు వంటి చర్యలను కూడా పరిశీలించాల్సిన అవసరాన్ని కోర్టు సూచించినట్లు సమాచారం.
ట్రాఫిక్ నియమాల అమలు, రోడ్డు భద్రత, చలాన్ల వసూళ్లలో పారదర్శకత వంటి అంశాలపై సుప్రీంకోర్టు చేసిన ఈ సూచనలతో రాష్ట్ర ప్రభుత్వాలు, ట్రాఫిక్ శాఖలు మరింత కఠిన విధానాల దిశగా అడుగులు వేయాల్సి రావచ్చని న్యాయ వర్గాలు భావిస్తున్నాయి. పెండింగ్ చలాన్ల సమస్యను దీర్ఘకాలికంగా పరిష్కరించేందుకు సమగ్ర విధానాన్ని రూపొందించాలని కోర్టు పరోక్షంగా సంకేతాలు ఇచ్చినట్లు వ్యాఖ్యానాలు వినిపిస్తున్నాయి.
