రాయలసీమ న్యూస్, స్పోర్ట్స్ డెస్క్: మహిళల టీ20 ఆసియా కప్‌లో భారత జట్టు మరోసారి సమరానికి సిద్ధమైంది. గ్రూప్‌-ఎ మ్యాచ్‌లో గురువారం హాంకాంగ్‌ను ఎదుర్కోనుంది. దుబాయ్‌లో జరగనున్న ఈ పోరు రాత్రి 8 గంటలకు ప్రారంభం కానుంది. సోనీ స్పోర్ట్స్‌లో ప్రత్యక్ష ప్రసారం ఉంటుంది.
పొట్టి ఫార్మాట్‌లో ఇప్పటికే మూడు సార్లు ఆసియా టైటిల్‌ను కైవసం చేసుకున్న భారత్‌.. ప్రస్తుత టోర్నీలో థాయ్‌లాండ్‌పై విజయం సాధించి శుభారంభం చేసింది. అయితే ఆ మ్యాచ్‌లో భారత బ్యాటింగ్‌ ఆశించిన స్థాయిలో మెరగలేదు. హర్మన్‌ప్రీత్‌ సేనకు బ్యాటింగ్‌లో ఇంకా మెరుగుదల అవసరమని ఆ మ్యాచ్‌ స్పష్టంగా చూపించింది.
థాయ్‌లాండ్‌పై భారత్‌ 10 ఓవర్లలో 101/2 స్కోరుతో నిలిచిన దశలో.. సులభంగా 200 పరుగులు దాటేలా కనిపించింది. కానీ అనూహ్యంగా తడబడి, చివరి ఏడు వికెట్లను కేవలం 29 పరుగులకే కోల్పోయింది. దీంతో భారత ఇన్నింగ్స్‌ 159 పరుగుల వద్ద ముగిసింది. బౌలింగ్‌ బలం ఉన్నప్పటికీ, బ్యాటింగ్‌లో ఇలాంటి పతనాలు జట్టుకు ప్రమాదకరమని విశ్లేషకులు అభిప్రాయపడుతున్నారు.
పసికూన హాంకాంగ్‌ను ఓడించడం భారత్‌కు పెద్ద సవాలుగా భావించట్లేదు. అయితే ముందున్న పాకిస్థాన్‌తో మ్యాచ్‌ సహా కీలక పోరులకు సిద్ధమవ్వాలంటే, జట్టు తన బ్యాటింగ్‌ సమస్యలను ఇప్పుడే పరిష్కరించుకోవాల్సిన అవసరం ఉంది. స్మృతి, ప్రతీకలు ఇచ్చే ఆరంభాలను పెద్ద స్కోర్లుగా మలచడం కీలకం. కెప్టెన్‌ హర్మన్‌ప్రీత్‌ కౌర్‌ కూడా పరుగుల బాట పట్టి, మధ్యవరుసకు బలం చేకూర్చాలి.
బౌలింగ్‌ విభాగం విషయానికి వస్తే.. స్పిన్నర్లు శ్రీచరణి, దీప్తి శర్మ, పేసర్లు నందని శర్మ, క్రాంతి గౌడ్‌లతో భారత బౌలింగ్‌ దళం బలంగా కనిపిస్తోంది. థాయ్‌లాండ్‌పై మ్యాచ్‌లోనూ బౌలర్లు మంచి ప్రదర్శన కనబరిచారు. హాంకాంగ్‌ బ్యాటర్లను ఒత్తిడిలోకి నెట్టే సామర్థ్యం భారత బౌలింగ్‌కి ఉందని జట్టు వర్గాలు భావిస్తున్నాయి.
ఇండియాకు హాంకాంగ్‌ ఎంతమాత్రం పోటీ ఇస్తుందో చూడాలి. బలహీన ప్రత్యర్థిపై మ్యాచ్‌ను ఉపయోగించుకుని, బ్యాటింగ్‌లో ఉన్న లోపాలను సరిదిద్దుకోవాలని జట్టు యాజమాన్యం లక్ష్యంగా పెట్టుకుంది. ఆసియా కప్‌లో మరోసారి టైటిల్‌ దిశగా పయనించాలంటే, ప్రతి మ్యాచ్‌లోనూ భారత్‌ తన ఆటతీరును మెరుగుపరుచుకోవాల్సిందే.
