రాయలసీమ న్యూస్, స్పోర్ట్స్ డెస్క్: షెంజెన్‌లో జరుగుతున్న చైనా మాస్టర్స్‌ బ్యాడ్మింటన్‌ టోర్నమెంట్‌లో భారత స్టార్‌ షట్లర్‌ కిదాంబి శ్రీకాంత్‌ విజయవంతంగా ప్రస్థానం ప్రారంభించాడు. బుధవారం జరిగిన పురుషుల సింగిల్స్‌ తొలి రౌండ్‌ మ్యాచ్‌లో అతడు చైనీస్‌ తైపీకి చెందిన చి యు జెన్‌పై సూటి సెట్లలో విజయం సాధించాడు.
శ్రీకాంత్‌ 21-16, 21-15 స్కోర్లతో చి యు జెన్‌ను మట్టికరిపించాడు. మ్యాచ్‌ మొత్తం అతడు ఆత్మవిశ్వాసంతో ఆడి ప్రత్యర్థికి పెద్దగా అవకాశం ఇవ్వలేదు. ఈ విజయంతో శ్రీకాంత్‌ రెండో రౌండ్‌కు అర్హత సాధించాడు. అక్కడ అతడు కెనడాకు చెందిన విక్టర్‌ లాయ్‌తో తలపడనున్నాడు.
మరోవైపు భారత నంబర్‌ వన్‌ పురుషుల సింగిల్స్‌ ఆటగాడు లక్ష్యసేన్‌ మాత్రం నిరాశపరిచాడు. తొలి రౌండ్‌ మ్యాచ్‌లో పేలవ ప్రదర్శనతోనే అతడు టోర్నమెంట్‌కు వీడ్కోలు పలికాడు. విక్టర్‌ లాయ్‌తో జరిగిన పోరులో లక్ష్య 14-21, 7-21 స్కోర్లతో ఓటమి పాలయ్యాడు.
తొలి గేమ్‌లో 4-0 ఆధిక్యంతో మంచి ఆరంభం చేసిన లక్ష్య, ఆ తర్వాత తన లయను కోల్పోయాడు. వెంటనే మ్యాచ్‌పై పట్టు సాధించిన లాయ్‌ స్కోరును సమం చేసి, తరువాత పూర్తిగా ఆధిపత్యం చెలాయించాడు. ఏ దశలోనూ లక్ష్యకు తిరిగి మ్యాచ్‌లోకి వచ్చే అవకాశం ఇవ్వకుండా గేమ్‌ను తన నియంత్రణలో ఉంచాడు. రెండో గేమ్‌లో మరింత దూకుడుతో ఆడి లాయ్‌ సులభ విజయాన్ని నమోదు చేశాడు.
గత నెలలో జరిగిన ప్రపంచ ఛాంపియన్‌షిప్‌లో విక్టర్‌ లాయ్‌ కాంస్య పతకం సాధించిన విషయం తెలిసిందే. అతడి చేతిలో లక్ష్యసేన్‌కు ఇది మూడో ఓటమి. ఇప్పటివరకు వీరిద్దరి మధ్య జరిగిన పోరుల్లో లక్ష్య ఒక్కసారి మాత్రమే గెలిచాడు. ఇటీవల ప్రపంచ ఛాంపియన్‌షిప్‌లో కూడా లక్ష్య రెండో రౌండ్‌లోనే నిష్క్రమించిన సంగతి గుర్తుచేసుకోవాల్సి ఉంది. ప్రస్తుతం అతడు పేలవ ఫామ్‌లో ఉన్నాడని ఈ ఫలితాలు సూచిస్తున్నాయి.
మహిళల సింగిల్స్‌లో భారత యువ షట్లర్‌ తన్వి శర్మ బోణీ కొట్టింది. తొలి రౌండ్‌ మ్యాచ్‌లో ఆమె డెన్మార్క్‌ ఆటగాళ్లైన అమైల్‌ షుల్జ్‌పై 21-16, 21-17 స్కోర్లతో విజయం సాధించింది. ఈ విజయంతో తన్వి రెండో రౌండ్‌కు చేరుకుంది. అక్కడ ఆమె జపాన్‌ షట్లర్‌ తొమోకా మియాజకితో పోటీ పడనుంది.
పురుషుల డబుల్స్‌లో సాత్విక్‌ సాయిరాజ్‌, చిరాగ్‌ శెట్టి జంట కూడా రెండో రౌండ్‌కు దూసుకెళ్లింది. తొలి రౌండ్‌లో ఈ ద్వయం మలేసియా జోడీ జునైది ఆరిఫ్‌–కాంగ్‌ కై జింగ్‌లను 21-11, 21-6 స్కోర్లతో చిత్తు చేసింది. మ్యాచ్‌ మొత్తం భారత జంట ఆధిపత్యం చెలాయించి ప్రత్యర్థిని ఏ దశలోనూ గేమ్‌లోకి రానీయలేదు.
మిక్స్‌డ్‌ డబుల్స్‌లో కూడా భారత్‌కు మంచి ఫలితమే లభించింది. ధ్రువ్‌ కపిల, తనీషా క్రాస్టో జంట అలవోకగా రెండో రౌండ్‌కు చేరుకుంది. ఆరంభ రౌండ్‌లో ఈ జోడీ తొనాకోర్న్‌ సేహెంగ్‌, తొనిచా సేహెంగ్‌ ద్వయంపై 21-8, 21-9 స్కోర్లతో ఘన విజయం సాధించింది. అన్ని విభాగాల్లో భారత షట్లర్ల ప్రదర్శనతో చైనా మాస్టర్స్‌లో భారత్‌ ఆశాజనక స్థితిలో కొనసాగుతోంది.
