రాయలసీమ న్యూస్, స్పోర్ట్స్ డెస్క్: భారత స్టార్‌ షట్లర్‌ పీవీ సింధు డెన్మార్క్‌ ఓపెన్‌ బ్యాడ్మింటన్‌ టోర్నమెంట్‌ నుంచి నిష్క్రమించింది. తొలి రౌండ్‌ మ్యాచ్‌లోనే ఆమె ఓటమి చవిచూసింది. మంగళవారం జరిగిన మహిళల సింగిల్స్‌ పోరులో సింధు జర్మనీకి చెందిన యోనె లి చేతిలో పరాజయం పాలైంది.
మూడు గేముల పాటు హోరాహోరీగా సాగిన ఈ మ్యాచ్‌లో సింధు మొదటి గేమ్‌ను 21-13తో గెలుచుకుంది. అయితే రెండో గేమ్‌లో యోనె లి తిరిగి బలంగా పోరాడి 25-23తో గెలిచింది. నిర్ణయాత్మకమైన మూడో గేమ్‌లో కూడా పోరు ఉత్కంఠగా సాగగా, చివరికి యోనె లి 21-19తో గెలుపొందింది. దీంతో సింధు 21-13, 23-25, 19-21తో ఓటమి చెందుతూ టోర్నమెంట్‌కు వీడ్కోలు పలికింది.
ఇక మరో భారత మహిళా షట్లర్‌ తన్వీ శర్మ మాత్రం డెన్మార్క్‌ ఓపెన్‌లో శుభారంభం చేసింది. మహిళల సింగిల్స్‌ తొలి రౌండ్‌లో ఆమె జపాన్‌ ఆటగాడు నత్సుకి నిదైరా పై విజయం సాధించింది. మూడు గేముల పాటు సాగిన ఈ మ్యాచ్‌లో తన్వీ 21-17, 16-21, 21-19తో నిదైరాను ఓడించింది. మొదటి గేమ్‌ను 21-17తో గెలిచిన ఆమె, రెండో గేమ్‌ను 16-21తో కోల్పోయినా, మూడో గేమ్‌లో తిరిగి పుంజుకుని 21-19తో విజయం నమోదు చేసింది.
పురుషుల సింగిల్స్‌ విభాగంలో లక్ష్యసేన్‌ ప్రయాణం తొలి రౌండ్‌ వద్దే ముగిసింది. చైనీస్‌ తైపీకి చెందిన చౌ తీన్‌ చెన్‌ తో జరిగిన మ్యాచ్‌లో లక్ష్యసేన్‌ మూడు గేముల పోరులో ఓటమి చెందాడు. మొదటి గేమ్‌లో 18-21తో వెనుకబడిన అతడు, రెండో గేమ్‌లో 21-13తో గెలిచి మ్యాచ్‌ను సమం చేశాడు. అయితే మూడో గేమ్‌లో చౌ తీన్‌ చెన్‌ 21-15తో పైచేయి సాధించడంతో లక్ష్యసేన్‌ 18-21, 21-13, 15-21తో పరాజయం పాలయ్యాడు.
కిదాంబి శ్రీకాంత్‌ మాత్రం విజయంతో రెండో రౌండ్‌లోకి అడుగుపెట్టాడు. పురుషుల సింగిల్స్‌ తొలి రౌండ్‌లో ఫ్రాన్స్‌ ఆటగాడు అర్నాడ్‌ మెర్కల్‌ ను ఎదుర్కొన్న శ్రీకాంత్‌ రెండు గేములలోనే మ్యాచ్‌ను ముగించాడు. మొదటి గేమ్‌లో 22-20తో గెలిచిన అతడు, రెండో గేమ్‌లో 21-19తో విజయం సాధించాడు. దీంతో శ్రీకాంత్‌ 22-20, 21-19తో మెర్కల్‌ పై విజయం నమోదు చేసి తదుపరి రౌండ్‌కి అర్హత సాధించాడు.
