రాయలసీమ న్యూస్, స్పోర్ట్స్ డెస్క్: దులీప్ ట్రోఫీ సెమీఫైనల్లో ఈస్ట్ జోన్ తరఫున ఆడుతున్న యువ క్రికెటర్ వైభవ్ సూర్యవంశీకి అనుకోకుండా కెప్టెన్సీ బాధ్యతలు వచ్చి చేరాయి. బెంగళూరులో జరుగుతున్న ఈ మ్యాచ్లో ఆదివారం తొలి రోజు ఆటలోనే అతడు తాత్కాలిక సారథిగా వ్యవహరించాడు.
ఇండియన్ ప్రీమియర్ లీగ్లో మెరుపులు చూపించి, 15 ఏళ్లకే అంతర్జాతీయ క్రికెట్లో అరంగేట్రం చేసి చర్చనీయాంశమైన వైభవ్ సూర్యవంశీ.. అదే వయసులో ఫస్ట్ క్లాస్ క్రికెట్లో కూడా కెప్టెన్గా నిలిచాడు. ఈస్ట్ జోన్ రెగ్యులర్ కెప్టెన్ ఇషాన్ కిషన్ వేలికి గాయం కావడంతో 19వ ఓవర్లో మైదానాన్ని వీడాల్సి వచ్చింది. దీంతో వైభవ్ తాత్కాలికంగా జట్టు నాయకత్వం చేపట్టాడు.
కెప్టెన్గా బాధ్యతలు స్వీకరించిన వెంటనే వైభవ్ తీసుకున్న నిర్ణయాలు ఫలించాయి. సెంట్రల్ జోన్ ఇన్నింగ్స్లో ఆర్యన్ జుయల్ 46 పరుగులతో దూకుడుగా ఆడుతున్న సమయంలో, అతడి బ్యాట్కు బంతి దగ్గరగా వెళ్లిన ఓ సందర్భంలో ఈస్ట్ జోన్ బౌలర్లు క్యాచ్ కోసం అప్పీల్ చేశారు. అంపైర్ మాత్రం ఔట్ ఇవ్వలేదు. ఈ నిర్ణయంపై వైభవ్ డీఆర్ఎస్ కోరగా, రీప్లేలో బంతి బ్యాట్ను తాకినట్లు తేలింది. దీంతో ఆర్యన్ జుయల్ ఔట్గా ప్రకటించబడగా, వైభవ్ సూర్యవంశీ సహచరులతో కలిసి సంబరాలు పంచుకున్నాడు.
టాస్ గెలిచిన ఈస్ట్ జోన్ బౌలింగ్ ఎంచుకుంది. సెంట్రల్ జోన్ జట్టును 80.1 ఓవర్లలో 266 పరుగులకే ఆలౌట్ చేసింది. ముకేశ్ కుమార్ 3 వికెట్లు 56 పరుగులకు, అభిజిత్ సర్కార్ 3 వికెట్లు 38 పరుగులకు తీసి సెంట్రల్ బ్యాటింగ్ను కట్టడి చేశారు. 100లోపే నాలుగు వికెట్లు కోల్పోయిన సెంట్రల్ జట్టు తీవ్ర ఒత్తిడిలో పడింది.
కెప్టెన్ రజత్ పాటీదార్ 12 పరుగులకే పెవిలియన్ చేరగా, ఈ దశలో వైస్ కెప్టెన్ రింకు సింగ్ 60 పరుగులతో జట్టును నిలబెట్టాడు. చివర్లో యశ్ ఠాకూర్ 30 నాటౌట్ పరుగులతో సెంట్రల్ జోన్ స్కోరును 266 వరకు తీసుకెళ్లాడు. మహ్మద్ షమి, మహ్మద్ ఖురేషి చెరో రెండు వికెట్లు సాధించారు.
ఈస్ట్ జోన్ రెండో రోజు తమ తొలి ఇన్నింగ్స్ బ్యాటింగ్ ప్రారంభించనుంది. తొలి రోజు ముగిసే సమయానికి మ్యాచ్ ఈస్ట్ జోన్ ఆధిపత్య దిశగా సాగుతున్నట్లు నిపుణుల అభిప్రాయం. యువ కెప్టెన్గా వైభవ్ సూర్యవంశీ తీసుకున్న చురుకైన నిర్ణయాలు, ముఖ్యంగా డీఆర్ఎస్ వినియోగం, క్రికెట్ వర్గాల్లో చర్చనీయాంశంగా మారాయి.
