రాయలసీమ న్యూస్, శ్రీ సత్యసాయి: హిందూపురం మండలం ఎం.బీరేపల్లిలో అప్పుల బారిన పడి ఓ నిరుపేద కుటుంబం ఆత్మహత్యాయత్నానికి పాల్పడిన విషాద ఘటన ఆలస్యంగా వెలుగులోకి వచ్చింది. ఈ ఘటనలో తల్లి, కుమారుడు మృతి చెందగా, కుమార్తె పరిస్థితి విషమంగా ఉన్నట్లు సమాచారం.
పోలీసులు, స్థానికుల కథనం ప్రకారం ఎం.బీరేపల్లికి చెందిన మహాలక్ష్మి (33) పసుపు, కుంకుమ విక్రయిస్తూ కుటుంబాన్ని పోషిస్తోంది. మానసిక రుగ్మతతో బాధపడుతున్న భర్త ముద్దప్ప, చిన్న వయసులో ఉన్న కుమారుడు, కుమార్తెల బాధ్యతలన్నీ మహాలక్ష్మిపైనే పడ్డాయి. కుటుంబ అవసరాల నిమిత్తం తీసుకున్న అప్పులు రోజురోజుకు పెరుగుతుండటంతో ఆమె తీవ్ర ఆర్థిక ఇబ్బందులు ఎదుర్కొంటున్నట్లు తెలిసింది.
ఈ నేపథ్యంలో అప్పుల బారినుంచి బయటపడే మార్గం కనిపించక మహాలక్ష్మి ఆత్మహత్యకు దారితీసే నిర్ణయం తీసుకున్నట్లు పోలీసులు ప్రాథమికంగా భావిస్తున్నారు. సోమవారం మధ్యాహ్నం ఆమె విషపు గుళికలను జ్యూస్లా కలిపి తాను, కుమారుడు రిషిత్ (12), కుమార్తె (14) కలిసి సేవించినట్లు దర్యాప్తులో వెల్లడైంది.
సోమవారం సాయంత్రం ముగ్గురికీ వాంతులు మొదలయ్యాయి. కుటుంబసభ్యులు, పొరుగువారు వారిని స్థానిక ప్రభుత్వ ఆసుపత్రికి తరలించారు. అయితే వైద్యులు దీనిని మొదట కలుషిత ఆహారం తీసుకోవడం వల్ల జరిగినదిగా భావించి చికిత్స అందించారు. చికిత్స పొందుతున్న సమయంలో పరిస్థితి విషమించడంతో మంగళవారం ఉదయం మహాలక్ష్మి ఆసుపత్రిలోనే మృతి చెందింది.
కుమారుడు రిషిత్ను మెరుగైన చికిత్స కోసం మంగళవారం మధ్యాహ్నం అనంతపురం తరలిస్తుండగా, మార్గమధ్యంలో పెనుకొండ వద్ద అతడు మృతి చెందినట్లు సమాచారం. కుమార్తె పరిస్థితి ఆందోళనకరంగా ఉండటంతో ఆమెను కూడా అనంతపురం ఆసుపత్రికి తరలించారు.
అక్కడ చికిత్స పొందుతున్న కుమార్తెకు స్పృహ వచ్చిన తర్వాత సోమవారం జరిగిన విషయాన్ని వైద్యులకు, పోలీసులకు వివరించినట్లు తెలిసింది. దీంతో మంగళవారం సాయంత్రం హిందూపురం గ్రామీణ పోలీసులు సంఘటనపై కేసు నమోదు చేసి దర్యాప్తు ప్రారంభించారు.
ఈ కుటుంబం ఆత్మహత్యాయత్నానికి పాల్పడటానికి అప్పుల సమస్యే ప్రధాన కారణమా? లేక ఇతర వ్యక్తిగత, కుటుంబ కారణాలు ఏమైనా ఉన్నాయా? అనే కోణాల్లో పోలీసులు ఆరా తీస్తున్నారు. మహాలక్ష్మి, రిషిత్ మృతదేహాలను పోస్టుమార్టం నిమిత్తం ప్రభుత్వ ఆసుపత్రికి తరలించారు.
