రాయలసీమ న్యూస్, టెక్నాలజీ డెస్క్: స్మార్ట్‌ఫోన్ ఉన్న వారందరూ ఈ రోజుల్లో యూపీఐ సేవలను విస్తృతంగా వినియోగిస్తున్నారు. చిన్న దుకాణాల నుంచి పెద్ద షాపింగ్ మాల్స్ వరకు ప్రతిచోటా యూపీఐ స్కానర్లు కనిపిస్తున్నాయి. స్కాన్ చేసి కేవలం కొన్ని సెకన్లలోనే చెల్లింపులు చేసే వీలుండటంతో యూపీఐ ట్రాన్సాక్షన్లు భారీగా పెరిగాయి. అయితే ఇప్పటివరకు ఇంటర్నెట్ కనెక్టివిటీ లేకపోతే యూపీఐ ద్వారా చెల్లింపులు చేయడం సాధ్యం కాదు. విమాన ప్రయాణాల సమయంలో, భూగర్భ రైలు నెట్‌వర్క్‌లలో, ఫోన్ సిగ్నల్స్ లేని ప్రాంతాల్లో ఈ సమస్య మరింతగా ఎదురవుతోంది.
ఇలాంటి ఇబ్బందులను అధిగమించేందుకు యూనిఫైడ్ పేమెంట్స్ ఇంటర్‌ఫేస్ సామర్థ్యాన్ని నేషనల్ పేమెంట్స్ కార్పొరేషన్ ఆఫ్ ఇండియా (NPCI) మరింత విస్తరించేందుకు ప్రయత్నిస్తోంది. ఇంటర్నెట్ లేకుండా కూడా వ్యాపారి పాయింట్-ఆఫ్-సేల్ టెర్మినల్ వద్ద వినియోగదారులు చెల్లింపులు చేయగలిగే విధంగా కొత్త ఆఫ్‌లైన్ టెక్నాలజీని అభివృద్ధి చేస్తోంది. 2026లో ప్రముఖ టెర్మినల్ తయారీదారులు రూపొందించే PoS పరికరాలకు ఈ సాంకేతికతను అనుసంధానించేందుకు అనుమతి ఇచ్చే అవకాశమున్నట్లు సమాచారం.
ఈ కొత్త విధానం నియర్ ఫీల్డ్ కమ్యూనికేషన్ (NFC) టెక్నాలజీపై ఆధారపడి ఉంటుంది. ఆఫ్‌లైన్ టెర్మినల్‌పై NFC సామర్థ్యం గల ఫోన్‌ను ట్యాప్ చేయడం ద్వారా వినియోగదారులు రూ.2 వేల వరకు చెల్లింపులు చేయగలరు. ఫోన్ సిగ్నల్స్ లేని విమాన క్యాబిన్‌లు, భూగర్భ రైలు నెట్‌వర్క్‌లు, కనెక్టివిటీ అందుబాటులో లేని ఇతర ప్రాంతాల్లో కూడా ఈ ఫీచర్ పనిచేయేలా రూపకల్పన చేశారు.
వినియోగదారులు ముందుగా ఇంటర్నెట్‌కు కనెక్ట్ అయి ఉన్నప్పుడు తమ పరికరంలోని UPI Lite వాలెట్‌లోకి డబ్బును లోడ్ చేసుకోవాలి. ఆ తర్వాత ఆఫ్‌లైన్ టెర్మినల్ వద్ద చెల్లింపులు చేసే సమయంలో యూపీఐ పిన్ ఎంటర్ చేయాల్సిన అవసరం ఉండదు. వాలెట్‌లో ఉన్న బ్యాలెన్స్‌ను ఉపయోగించి ట్యాప్ ద్వారా ట్రాన్సాక్షన్ పూర్తవుతుంది.
ఆఫ్‌లైన్ సెట్టింగ్‌లో యూపీఐ చెల్లింపులను స్వీకరించేందుకు PoS కంపెనీలు NPCI నుండి ప్రత్యేక సర్టిఫికేషన్ పొందాలి. సర్టిఫికేషన్ పొందిన తర్వాత ఆ కంపెనీలు తమ టెర్మినల్‌ల కోసం అవసరమైన అప్లికేషన్‌ను అభివృద్ధి చేస్తాయి. ఈ PoS టెర్మినల్‌ల ద్వారా వ్యాపారులు డెబిట్ కార్డులు, క్రెడిట్ కార్డులు, ప్రీపెయిడ్ కార్డులు, మొబైల్ వాలెట్‌ల ద్వారా కూడా కస్టమర్ల నుంచి చెల్లింపులను స్వీకరించగలరు.
టెర్మినల్ చెల్లింపు అధికారాన్ని (ఆథరైజేషన్) నిల్వ ఉంచుతుంది. అనంతరం కనెక్టివిటీ తిరిగి వచ్చిన తర్వాత ఆ సమాచారాన్ని సంబంధిత నెట్‌వర్క్‌కు ఫార్వార్డ్ చేస్తుంది. దీంతో ట్రాన్సాక్షన్ ధృవీకరణ పూర్తవుతుంది.
ఇది UPI యాప్‌ల కోసం NFC ఆధారిత వినియోగ సందర్భం. మీరు యాప్‌ను ఉపయోగించి ట్యాప్ చేస్తారు. టెర్మినల్ ఆఫ్‌లైన్‌లో ఉన్నప్పటికీ మీరు రూ.2 వేల వరకు చెల్లించవచ్చు. ఇది ఆథరైజేషన్‌ను క్యాప్చర్ చేసి నెట్‌వర్క్ పునరుద్ధరించబడిన తర్వాత ధృవీకరణ కోసం పంపుతుంది. బ్యాంకులు, థర్డ్-పార్టీ UPI అప్లికేషన్ ప్రొవైడర్లు కూడా ఈ యాప్‌లకు ఈ సామర్థ్యాన్ని జోడించేందుకు కృషి చేస్తున్నాయి
ఈ కొత్త ఆఫ్‌లైన్ యూపీఐ ఫీచర్ అమలులోకి వస్తే, కనెక్టివిటీ సమస్యలున్న ప్రాంతాల్లో కూడా డిజిటల్ పేమెంట్స్ సౌకర్యం మరింత విస్తరించనుంది. రోజువారీ లావాదేవీల్లో నగదు అవసరాన్ని తగ్గించడంలో ఇది కీలక పాత్ర పోషించే అవకాశం ఉందని రంగ నిపుణులు భావిస్తున్నారు.
