రాయలసీమ న్యూస్, టెక్నాలజీ డెస్క్: యూట్యూబ్‌ ప్లాట్‌ఫారమ్‌లో కొత్త మెసేజింగ్‌ సదుపాయం అందుబాటులోకి వచ్చింది. ఇప్పటివరకు యూట్యూబ్‌లో నచ్చిన వీడియోలు, షార్ట్స్‌ను స్నేహితులకు పంపాలంటే వాటి లింకులను WhatsApp, Telegram వంటి ఇతర యాప్‌ల ద్వారా షేర్‌ చేసుకునే పరిస్థితి ఉండేది. ఇకపై అలాంటి అవసరం లేకుండానే యూట్యూబ్‌లో నుంచే నేరుగా స్నేహితులకు వీడియోలు, సందేశాలు పంపుకునే వీలును ఆ సంస్థ కల్పించింది.
ఈ కొత్త ఫీచర్‌ ద్వారా షార్ట్స్‌, లైవ్‌స్ట్రీమ్‌లు, సాధారణ వీడియోలతో పాటు ప్రత్యక్షంగా మెసేజ్‌లు పంపుకోవచ్చు. వినియోగదారు ఏ వీడియోను వీక్షిస్తున్నా, అందులోని షేర్‌ మెనూలోనే స్నేహితుల వివరాలు కనిపించడం ఈ సదుపాయం ప్రత్యేకతగా నిలుస్తోంది. దీంతో వీడియో చూస్తున్న సమయంలోనే అక్కడి నుంచే మెసేజ్‌ పంపే అవకాశం లభిస్తోంది.
కొత్త మెసేజ్‌లు వచ్చినప్పుడు వినియోగదారులకు నోటిఫికేషన్‌లు కనిపిస్తాయి. పంపిన మెసేజ్‌లను వెనక్కు తీసుకునే అవకాశం కూడా యూట్యూబ్‌ కల్పిస్తోంది. అదనంగా, ఇతరులను బ్లాక్‌ చేయడం, అనుచిత సందేశాలను రిపోర్ట్‌ చేయడం వంటి నియంత్రణలు కూడా యూజర్లకు అందుబాటులో ఉంటాయి. అయితే ఈ సదుపాయం 18 ఏళ్లు లేదా అంతకంటే ఎక్కువ వయస్సు ఉన్న వినియోగదారులకు మాత్రమే వర్తిస్తుంది.
ఈ ఫీచర్‌లో ఇతరులకు మెసేజ్‌ పంపే విధానం సాధారణ సామాజిక మాధ్యమాల కంటే భిన్నంగా ఉంటుంది. Instagram, Telegram వంటి వేదికల్లోలా యూజర్‌ పేరును వెతికి వెంటనే మెసేజ్‌ పంపే అవకాశం ఇందులో లేదు. బదులుగా, ఎవరితోనైనా చాట్‌ ప్రారంభించాలంటే ముందుగా ప్రత్యేక ఆహ్వాన లింక్‌ (invitation link)ను ఇతర మాధ్యమాల ద్వారా పంపాలి. ఆ లింక్‌ను స్వీకరించిన వ్యక్తి అంగీకరించిన తర్వాతే యూట్యూబ్‌లో పరస్పరం మెసేజ్‌లు పంపుకునే అవకాశం ఉంటుంది.
ఈ కొత్త మెసేజింగ్‌ ఫీచర్‌ను యూట్యూబ్‌ గత కొన్ని నెలలుగా పరీక్షల దశలో నిర్వహిస్తోంది. అయితే ఇది ఇంకా ఆసియా ప్రాంతంలో పూర్తిస్థాయిలో అమలులోకి రాలేదు. దశలవారీగా మరిన్ని దేశాల్లో ఈ సదుపాయాన్ని విస్తరించే అవకాశమున్నట్టు టెక్నాలజీ వర్గాలు భావిస్తున్నాయి.
