రాయలసీమ న్యూస్, తెలంగాణ డెస్క్: ఐఐటీ ఖరగ్పూర్ క్యాంపస్‌లో తీవ్ర విషాదం నెలకొంది. హైదరాబాద్‌కు చెందిన ఎలక్ట్రికల్ ఇంజనీరింగ్ అసిస్టెంట్ ప్రొఫెసర్ పుల్లగురం దీపక్ రెడ్డి (36) తన క్వార్టర్స్‌లో అనుమానాస్పద స్థితిలో ప్రాణాలు కోల్పోయిన ఘటన విద్యాసంస్థలో కలకలం రేపింది.
బుధవారం ఉదయం నుంచి దీపక్ రెడ్డి ఫోన్ కాల్స్‌కు స్పందించకపోవడంతో సహోద్యోగులు ఆందోళనకు గురయ్యారు. ఎన్నిసార్లు సంప్రదించేందుకు ప్రయత్నించినా స్పందన లేకపోవడం, గది తలుపులు కూడా చాలా సేపటి వరకు తెరవకపోవడంతో అనుమానం వచ్చిన సిబ్బంది పోలీసులకు సమాచారం అందించారు.
మధ్యాహ్నం 12.30 గంటల ప్రాంతంలో హిజ్లీ ఔట్‌పోస్టు పోలీసులు భద్రతా సిబ్బందితో కలిసి ఆయన క్వార్టర్స్ తలుపులు తెరిచి లోపలికి వెళ్లి పరిశీలించారు. ఈ సమయంలో దీపక్ రెడ్డి ఉరివేసుకున్న స్థితిలో విగతజీవిగా కనిపించారని పోలీసులు తెలిపారు.
వెంటనే ఆయనను క్యాంపస్‌లోని బీసీ రాయ్ ఆసుపత్రికి తరలించినప్పటికీ, అప్పటికే మృతి చెందినట్లు వైద్యులు ధ్రువీకరించారు. ఈ ఘటనపై కేసు నమోదు చేసిన పోలీసులు, ఘటనా స్థలంలో ఆధారాలు సేకరించేందుకు ఆయన గదిని సీజ్ చేశారు.
ఘటనా స్థలంలో సూసైడ్ నోట్ ఏదీ లభించలేదని, పోస్టుమార్టం నివేదిక వచ్చిన తర్వాతే మరణానికి గల అసలు కారణాలు స్పష్టమవుతాయని పశ్చిమ మిడ్నాపూర్ జిల్లా ఎస్పీ పాపియా సుల్తానా తెలిపారు. ఇది ఆత్మహత్యా, లేక ఉద్యోగ సంబంధిత లేదా వ్యక్తిగత ఒత్తిళ్ల నేపథ్యంలో జరిగిన ప్రాణనష్టమా అనే కోణాల్లో దర్యాప్తు కొనసాగిస్తున్నట్లు పోలీసు వర్గాలు పేర్కొన్నాయి.
దీపక్ రెడ్డి మృతి విషయాన్ని పోలీసులు ఇప్పటికే హైదరాబాద్‌లోని ఆయన కుటుంబ సభ్యులకు సమాచారం అందించారు. ఐఐటీ ఖరగ్పూర్ క్యాంపస్‌లో ఈ సంఘటన విద్యార్థులు, అధ్యాపక వర్గాల్లో తీవ్ర దిగ్భ్రాంతిని కలిగించింది. అయితే ఈ విచారకర ఘటనపై ఐఐటీ ఖరగ్పూర్ యాజమాన్యం నుంచి ఇప్పటివరకు ఎలాంటి అధికారిక ప్రకటన వెలువడలేదు.
యువ అసిస్టెంట్ ప్రొఫెసర్ ఆకస్మిక మరణం నేపథ్యంలో క్యాంపస్‌లో భద్రతా ఏర్పాట్లు, అధ్యాపకుల మానసిక ఆరోగ్య పరిరక్షణపై కూడా చర్చలు మొదలయ్యాయి. పూర్తి వివరాలు, మరణానికి దారితీసిన పరిస్థితులపై స్పష్టత కోసం పోలీసులు దర్యాప్తు వేగవంతం చేశారు.
