రాయలసీమ న్యూస్, తెలంగాణ డెస్క్: కొత్తగూడెం జిల్లా భద్రాచలం పట్టణంలో గిరిజన సర్పంచ్ మృతి నేపథ్యంలో ఉద్రిక్తత నెలకొంది. దంతులబోరు గ్రామానికి చెందిన CPI సర్పంచ్ సిడెం వెంకటరమణ ఇటీవల ప్రైవేట్ ఆసుపత్రిలో చికిత్స పొందుతూ మృతి చెందడంతో, ఆమె కుటుంబ సభ్యులు, గ్రామస్థులు వైద్య నిర్లక్ష్యం జరిగిందని ఆరోపిస్తూ ఆసుపత్రి ఎదుట ఆందోళనకు దిగారు.
పాలోన్చ మండలంలోని దంతులబోరు గ్రామ సర్పంచ్ అయిన సిడెం వెంకటరమణను ఇటీవల భద్రాచలంలోని MIMS హాస్పిటల్ లో చేర్చినట్లు సమాచారం. శుక్రవారం రాత్రి చికిత్స పొందుతున్న సమయంలో ఆమె మృతి చెందింది. ఈ నేపథ్యంలో శనివారం ఉదయం కుటుంబ సభ్యులు ఆమె మృతదేహాన్ని ఆసుపత్రి ఎదుట అంబెడ్కర్ సెంటర్ వద్దకు తీసుకువచ్చి నిరసన చేపట్టారు.
వైద్యుల నిర్లక్ష్యమే వెంకటరమణ మృతికి కారణమైందని ఆరోపిస్తూ, సంబంధిత వైద్యులపై చర్యలు తీసుకోవాలని కుటుంబ సభ్యులు డిమాండ్ చేశారు. పరిస్థితి ఉద్రిక్తంగా మారడంతో స్థానిక కొత్తగూడెం పోలీస్ అక్కడికి చేరుకుని పరిస్థితిని అదుపులోకి తీసుకున్నారు. అనంతరం మృతదేహాన్ని గవర్నమెంట్ ఏరియా హాస్పిటల్ కు తరలించారు.
శనివారం కుటుంబ సభ్యులు మళ్లీ నిరసనను కొనసాగించగా, పెద్ద సంఖ్యలో గ్రామస్థులు కూడా చేరి ఆందోళనకు మద్దతు తెలిపారు. ఆసుపత్రి యాజమాన్యం స్పందించకపోవడంతో ఉద్రిక్తత మరింత పెరిగింది.
ఈ క్రమంలో వెంకటరమణ భర్త ఆగ్రహంతో ఆసుపత్రి భవనంలోకి వెళ్లి, పెట్రోల్ పోసి రిసెప్షన్ కౌంటర్ కు నిప్పంటించిన ఘటన చోటుచేసుకుంది. వెంటనే అప్రమత్తమైన పోలీసు సిబ్బంది మంటలను అదుపులోకి తీసుకుని, పెద్ద ప్రమాదాన్ని తప్పించారు.
తరువాత ఆసుపత్రి యాజమాన్యం సర్పంచ్ కుటుంబ సభ్యులతో చర్చలు జరిపింది. ఇరుపక్షాల మధ్య చర్చల ద్వారా సమస్యను సయోధ్యతో పరిష్కరించే ప్రయత్నాలు కొనసాగుతున్నట్లు సమాచారం.
ఈ ఘటనతో భద్రాచలం పట్టణంలో కొంతసేపు ఉద్రిక్తత నెలకొనగా, గవర్నమెంట్ ఏరియా హాస్పిటల్ , MIMS హాస్పిటల్ , ప్రైవేట్ హాస్పిటల్ పరిసర ప్రాంతాల్లో పోలీసులు మోహరించారు. స్థానికులు ఆసుపత్రుల్లో వైద్య సేవలపై పర్యవేక్షణను బలోపేతం చేయాలని కోరుకుంటున్నారు.
