రాయలసీమ న్యూస్, క్రైమ్ డెస్క్: విశాఖపట్నం:- క్రిప్టో కరెన్సీ పేరుతో అధిక లాభాలు వస్తాయని నమ్మబలికి సుమారు 50 మంది నుంచి రూ.10 కోట్లు వసూలు చేసిన మహ్మద్ ఆజీమ్ ఖాన్ను కంచరపాలెం పోలీసులు అరెస్ట్ చేశారు. బిర్లా జంక్షన్ను కేంద్రంగా చేసుకుని ఈ మోసాన్ని నడిపినట్లు పోలీసులు వెల్లడించారు.
పోలీసుల సమాచారం ప్రకారం, ఆజీమ్ ‘పంక్ పాండా’, ‘ఐటీసీ గ్లోబల్’, ‘కేగుష్’ అనే పేర్లతో వెబ్సైట్లు, మొబైల్ అప్లికేషన్లు సృష్టించాడు. వీటి ద్వారా క్రిప్టో కరెన్సీ పెట్టుబడులపై గ్యారంటీ లాభాలు ఇస్తామని ప్రచారం చేశాడు. జూమ్ మీటింగుల ద్వారా పెట్టుబడిదారులను ఆకర్షించి, తక్కువ సమయంలోనే భారీ లాభాలు వస్తాయని చెప్పి డబ్బులు తీసుకున్నట్లు దర్యాప్తులో బయటపడింది.
2021 నుంచి 2025 మధ్య కాలంలో నిందితుడు పెద్ద ఎత్తున పెట్టుబడులు సేకరించినట్లు ఆరోపణలు ఉన్నాయి. మొదట్లో కొంతమందికి చిన్న మొత్తాల్లో లాభాలు ఇచ్చి నమ్మకం కలిగించి, తరువాత మరింత ఎక్కువగా పెట్టుబడులు పెట్టేలా ప్రోత్సహించినట్లు బాధితులు ఫిర్యాదుల్లో పేర్కొన్నట్లు పోలీసులు తెలిపారు.
ఒక బాధితుడు తన పెట్టుబడి మొత్తాన్ని తిరిగి ఇవ్వాలని డిమాండ్ చేయడంతో, ఆజీమ్ అతనిని బెదిరించినట్లు ఆరోపణలు ఉన్నాయి. ఉన్నతాధికారులతో పరిచయాలు ఉన్నాయని, హనీట్రాప్లో ఇరికిస్తానని ఆ బాధితుడిని భయపెట్టినట్లు పోలీసులు చెప్పారు. ఈ బెదిరింపుల నేపథ్యంలో ఆ బాధితుడి నుంచి అదనంగా రూ.10 లక్షలు వసూలు చేసినట్లు విచారణలో తేలింది.
డబ్బులు సేకరించిన తర్వాత ఆజీమ్ సంబంధిత వెబ్సైట్లు, అప్లికేషన్లను ఒక్కసారిగా మూసివేసి పరారయ్యాడు. పెట్టుబడులు చిక్కుకుపోయిన బాధితులు పలుమార్లు ప్రయత్నించినా అతనిని సంప్రదించలేకపోయారు. చివరికి ఒక బాధితుడు కంచరపాలెం పోలీస్ స్టేషన్లో ఫిర్యాదు చేయడంతో కేసు నమోదు చేశారు.
ఫిర్యాదు ఆధారంగా ప్రత్యేక బృందాన్ని ఏర్పాటు చేసిన పోలీసులు, ఆజీమ్ ఉన్నచోటును గుర్తించి అదుపులోకి తీసుకున్నారు. అతని వద్ద నుంచి మోసానికి సంబంధించిన పత్రాలు, డిజిటల్ ఆధారాలను స్వాధీనం చేసుకున్నట్లు సమాచారం. కేసు నమోదు చేసి, మరిన్ని వివరాల కోసం దర్యాప్తు కొనసాగిస్తున్నట్లు పోలీసులు తెలిపారు. ఈ మోసంలో మరెవరైనా పాలుపంచుకున్నారా, మొత్తం ఎంతమంది బాధితులు ఉన్నారనే అంశాలపై కూడా విచారణ జరుపుతున్నారు.
