రాయలసీమ న్యూస్, ఎంటర్టైన్మెంట్ డెస్క్: రామ్చరణ్ హీరోగా, దర్శకుడు బుచ్చిబాబు తెరకెక్కించిన ‘పెద్ది’ సినిమా తనకు ఎంతో ప్రత్యేకమని నటుడు జగపతి బాబు తెలిపారు. ఈ చిత్రంలో ‘అప్పలసూరి’ పాత్రలో నటించిన ఆయన, సినిమా విడుదల తర్వాత వచ్చిన స్పందన, తన పాత్రకు దక్కిన గుర్తింపుపై ఓ ఇంటర్వ్యూలో స్పందించారు.
‘పెద్ది’ కోసం తాను ఎంతగానో కష్టపడ్డానని, ఈ సినిమా పట్ల తనకున్న అనుబంధం వేరుగా ఉంటుందని జగపతి బాబు పేర్కొన్నారు. మధ్యలో ఎన్నో సినిమాలు చేసినా, తన మనసంతా ‘పెద్ది’ విడుదల కోసం ఎదురుచూస్తూనే ఉందని చెప్పారు. రూ.300 కోట్లు ఖర్చు చేసి సినిమా తీసినా, రూ.300 పెట్టి చూసే ప్రేక్షకుల చేతుల్లోనే సినిమా పరిశ్రమ భవితవ్యం ఉంటుందని ఆయన అభిప్రాయపడ్డారు.
‘పెద్ది’ విడుదలైన తర్వాత ‘అప్పలసూరి’ పాత్రపై వచ్చిన స్పందనను ప్రస్తావిస్తూ, ఒక ప్రముఖ దర్శకుడు తనకు ఫోన్ చేసి, ఆ పాత్రను ప్రశంసించిన విషయాన్ని ఆయన వివరించారు. ఆ దర్శకుడు, అదే పాత్రను వేరే భాషకు చెందిన నటుడు చేసి ఉంటే బాగా హైలైట్ చేసి, వరుసగా సినిమాలు ఆఫర్ చేసేవారని, కానీ జగపతి బాబును మాత్రం పెద్దగా పట్టించుకోవడం లేదని వ్యాఖ్యానించినట్లు ఆయన తెలిపారు. ఏ సినిమా పరిశ్రమలో అయినా పరభాష నటులకు ఎక్కువ గౌరవం లభిస్తుందని, తాను కన్నడలో చేసినప్పుడు అక్కడ మంచి గౌరవం దక్కుతుందని ఆయన అన్నారు.
‘పెద్ది’ విడుదలైన తర్వాత తాను దర్శకుడు బుచ్చిబాబును కూడా ఇదే విషయంపై ప్రశ్నించినట్లు జగపతి బాబు చెప్పారు. షూటింగ్ సమయంలో ప్రతి షాట్కు చప్పట్లు కొట్టినవారు, ఇప్పుడు తన పాత్ర గురించి మాట్లాడకపోవడం ఆశ్చర్యంగా ఉందని ఆయన వ్యాఖ్యానించారు. ‘పెద్ది’ కోసం తాను ప్రాణం పెట్టి పనిచేశానని, అందుకే గుర్తింపు కోరే హక్కు తనకు ఉందని, ఇతర సినిమాల విషయంలో మాత్రం ఇలాంటి ప్రశ్నలు ఎప్పుడూ లేవనెత్తలేదని తెలిపారు. ఈ చిత్రం ఇంకా తగిన స్థాయిలో ఆదరణ పొందాల్సి ఉందని, తప్పకుండా ఆ గుర్తింపు వస్తుందనే నమ్మకం వ్యక్తం చేశారు.
ఇక ‘పెద్ది’లో నాయికగా నటించిన జాన్వీ కపూర్ పై సోషల్ మీడియాలో వస్తున్న ట్రోల్స్ గురించి మాట్లాడుతూ, ఆర్టిస్టులను సినిమా పనితీరుపై వ్యక్తిగతంగా లక్ష్యంగా చేసుకోవడం సరికాదని జగపతి బాబు సూచించారు.
‘పెద్ది’ సినిమా విడుదలైన మూడు రోజుల్లోనే రూ.236 కోట్లు వసూలు చేసినట్లు చిత్ర బృందం ప్రకటించిన విషయం తెలిసిందే. భారీ బడ్జెట్తో రూపొందిన ఈ చిత్రంలో రామ్ చరణ్ , జాన్వీ కపూర్ తో పాటు పలువురు ప్రముఖ నటులు కీలక పాత్రల్లో నటించారు.
