రాయలసీమ న్యూస్, తిరుపతి: తిరుపతి జిల్లా పోలీసు శాఖ ఆధ్వర్యంలో జ్యువెలరీ, పాన్ బ్రోకర్ (గోల్డ్ ప్లెడ్జ్) దుకాణాల యజమానులతో భద్రతా చర్యలు, ఆస్తి నేరాల నివారణ, పోలీసు-వ్యాపారుల సమన్వయంపై అవగాహన సమావేశం నిర్వహించారు. తిరుపతి జిల్లా ఎస్పీ శ్రీ ఎల్. సుబ్బారాయుడు, ఐపీఎస్ గారి ఆదేశాల మేరకు, అదనపు ఎస్పీ (అడ్మిన్) శ్రీ ఆర్ల శ్రీనివాసులు పర్యవేక్షణలో ఈ సమావేశం ఈ రోజు సీసీఎస్ పోలీస్ స్టేషన్, తిరుపతిలో జరిగింది. సమావేశానికి క్రైమ్ ఇన్‌స్పెక్టర్లు, సబ్ ఇన్‌స్పెక్టర్లు హాజరయ్యారు.
ఇటీవలి కాలంలో బంగారం ధరలు పెరగడంతో బంగారు ఆభరణాలను లక్ష్యంగా చేసుకుని చైన్ స్నాచింగ్, గృహ చోరీలు, ఇతర ఆస్తి నేరాలు పెరుగుతున్న నేపథ్యంలో జ్యువెలరీ, గోల్డ్ ప్లెడ్జ్ దుకాణాల యజమానులు మరింత అప్రమత్తంగా వ్యవహరించాలని పోలీసు శాఖ సూచించింది. నేరాల నివారణలో భాగంగా ఈ దుకాణాల్లో భద్రతా ప్రమాణాలు తప్పనిసరిగా అమలు చేయాలని అధికారులు స్పష్టం చేశారు.
ప్రతి దుకాణంలో నాణ్యమైన సీసీటీవీ కెమెరాలు ఏర్పాటు చేసి అవి నిరంతరం పనిచేసేలా చూడాలని, దుకాణాల్లో జరిగే అన్ని లావాదేవీల పూర్తి రికార్డులు నిర్వహించాలని సూచించారు. బంగారం విక్రయించే లేదా తాకట్టు పెట్టే ప్రతి వ్యక్తి గుర్తింపు పత్రాలను (KYC) తప్పనిసరిగా ధృవీకరించాలని, ఈ ప్రక్రియను కఠినంగా అమలు చేయాలని దుకాణ యజమానులకు అధికారులు సూచించారు.
అనుమానాస్పద వ్యక్తులు, లావాదేవీలు లేదా దొంగిలించబడినట్లు అనుమానమున్న బంగారం గురించి సమాచారం లభించిన వెంటనే పోలీసులకు తెలియజేయాలని పోలీసు శాఖ కోరింది. దొంగిలించబడినట్లు అనుమానమున్న బంగారాన్ని కొనుగోలు చేయడం లేదా తాకట్టు స్వీకరించడం చట్టరీత్యా నేరమని అధికారులు స్పష్టం చేశారు. ఇలాంటి సందర్భాల్లో పోలీసు శాఖ నిర్వహించే తనిఖీలు, దర్యాప్తులకు పూర్తి సహకారం అందించాలని దుకాణ యజమానులను కోరారు.
దుకాణ సిబ్బందికి భద్రతా ప్రమాణాలపై అవగాహన కల్పించి, వాటిని కచ్చితంగా అమలు చేయాలని, భద్రతా చర్యల్లో ఎలాంటి నిర్లక్ష్యం చోటు చేసుకోకూడదని సమావేశంలో అధికారులు సూచించారు. జ్యువెలరీ, పాన్ బ్రోకర్ దుకాణాలు నేరాల నివారణలో కీలక పాత్ర పోషించాల్సిన అవసరాన్ని వారు వివరించారు.
ఈ సందర్భంగా సమావేశంలో పాల్గొన్న జ్యువెలరీ, పాన్ బ్రోకర్ దుకాణాల యజమానులు నేరాల నివారణలో పోలీసు శాఖతో సమన్వయంగా పనిచేస్తూ, అన్ని భద్రతా ప్రమాణాలను పాటిస్తూ పూర్తి సహకారం అందిస్తామని హామీ ఇచ్చారు. పోలీసు శాఖ సూచించిన మార్గదర్శకాలను అమలు చేయడానికి తాము సిద్ధంగా ఉన్నామని వారు పేర్కొన్నారు.
