రాయలసీమ న్యూస్, తిరుపతి: తిరుపతి రూరల్ పోలీస్ స్టేషన్ పరిధిలో సంచలనం సృష్టించిన ‘మర్డర్ ఫర్ గెయిన్’ కేసును తిరుపతి జిల్లా పోలీసులు అత్యంత వేగంగా ఛేదించారు. పాత పరిచయాన్ని ఆసరాగా చేసుకుని నగదు, బంగారు ఆభరణాల కోసం వృద్ధురాలిని నమ్మించి హత్య చేసిన నిందితుడిని పోలీసులు అరెస్ట్ చేశారు.

తిరుపతి రూరల్ పోలీస్ స్టేషన్ పరిధిలోని సాయినగర్ పంచాయతీ, విజయనగర్ ప్రాంతంలో ఒంటరిగా నివసిస్తున్న శ్రీమతి ఎం. జ్యోతి (69)పై నిందితుడు జూలై 14, 2026న అత్యంత దారుణంగా దాడి చేసి హత్య చేసినట్లు పోలీసులు తెలిపారు. అనంతరం ఆమె ధరించిన బంగారు ఆభరణాలతో పాటు ఇంట్లో ఉన్న సుమారు 90 గ్రాముల బంగారు ఆభరణాలు, సుమారు 12 లక్షల రూపాయల విలువ గల ఆభరణాలు, అలాగే ₹47,000 నగదును అపహరించి నిందితుడు పరారైనట్లు దర్యాప్తులో వెల్లడైంది.

ఈ కేసు దర్యాప్తులో నిందితుడు పాశం రూపేష్ కుమార్ (వయసు 36 సంవత్సరాలు), గుడిపల్లిపాడు గ్రామం, నెల్లూరు రూరల్ మండలం, కేంద్ర ప్రభుత్వ ఉద్యోగిగా భారత రైల్వే శాఖలో లోకో పైలట్‌గా కృష్ణపట్నం రైల్వే స్టేషన్‌లో విధులు నిర్వహిస్తున్నట్లు పోలీసులు గుర్తించారు. బాధిత కుటుంబంతో గత కొన్నేళ్లుగా ఉన్న పరిచయాన్ని అవకాశంగా మార్చుకుని, వారి కుటుంబ పరిస్థితులపై ఉన్న అవగాహనతో ముందస్తు ప్రణాళిక ప్రకారం ఈ నేరానికి పాల్పడినట్లు విచారణలో తేలింది.

ఆర్థిక ఇబ్బందులు, అప్పుల భారంతో బాధపడుతున్న నిందితుడు బంగారు ఆభరణాలను అపహరించి విక్రయించడం ద్వారా డబ్బు సంపాదించాలనే ఉద్దేశంతో వృద్ధురాలిని లక్ష్యంగా చేసుకుని ఈ నేరాన్ని అమలు చేసినట్లు దర్యాప్తు అధికారులు తెలిపారు. నిందితుడు మారువేషం ధరించడం, దొంగిలించిన స్కూటీ వినియోగించడం, ఫేక్ నంబర్ ప్లేట్ ఉపయోగించడం ద్వారా తన గుర్తింపును దాచేందుకు ప్రయత్నించినప్పటికీ, శాస్త్రీయ–సాంకేతిక ఆధారాలతో పోలీసులు అతని కదలికలను గుర్తించారు.

కేసు విచారణలో భాగంగా ప్రత్యేక బృందాలను ఏర్పాటు చేసి, సాంకేతిక ఆధారాలు, సీసీ కెమెరా దృశ్యాలు, కాల్ డేటా విశ్లేషణ వంటి పద్ధతులను వినియోగించి నిందితుడి చలనాలను ట్రాక్ చేసినట్లు పోలీసులు పేర్కొన్నారు. చివరికి కృష్ణపట్నం రైల్వే స్టేషన్ సమీపంలో నిందితుడు పాశం రూపేష్ కుమార్‌ను అరెస్ట్ చేసి, అతని వద్ద నుంచి అపహరించిన బంగారు ఆభరణాలు, ఇతర ఆధారాలను స్వాధీనం చేసుకున్నట్లు తెలిపారు.

తిరుపతి జిల్లా ఎస్పీ శ్రీ ఎల్. సుబ్బరాయుడు, ఐపీఎస్., గారు ఆదివారం ఏర్పాటు చేసిన మీడియా సమావేశంలో కేసు ఛేదనకు సంబంధించిన పూర్తి వివరాలను వెల్లడించారు. నిందితుడు ఎంత తెలివిగా ప్రణాళిక రచించినా, మారువేషాలు, ఫేక్ నంబర్ ప్లేట్లు ఉపయోగించినా, శాస్త్రీయ–సాంకేతిక దర్యాప్తు ముందు నేరస్థులు తప్పించుకోలేరని జిల్లా ఎస్పీ స్పష్టం చేశారు.