రాయలసీమ న్యూస్, తిరుపతి: తిరుపతి: ప్రపంచ ప్రకృతి దినోత్సవాన్ని పురస్కరించుకొని తిరుపతికి చెందిన స్థానిక సంస్థ ఇండియన్స్ అసోసియేషన్ అఫ్ ఎడ్యుకేషన్ , సోషల్ అవేర్నెస్ అండ్ నేచర్ రెస్పాన్సిబిలిటీ ఆధ్వర్యంలో అక్టోబర్ 3న చంద్రగిరి స్థానిక జూనియర్ కళాశాలలో ప్రకృతి అవగాహన కార్యక్రమం నిర్వహించారు. విద్యార్థుల్లో ప్రకృతి, జీవ వైవిధ్యం పరిరక్షణపై చైతన్యం పెంపొందించేందుకు ఈ కార్యక్రమాన్ని ఏర్పాటు చేసినట్లు నిర్వాహకులు తెలిపారు.
కార్యక్రమంలో భాగంగా ప్లాంట్ ఎకో ల్యాబ్‌లో పెంచిన మొక్కలను విద్యార్థులకు అందజేశారు. సంస్థ డైరెక్టర్ డా. జి. రామకృష్ణ చేతుల మీదుగా ఈ మొక్కలను పంపిణీ చేశారు. కళాశాల ప్రిన్సిపాల్, అధ్యాపకులు, విద్యార్థులు ఈ కార్యక్రమంలో పాల్గొని ప్రకృతి పరిరక్షణ ప్రాముఖ్యతపై అవగాహన పొందారు.
ఈ సందర్భంగా డా. జి. రామకృష్ణ ప్రకృతి సంపదల సంరక్షణ అవసరాన్ని విద్యార్థులకు వివరించారు. గాలి, నీరు, నేల, మొక్కలు వంటి ప్రకృతి అంశాలు మన జీవనానికి ఎంత ముఖ్యమో, వాటి పరిరక్షణలో ప్రతి ఒక్కరి పాత్ర ఎంత కీలకమో విద్యార్థులకు తెలియజేశారు. ప్రకృతి సమతుల్యత దెబ్బతింటే భవిష్యత్ తరాలు ఎదుర్కొనే సమస్యలు తీవ్రమవుతాయని ఆయన సూచించారు.
ప్రకృతిని కాపాడితేనే భవిష్యత్ తరాలకు ఆరోగ్యకరమైన, సురక్షితమైన భూమిని అందించగలమని డా. రామకృష్ణ విద్యార్థులకు వివరించారు. పర్యావరణ కాలుష్యాన్ని తగ్గించడం, చెట్లను నాటడం, నీటి వనరులను సంరక్షించడం వంటి చర్యల్లో విద్యార్థులు చురుకుగా పాల్గొనాలని ఆయన సూచించినట్లు నిర్వాహకులు తెలిపారు.
విద్యార్థుల్లో పర్యావరణ స్పృహ, ప్రకృతి పరిరక్షణపై బాధ్యతాయుతమైన భావన పెంపొందించేందుకు ఇలాంటి కార్యక్రమాలను మరింతగా నిర్వహించాలనే సంకల్పంతో ఉన్నామని సంస్థ ప్రతినిధులు పేర్కొన్నారు. విద్యాసంస్థల స్థాయిలోనే పర్యావరణ చైతన్యాన్ని బలపరిస్తే సమాజంలో దీర్ఘకాలిక మార్పు సాధ్యమవుతుందని వారు అభిప్రాయపడ్డారు.
