రాయలసీమ న్యూస్, వై.యస్.ఆర్: ముద్దనూరు : డివైఎఫ్ఐ ఆధ్వర్యంలో జరగనున్న 8వ మహాసభల సందర్భంగా కరపత్రాల ఆవిష్కరణ సోమవారం ముద్దనూరు పట్టణంలో జరిగింది. ఆగష్టు 10, 11 తేదీలలో జమ్మలమడుగు పట్టణంలో నిర్వహించనున్న మహాసభలను విజయవంతం చేయాలని ఆకాంక్షిస్తూ పట్టణంలోని ఆర్ అండ్ బి గృహంలో ఈ కార్యక్రమాన్ని నిర్వహించారు. డివైఎఫ్ఐ జిల్లా కార్యదర్శి వీరాణాల శివకుమార్ ఆధ్వర్యంలో కరపత్రాలను ఆవిష్కరించారు.
ఈ సందర్భంగా వీరాణాల శివకుమార్ రాష్ట్రంలో ఎక్కడా లేని విధంగా సిమెంట్, సోలార్ పరిశ్రమలు ఒక్క కడప జిల్లాలోనే ఉన్నాయని తెలిపారు. అయితే జిల్లాలో నిరుద్యోగ యువత ఉపాధి లేక సమస్యలు ఎదుర్కొంటున్నారని ఆయన పేర్కొన్నారు. స్థానిక పరిశ్రమలు జిల్లాలోని వనరులను వినియోగించుకుంటూ, ఇక్కడి యువతకు ఉద్యోగ అవకాశాలు కల్పించడంలో నిర్లక్ష్యం వహిస్తున్నాయని ఆయన విమర్శించారు.
పరిశ్రమ యాజమాన్యాలు స్థానిక వనరులను ఉపయోగించుకుంటూనే, స్థానిక యువతపై వివక్ష చూపుతూ ఇతర రాష్ట్రాల యువతకు ఉద్యోగాలు కల్పిస్తున్నారని ఆయన మండిపడ్డారు. ఈ పరిస్థితి వల్ల కడప జిల్లాలో నిరుద్యోగ సమస్య మరింత తీవ్రమవుతోందని ఆయన అభిప్రాయపడ్డారు.
స్థానిక పరిశ్రమలలో స్థానిక యువతకే ఉద్యోగాలు కల్పించాలనే ప్రధాన డిమాండ్తో 8వ మహాసభల్లో విస్తృత చర్చలు జరపాలని డివైఎఫ్ఐ నాయకత్వం నిర్ణయించినట్లు ఆయన తెలిపారు. యువతకు మరిన్ని ఉద్యోగ అవకాశాలు కల్పించే విధంగా మహాసభల అనంతరం సమగ్ర పోరాట కార్యక్రమాన్ని కొనసాగించనున్నట్లు ఆయన పేర్కొన్నారు.
జమ్మలమడుగులో జరగనున్న ఈ మహాసభలను జయప్రదం చేయాలని, కడప జిల్లాలోని యువత, ప్రజాసంఘాలు, ప్రజాస్వామ్య వాద శక్తులు విస్తృతంగా పాల్గొని తమ మద్దతు తెలపాలని ఆయన కోరారు.
కరపత్రాల ఆవిష్కరణ కార్యక్రమంలో అబ్దుల్, యాసిన్, చెన్నకేశవ తదితరులు పాల్గొన్నారు. కార్యక్రమం అనంతరం మహాసభల ప్రచారాన్ని మరింత బలోపేతం చేయాలని డివైఎఫ్ఐ నాయకులు నిర్ణయించారు.
