రాయలసీమ న్యూస్, వై.యస్.ఆర్: బద్వేల్ పట్టణంలో శుక్రవారం మధ్యాహ్నం జరిగిన ఘటన స్థానికులను కలవరపరిచింది. సిద్ధవటం రోడ్డులోని CSI చర్చి ఎదురుగా యువతి హత్యకు గురైంది. కడప జిల్లా విశ్వనాథపురానికి చెందిన సమ్మెట ప్రవల్లిక (28)ను ఆమె భర్త సాయిబాబా కత్తితో పొడిచి చంపినట్లు సమాచారం.
పోలీసుల ప్రాథమిక దర్యాప్తు ప్రకారం, ప్రవల్లిక–సాయిబాబా దంపతులు 2023లో పెద్దల అభిప్రాయానికి వ్యతిరేకంగా ప్రేమ వివాహం చేసుకున్నారు. వివాహానంతరం ఇద్దరి మధ్య మనస్పర్థలు పెరిగిన నేపథ్యంలో కొంతకాలంగా విడిగా జీవిస్తున్నట్లు తెలుస్తోంది.
శుక్రవారం మధ్యాహ్నం బద్వేల్లోని సిద్ధవటం రోడ్డుపై CSI చర్చి సమీపంలో ప్రవల్లిక ఉన్న సమయంలో అక్కడకు వచ్చిన సాయిబాబా ఆమెపై దాడి చేసినట్లు ప్రత్యక్ష సాక్షులు పోలీసులకు తెలిపారు. ఈ దాడిలో సాయిబాబా కత్తితో పలుమార్లు పొడవడంతో ప్రవల్లిక అక్కడికక్కడే కుప్పకూలినట్లు సమాచారం.
దాడి జరిగిన సమయంలో దంపతుల పిల్లలు అక్కడే ఉన్నారని, వారి కళ్లెదుటే ఈ హత్య జరగడం మరింత విషాదకరంగా మారిందని స్థానికులు చెబుతున్నారు. ఘటన అనంతరం అక్కడున్న వారు ప్రవల్లికను ఆసుపత్రికి తరలించే ప్రయత్నం చేసినప్పటికీ, అప్పటికే ఆమె మృతిచెందినట్లు వైద్యులు నిర్ధారించినట్లు తెలుస్తోంది.
సమాచారం అందుకున్న బద్వేల్ పోలీసులు వెంటనే సంఘటనా స్థలానికి చేరుకుని పరిశీలించారు. మృతదేహాన్ని పోస్టుమార్టం కోసం ప్రభుత్వ ఆసుపత్రికి తరలించారు. హత్యకు దారితీసిన కారణాలపై పోలీసులు దర్యాప్తు ప్రారంభించారు. దంపతుల మధ్య గతంలో చోటుచేసుకున్న విభేదాలు, కుటుంబ పరిస్థితులు, వ్యక్తిగత కారణాలపై కూడా విచారణ కొనసాగిస్తున్నారు.
సంఘటనా స్థలంలో క్లూస్ టీం ఆధారాలు సేకరిస్తుండగా, సాయిబాబా పరారీలో ఉన్నాడా, లేక సంఘటన తర్వాత అదుపులోకి తీసుకున్నారా అన్న వివరాలు వెలుగులోకి రావాల్సి ఉంది. కేసు నమోదు చేసిన పోలీసులు, ప్రవల్లిక బంధువులు, స్థానికుల వాంగ్మూలాలు సేకరిస్తున్నారు.
పట్టణంలో మధ్యాహ్నం బహిరంగ ప్రదేశంలో జరిగిన ఈ హత్యతో బద్వేల్ ప్రజలు షాక్‌కు గురయ్యారు. కుటుంబ కలహాలు ఇంతటి దారుణానికి దారితీసిన తీరు పట్ల స్థానికులు ఆవేదన వ్యక్తం చేస్తున్నారు.
